(កំពង់ធំ)÷ កន្លងទៅថ្មីៗនេះនៅសាលដំបូង និងអយ្យការអមសាលាដំបូងខេត្តកំពង់ធំ ក្រោមអធិបតីភាពដ៏ខ្ពង់ខ្ពស់ ឯកឧត្តម ផូង វណ្ណ ប្រធានសាលាដំបូងខេត្តកំពង់ធំ និងឯកឧត្តម រស់ សារាំ ព្រះរាជអាជ្ញា នៃអយ្យការអមសាលាដំបូងខេត្តកំពង់ធំ បានរៀបចំកិច្ចប្រជុំផ្សព្វផ្សាយអំពីលទ្ធផល នៃកិច្ចប្រជុំបូកសរុបលទ្ធផលរយៈ
ពេល៩ខែ នៃយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ របស់ក្រសួងយុត្តិធម៌។
កិច្ចប្រជុំនេះមានការចូលរួមពីសំណាក់លោកអនុប្រធានសាលាដំបូង លោក-លោកស្រីព្រះរាជអាជ្ញារង លោក-លោកស្រីចៅក្រម លោកប្រធាន-អនុប្រធានលេខាធិការដ្ឋាន លោក-លោកស្រីក្រឡាបញ្ជី និងមន្រ្តីនៃលេខាធិការដ្ឋានរដ្ឋបាលទាំងអស់។
ឯកឧត្តមប្រធាន និងឯកឧត្តមព្រះរាជអាជ្ញា បានកោតសរសើរ និងថ្លែងអំណរគុណ ដល់លោក-លោកស្រីចៅក្រម លោក-លោកស្រីព្រះរាជអាជ្ញារង លោក-លោកស្រីក្រឡាបញ្ជី និងមន្រ្តីនៃលេខាធិការដ្ឋានរដ្ឋបាលសាលាដំបូងទាំងអស់ ចំពោះការខិតខំប្រឹងប្រែងបំពេញតួនាទី ភារកិច្ចរបស់ខ្លួន ធ្វើឱ្យសាលាដំបូង និងអយ្យការអមសាលាដំបូងខេត្តកំពង់ធំ ទទួលបានលទ្ធផលល្អ ក្នុងការអនុវត្តយុទ្ធនាការទាំងពីរខាងលើ។
ជាចុងក្រោយ ឯកឧត្តមប្រធាន និងឯកឧត្តមព្រះរាជអាជ្ញា បានលើកទឹកចិត្ត និងជម្រុញឱ្យបន្តខិតខំប្រឹងប្រែងបន្ថែមទៀត ដើម្បីទទួលបានលទ្ធផលកាន់តែល្អប្រសើរជាងមុន និងក្លាយទៅជាសាលាជម្រះក្តីឈានមុខគេក្នុងការអនុវត្តយុទ្ធនាការរបស់ក្រសួងយុត្តិធម៌។
