ក្រុមម្ចាស់ផ្ទះ Basel របស់ប្រទេសស្វីសបានបង្ហាញពីទម្រង់លេងដ៏ល្អដោយបានយកឈ្នះលើក្រុមភ្ញៀវ Liverpool របស់អង់គ្លេសក្នុងលទ្ធផល 1-0 សម្រាប់ការប្រកួត Uefa Champions League ក្នុងពូលBកាលពីយប់មិញ ។
ទោះបីជាមានការវាយសម្រុកគ្នាទៅវិញទៅមកនៅក្នុងតង់ទីមួយក៏ដោយ ក្រុមទាំងពីរមិនអាចស៊ុតគ្រាប់បាល់បំប៉ោងសំណាញ់ទីគ្នាបានឡើយដោយរក្សាបានលទ្ធផល 0-0 ។
ប៉ុន្តែលុះការប្រកួតចូលដល់តង់ទី២លេងបានតែ៧នាទីប៉ុណ្ណោះ កីឡាករ ម៉ាកូ ស្ត្រេល័រ (Marco Streller)រកបានមួយគ្រាប់ឲ្យ Basel នាំមុខមុន 1-0 ហើយលទ្ធផលនេះបានរក្សារហូតដល់ចប់ការប្រកួត ។
ដោយឡែកការប្រកួតមួយគូទៀតក្នុងពូលBនេះ ក្រុមការពារតំណែងជើងឯក Real Madrid បានយកឈ្នះលើក្រុមម្ចាស់ផ្ទះ លូដូហ្គោរ៉េត រ៉ាហ្គ្រេត (Ludogorets Razgrad) ក្នុងលទ្ធផល 2-1 ។ ២គ្រាប់របស់ Real Madrid គឺរកបានដោយកីឡាករ Cristiano Ronaldo នៅនាទីទី២៥និង Karim Benzema នៅនាទីទី៧៧ ។ ចំណែកមួយគ្រាប់របស់ Ludogorets រកបានដោយកីឡាករ ម៉ាសេលីញ៉ូ (Marcelinho) នៅនាទីទី៦ ៕
