ដោយ គឹម សេង
ខេត្តស្វាយរៀង៖ ឯកឧត្ដម ម៉ែន វិបុល ប្រធានក្រុមប្រឹក្សាខេត្តស្វាយរៀង ឯកឧត្តម ប៉េង ពោធិ៍សា អភិបាលខេត្ត និងឯកឧត្តម សាមឺឌី ស៉ីវឌ្ឍនា រដ្ឋលេខាធិការក្រសួង អប់រំ យុវជន និងកីឡា បានអញ្ជេីញជាគណៈអធិបតីក្នុងពិធីរត់ភ្លើងគប់កីឡាជាតិលើកទី៤ និងកីឡាជនពិការលើកទី២ ឆ្នាំ២០២៤ ដែលបានប្រព្រឹត្តទៅនៅរង្វង់មូល
វិមានឯករាជ្យខេត្តស្វាយរៀង ព្រឹកថ្ងៃទី២៦ ខែតុលា ឆ្នាំ២០២៤នេះ។
ពិធីនេះមានការអញ្ជេីញចូលរួមពីឯកឧត្តម លោកជំទាវសមាជិកក្រុមប្រឹក្សាខេត្ត ឯកឧត្ដមអភិបាលរងខេត្ត លោកនាយក នាយករងរដ្ឋបាលសាលាខេត្ត កងកម្លាំងទាំង៣ និស្សិតសាកលវិទ្យាល័យស្វាយរៀង កីឡាករ កីឡាការិនី លោកនាយក នាយករង លោកគ្រូ អ្នកគ្រូ យុវជនកាកបាទក្រហម យុវជនកាយរិទ្ធ យុវជន.ស.ស.យ.ក សមាគមន៍អ្នកជិះកង់ ព្រមទាំងមន្ត្រីរាជការ និងប្រជាពលរដ្ឋ សរុបប្រមាណ២,០១៧នាក់ ។
ឯកឧត្តមអភិបាលខេត្តបានសម្តែងនូវអារម្មណ៍រីករាយ ដែលខេត្តស្វាយរៀងមានកិត្តិយសបានរៀបចំពិធីរត់ភ្លើងគប់កីឡាជាតិលើកទី៤ និងកីឡាជនពិការលើកទី២ ឆ្នាំ២០២៤ នៅថ្ងៃនេះ និងសូមចូលរួមអបអរសាទរចំពោះលោក លោកស្រី និងប្អូនៗកីឡាករ កីឡាការិនីទាំងអស់ក្នុងនាមតំណាងឲ្យខេត្តស្វាយរៀង ដែលនិងទៅចូលរួមក្នុងព្រឹត្តិការណ៍កីឡាកំពូលរបស់ជាតិនៅឆ្នាំនេះ ហេីយនេះជាភារកិច្ចដ៏មានសារៈសំខាន់ និងប្រកបដោយមោទនភាព ដែលអស់លោក លោកស្រី និងប្អូនៗកីឡាករ កីឡាការិនីទាំងអស់ ក្នុងនាមតំណាងឲ្យខេត្តស្វាយរៀង ត្រូវបំពេញ ដេីម្បីមុខមាត់ និងកិត្តិយសផ្ទាល់ខ្លួនផង អង្គភាពផង និងខេត្តទាំងមូលផង ។ 
ទន្ទឹមនេះ ឯកឧត្តមបានស្នេីដល់ប្អូនៗត្រូវខិតខំប្រឹងប្រែងប្រកួតឲ្យអស់ពីសមត្ថភាព ត្រូវប្រកាន់ឲ្យបានខ្ជាប់ខ្ជួននូវអនាម័យ ហូបស្អាត ផឹកស្អាត និងរស់នៅស្អាត ថែរក្សាសុខភាពឲ្យបានល្អ ពិសេសត្រូវអនុវត្តឲ្យបានម៉ឺងម៉ាត់ នូវវិន័យការងារ និងបទបញ្ជានៃការប្រកួត។
ឯកឧត្តមបន្ថែមថា ការចូលរួមរត់ភ្លេីងគប់ដ៏ច្រើនកុះករនៅថ្ងៃនេះសបញ្ជាក់ឱ្យឃើញថា ស្មារតីរួមរបស់មន្ត្រីរាជការ កីឡាករកីឡាការិនី និងបងប្អូនប្រជាពលរដ្ឋនៅក្នុងខេត្ត គឺស្រលាញ់ និងលើកស្ទួយវិស័យកីឡា ដើម្បីឈានដំណើរទៅការរៀបចំធ្វើជាម្ចាស់ផ្ទះព្រឹត្តិការណ៍កីឡាយុវជនអាស៊ី ឆ្នាំ២០២៩។
សំរាប់ខេត្តស្វាយរៀង បានចុះឈ្មោះចូលរួម ប្រកួតមាន ១៦ប្រភេទកីឡា និងប្រតិភូដឹកនាំមាន១៦នាក់ គ្រូបង្ហឹក៣៧នាក់ កីឡាករកីឡាការិនី១៧០នាក់(កីឡាករពិការ៤នាក់ និងកីឡាការិនី៧២នាក់)។
សូមរំលឹកថា ព្រឹត្តិការណ៍កីឡាជាតិលើកទី៤ និងកីឡាជាតិជនពិការ លើកទី២ នឹងចាប់ផ្តើមពីថ្ងៃទី២៩ ខែតុលា ដល់ថ្ងៃទី០៨ ខែវិច្ឆិកា ឆ្នាំ២០២៤៕
