ខេត្តបាត់ដំបង ,ការលើកគ្នាតវ៉ាប្រឆាំងសកម្មភាពរបស់សមាគមអាដហុកខេត្តបាត់ដំបង និងសុំឲ្យអាជ្ញាធរខេត្ត បាត់ដំបង ដោះស្រាយទំនាស់ដីមានតែប្លង់គ្មានដីនេះ បានធ្វើឡើងនៅក្រោមដើមពោធិនាគបាញ់ទឹក ស្ថិត ក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ ដំបង។
នៅក្នុងញាតិ ប្រជាពលរដ្ឋ និងនិវត្តជនឃុំបឹងប្រាំ បានឲ្យដឹងថា ប្រជាពលរដ្ឋរស់នៅទាំង៨ភូមិ ក្នុង ឃុំបឹងប្រាំ សូមជំទាស់តវ៉ាប្រឆាំងដាច់ខាត ចំពោះសកម្មភាព និងការលើកឡើងរបស់លោក យិន ម៉េងលី ប្រធានសមាគមអាដហុកខេត្តបាត់ដំបង តាមរយៈប្រព័ន្ធផ្សព្វផ្សាយ តាមវិទ្យុអាស៊ីសេរី ទង្វើនេះ បានធ្វើឲ្យ ប៉ះពាល់យ៉ាងធ្ងន់ធ្ងរដល់សិទ្ធិ និងផលប្រយោជន៏ស្របច្បាប់របស់ពួកគាត់ ដែលកំពុងរស់នៅក្នុងឃុំបឹងប្រាំ ទាំងអស់គ្នា ។
តំណាងពលរដ្ឋបានបញ្ជាក់ថា ពួកគាត់មានការខ្វះខាត បាននាំគ្នាចូលទៅកាប់ដីព្រៃក្នុងតំបន់បឹងប្រាំ តាំងពីពាក់កណ្ដាលឆ្នាំ២០០៥ តែត្រូវបានខាងអាជ្ញាធរមួលដ្ឋាន និងសមត្ថកិច្ចទប់ស្កាត់ រហូតដល់ឆ្នាំ ២០០៦-២០០៧ និងមានការចាប់ឃាត់ខ្លួនលោក ឈា នី ដាក់ពន្ធនាគារទៀតផង ។ ក្នុងអំឡុងពេលនោះ ពួកគាត់បានទទួលការគាំទ្រយ៉ាងពេញទំហឹង ពីសំណាក់អង្គការសង្គមស៊ីវិលដូចជា លោក យិន ម៉េងលី ប្រធានសមាគមអាដហុកខេត្តបាត់ដំបង លោក កឹម សុខា ប្រធានមជ្ឈមណ្ឌលសិទ្ធិមនុស្សកម្ពុជា អង្គការ លីកាដូ និងអង្គការសង្គមស៊ីវិលជាច្រើនសរុប ២៣អង្គការ បានលើកទឹកចិត្ត និងតស៊ូមតិក្រាញននៀល រហូតបានដោះលែងលោក ឈា នី ចេញពីពន្ធនាគារវិញ ។ 
បន្ទាប់ពីការដោះលែងលោក ឈា នី មក អង្គការសង្គមស៊ីវិលទាំងនោះ បានណែរនាំចងក្រងពួកគាត់ទៅជាសហគមន៏មួយនៅក្នុងតំបន់បឹងប្រាំនេះ ដើម្បីទាមទារសិទ្ធិរស់នៅ និងបានកាន់កាប់ដីធ្លីនៅតំបន់បឹងប្រាំនេះ ។ ក្រោយមករាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានឯកភាពរៀបចំ សហគមន៏នេះ ជាគោលដៅសម្បទានសង្គមកិច្ច ដោយរួមបញ្ចូលទាំងអតីតកងកម្លាំងប្រដាប់អាវុធ ចំនួន ២៥០គ្រួសារថែមទៀត ។ 
យោងតាមបទបញ្ជាលេខ ០០១ ប.