កំពង់ធំៈ នៅព្រឹកថ្ងៃទី ១៨ ខែ កញ្ញាឆ្នាំ ២០១៤ លោកវរៈសេនីយ៍ត្រី អ៊ូ ឆេងកន មេបញ្ជាការផ្នែកសឹករងប្រាសាទសំបូរ ព្រមទាំងមន្ត្រីក្រោមឳវាទបានអញ្ជើញចុះសួរសុខទុក្ខ ដល់គ្រួសារអតីតយោធិន នៃផ្នែកសឹករងប្រាសាទសំបូរ និងបាននាំយកមកនូវ គ្រឿងឧបភោគបរិភោគជូនដល់គ្រួសារអតីតយោធិនក្នុងឳកាសបុណ្យភ្ជុំបិណ្ឌស្ថិតនៅភូមិកូនក្អែក ឃុំ សំបូរ ស្រុកប្រាសាទសំបូរ ខេត្តកំពង់ធំ ។
លោកវរៈសេនីយ៍ត្រី អ៊ូ ឆេងកន បានឲ្យដឹងថា ការនាំយកអំណោយមកជូនដល់ គ្រួសារអតីតយោធិននេះ ដោយមានណែនាំពី ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំឲ្យមេបញ្ជាការផ្នែកសឹករង និងគ្រប់កងវរៈសេនាតូច ចុះសួរសុខទុក្ខ ដល់អតីតយោធិន ដើម្បីបង្ហាញពីទឹកចិត្តអាណិតស្រឡាញ់ របស់មិត្តកងយោពលខេរៈភូមិន្ទ ដែលធ្លាប់បានសាងទុកនូវអនុស្សាវរីយ៍ ក្នុងការបំរើ ជាតិមាតុភូមិ និងបានឆ្លងកាត់គ្រប់ឧបស័គ្គកន្លងមក។ 
លោកវរៈសេនីយ៍ត្រី អ៊ូ ឆេងកន បានផ្តល់នូវគ្រឿងឧបភោគបរិភោគ ជូនលោក សៀង ឆុន អតីតជាយោធិន ផ្នែកសឹករងប្រាសាទសំបូរ ទឹកផ្លែឈើ១កេស រួមមាន មី១កេស ទឹកត្រី ១យួរ ទឹកស៊ីអ៊ីវ ១យួរ ទឹកសុទ្ធ ៦យួរ ប៊ីចេង២កញ្ចប់ និងថវិការ១៥ម៉ឺនរៀល ដើម្បីចូល រួមចំណែកក្នុងការលើកទឹកចិត្តដល់អតីតយោធិន លោកបានបន្តថា ទោះជាអំណោយនាំមកជូននេះ មានតិចតួចស្តួចស្តើងក្តី តែក៏ជាទឹកចិត្តដ៏ស្មោះសរ របស់កងកម្លាំងនៃផ្នែកសឹករងស្រុកប្រាសាទសំបូរ ដើម្បីបញ្ជាក់ពីក្តីអាណិតនិងស្រឡាញ់ដែលពុំអាចកាត់ថ្លៃបាន។ 
លោកមេបញ្ជាកាផ្នែកសឹករងស្រុកប្រាសាទសំបូរ បានពាំនាំនូវការសួរសុខទុក្ខ ពី ឯកឧត្តម ឧត្តមសេនីយ៍ត្រី សោម ស៊ុន និងថ្នាក់ដឹកនាំ នៃតំបន់សឹករងកំពង់ធំ ដោយការគោរព អាណិតស្រឡាញ់ និងបានផ្តាំផ្ញើរឲ្យខិតខំតស៊ូ ប្រឹងប្រែង អប់រំកូនចៅ បង្ហាត់បង្រៀនឲ្យដើរតាមគន្លងធម៌ និងជម្រុញឲ្យកូនចៅមានការៀនសូត្រ ប្រព្រឹត្តតែ អំពើល្អ ឲ្យក្លាយទៅជាក្មេងល្អ មនុស្សល្អ រស់នៅក្នុងសង្គម និងសូមឲ្យចៀសវាងកុំឲ្យមានការ ពាក់ព័ន្ឋទៅ នឹងបទល្មើសផ្សេងៗ ជាពិសេសគឺគ្រឿងញៀន ដែលជាអំពើខុសច្បាប់ ។
