កំពង់ធំ៖ លោកអ៊ឹម ថនសមាជិកក្រុមប្រឹក្សាខេត្តតំណាងដ៏ខ្ពង់ខ្ពស់លោកឌិត សាខនប្រធានក្រុមប្រឹក្សាស្រុកនិងលោកអ៊ុត វណ្ណារ៉ាអភិបាលនៃគណៈអភិបាលស្រុកកំពង់ស្វាយ បានអញ្ជើញជាអធិបតីភាពនិងពិធីប្រកាសតែងតាំងនិងប្រគល់ភារកិច្ចជូនមន្ត្រីរាជការនៃរដ្ឋបាលស្រុកកំពង់ស្វាយនៅព្រឹកថ្ងៃទី ១៨ ខែកញ្ញាឆ្នាំ ២០២៤។
បន្ទាប់ពីលោកស៊ន់ សុភាពនាយករដ្ឋបាលសាលាស្រុកកំពង់ស្វាយ បានអានដីការស្ដីពី ការតែងតាំងនិងប្រគល់ភារកិច្ចនិងដីកាស្ដីពីការផ្លាស់ប្ដូរកន្លែងធ្វើការ និងដីកាស្ដីពីការប្រគល់ភារកិច្ចមន្ត្រីរាជការរបស់រដ្ឋបាលស្រុកកំពង់ស្វាយ ព្រមទាំង គណៈអធិបតីបានប្រគល់ដីការ ស្តីពី ប្រកាសតែងតាំងនិងប្រគល់ភារកិច្ចជូន ដល់មន្ត្រីទាំង១០រូបរួចមក.
លោកស្រី ចែម ធីដែនតំណាងមន្ត្រីដែលទើបតែងតាំងថ្មីបានប្តេជ្ញាចិត្តថា លោកស្រីនឹងយកអស់កម្លាំងកាយចិត្ត ចំណេះដឹង និងបទពិសោធន៍ការងារ ធ្វើយ៉ាងណាបម្រើប្រជាពលរដ្ឋប្រកបដោយទំនួលខុសត្រូវខ្ពស់ ខណៈមានទំនុកចិត្តពីថ្នាក់ដឹកនាំរដ្ឋបាលស្រុក។
លោកអ៊ុតវណ្ណារ៉ាបានមានប្រសាសន៍ ដោយសំដែងនូវការអបអរសាទរដល់មន្ត្រីរាជការរដ្ឋបាលស្រុកតែទើបតែងតាំងនិងប្រគល់ភារកិច្ចថ្មីនេះអោយទទួលបានជោគជ័យក្នុងការងារ។ លោកបន្តថា ការតែងតាំងនិងប្រគល់ភារកិច្ចថ្មីនេះ ដោយផ្អែកលើការចាំបាច់របស់រដ្ឋបាលស្រុក ដែលមានចន្លោះប្រហោងហើយត្រូវបំពេញបន្ថែមនៃការអនុវត្តការងាររដ្ឋបាលនៅក្នុងរចនាសម្ព័ន្ធផងដែរ។
លោកអភិបាលស្រុកបន្តថា មុននឹងមានការប្រកាសតែងតាំងនៅពេលនេះថ្នាក់ដឹកនាំស្រុកក៏បានវាយតម្លៃអំពីបុគ្គលម្នាក់ៗដោយមើលពីសមត្ថភាព អត្តចរិតនិងសីលធម៌គ្រប់ជ្រុងជ្រោយ ហើយថ្នាក់ដឹកនាំក៏មានការលើកទឹកចិត្តចំពោះថ្នាក់ដឹកនាំជាស្ត្រីដើម្បីឲ្យសាកសមនិងមានសមត្ថភាពក្នុងការដឹកនាំនៅការិយាល័យនិមួយៗ ដែលត្រូវបានបំពេញបន្ថែមនេះ។
លោកអុឹម ថនសមាជិកក្រុមប្រឹក្សាស្រុកបានណែនាំដល់មន្ត្រីដែលត្រូវតែងតាំងថ្មី ចាំបាច់គិតគូរដោះស្រាយរាល់បញ្ហាប្រឈមនានាដែលជាសេចក្តីត្រូវការចង់បាន និងបម្រើសេវាសាធារណៈជូនប្រជាពលរដ្ឋអោយបានលឿនឆាប់រហ័ស តម្លាភាព និងប្រកបដោយទំនុកចិត្ត ដើម្បីឆ្លើយតបនឹងគោលនយោបាយបញ្ចចកោណរបស់រាជរដ្ឋាភិបាល អាណត្តិទី៧ ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី។ អត្ថបទនិងរូបភាពដោយអ៊ុមញឹប