ប ដែលអនុវត្តន៏ដោយក្រុមយុវជនស្ម័គ្រចិត្ត សម្ដេច ហ៊ុន សែន ពួកគាត់ប្រមាណ ១២៩៩គ្រួសារ បានទទួលការបែងចែកដីសម្បទានសង្គមកិច្ចនេះ ក្នុងមួយគ្រួសារៗទទួលបានដីលំនៅដ្ឋានចំនួនមួយរ៉ៃ និងដីកសិកម្មចំនួន ៦០០០ម៉ែត្រការ៉េ ដោយទទួល បានប័ណ្ណកម្មពេញសិទ្ធិស្របច្បាប់រួចជាស្រេចតាំងពីឆ្នាំ២០១២ តែបច្ចុប្បន្ននេះ ពលរដ្ឋចំនួន ១២៩៩ គ្រួសារ និងនិវត្តជន ២៥០គ្រួសារ មានតែប័ណ្ណកម្មសិទ្ធិស្របច្បាប់ ហើយមិនទាន់បានប្រើប្រាស់ដីធ្លីនោះ ទេ ព្រោះកើតមានទំនាស់ដីធ្លីជាមួយក្រុមប្រជាពលរដ្ឋផ្សេងទៀត ដែលរស់នៅក្រៅឃុំ ចេញមកអះអាងថា ជាដីរបស់ពួកគេទៅវិញ ដោយសារមានខាងសមាគមអាដហុកខេត្តបាត់ដំបងនៅពីក្រោយខ្នង ។
ពេលថ្មីៗ នេះ លោក យិន ម៉េងលី ប្រធានសមាគមអាដហុកខេត្តបាត់ដំបង បានប្រើតួនាទី ជាមួយក្រុមប្រឹក្សាខេត្ត ក្រុមប្រឹក្សាស្រុកបវេលរបស់គណបក្សសង្គ្រោះជាតិ ជាអ្នកគាំទ្រពលរដ្ឋមកពីខាងក្រៅ និងធ្វើការប្ដឹងតវ៉ាទាមទារដីសម្បទានសង្គមកិច្ច ដែលរាជរដ្ឋាភិបាលកម្ពុជា បានចេញប្លង់ផ្ដល់ជូនពលរដ្ឋ និងនិវត្តជនរួច ហើយ និងរារាំងដំណើរការដាំដុះបង្កបង្កើនផលរបស់ពលរដ្ឋ និងនិវត្តជនទៅវិញ ។ សកម្មភាពនេះ គឺជា ចេតនាញុះញង់បង្កទំនាស់គ្មានពេលបញ្ចប់ និងបម្រើសកម្មភាពឲ្យគណបក្សនយោបាយយ៉ាងពិតប្រាកដ។
ពាក់ពាន់ករណីនេះ លោក យិន ម៉េងលី ប្រធានសមាគមអាដហុកខេត្តបាត់ដំបង អ្នកយកព័តមាន យើងមិនអាចទំនាក់ទំនងតាមទូរស័ព្ទដៃបានទេ នៅម៉ោងជិត ២រសៀល ថ្ងៃទី២៦ ខែកញ្ញា ដោយទួរស័ព្ទ ចុចចូលហើយគ្មានអ្នកលើក ។
ការដោះស្រាយជួនប្រជាពលរដ្ឋ និងនិវត្តជនឃុំបឹងប្រាំ រហូតដល់ម៉ោងជាង៣រសៀល ថ្ងៃទី២៦ ខែ កញ្ញា ឯកឧត្តម ច័ន្ទ សុផល អភិបាលខេត្តបាត់ដំបង បានសម្រេចថា ទី១ នៅថ្ងៃទី២៩ ខែកញ្ញា ឆ្នាំ២០១៤ និងដាក់ក្រុមការងារចុះទៅដោះស្រាយជួនហើយ, ទី២ ករណីពលរដ្ឋមានប្លង់ ហើយត្រូវមានដីធ្លីកាន់កាប់ និងបញ្ហាភ្ជួរដីប៉ះពាល់គ្នា អាជ្ញាធរខេត្តបាត់ដំបងជាអ្នកចេញប្រាក់សងថ្លៃខូចខាតជួនទាំងអស់, ទី៣ ចំពោះ ពលរដ្ឋម្ខាងទៀត បើគ្មានដីធ្លីទេ គឺត្រូវដាក់ពាក្យស្នើរសុំមកខេត្ត និងរៀបចំដោះស្រាយជួន ព្រមទាំងជួយ ថវិការមួយចំនួន សម្រាប់បងប្អូនវិលត្រឡប់ទៅផ្ទះវិញផងដែរ ។
គួររំលឹកផងដែរថា នៅក្នុងខែកញ្ញា ឆ្នាំ២០១៤នេះ មានកើតរឿងទំនាស់ដីធ្លីនៅឃុំបឹងប្រាំនេះ ប្រជាពលរដ្ឋលើកគ្នាប្ដឹង និងតវ៉ាចំនួន ៣លើកមកហើយ នៅលើផ្ទៃដីក្នុងឃុំបឹងប្រាំដដែលនេះ ។ ទំនាស់ដី ធ្លីដែលកើតឡើងនៅក្នុងតំបន់បឹងប្រាំនេះ គឺមានជាច្រើនក្រុមជាន់គ្នាលើដីតែមួយ ដែលមានផ្ទៃដីប្រមាណ ជាង ៣ពាន់ហិកតា សម្រាប់ប្រជាពលរដ្ឋដែលទទួលបានដីសម្បទានប្រមាណជិត ២ពាន់គ្រួសារ ក្រោយពី រាជរដ្ឋាភិបាលកម្ពុជាធ្វើកំណែរទម្រង់ដីធ្លីកន្លងមក ៕ phonsokcheat
