កំពង់ចាម: ប្រជាពលរដ្ឋក្នុង ស្រុកស្ទឹងត្រង់ បានស្នើសុំការស្តារអាងទឹក ភ្លើងបំភ្លឺផ្លូវ សុំស្ពានឆ្លងស្ទឹង រួមនឹងបញ្ហាផ្សេងៗ ចំនួន ២១ករណី ក្នុងអង្គវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តកំពង់ចាម លើកទី១ អាណត្តិទី៤ នាព្រឹកថ្ងៃទី១០ ខែធ្នូ ឆ្នាំ២០២៤ នៅវត្តពោធិមង្គល (វត្តទួលព្រះឃ្លាំង) ស្ថិតក្នុងឃុំទួលព្រះឃ្លាំង ស្រុកស្ទឹងត្រង់ ក្រោមវត្តមាន ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ។
ក្នុងអង្គវេទិកានេះ តំណាងឯកឧត្តម អ៊ុន ចាន់ដា អភិបាលខេត្តកំពង់ចាម គឺឯកឧត្តម ស្រី សុភ័ក្ត្រ អភិបាលរងខេត្ត បានដឹកនាំការឆ្លើយតបភ្លាមៗ នូវសំណើរ សំណូមពរ និងកង្វល់ដែលប្រជាពលរដ្ឋលើកឡើង បាន មួយ ចំនួន ដោយឡែកករណីដែលនៅសេសសល់ ត្រូវបានទទួលយកទៅពិភាក្សា ដើម្បីដោះស្រាយទៅតាមប្រភេទរដ្ឋបាលនិមួយៗ នៅពេលក្រោយ រួមមាន ការស្នើសុំស្តារអាងទឹក និងទ្វារទឹក សុំបង្គោលអគ្គិសនី ភ្លើងបំភ្លឺផ្លូវ សុំផ្លូវធ្វើដំណើរ និងស្ពានឆ្លងស្ទឹង សុំថវិការ និង ឯកសណ្ឋានប្រជាការពារ សុំប័ណ្ណក្រីក្រ បញ្ហាដាំដេីមឈូកក្នុងបឹង និងបទល្មើសឆក់ត្រីក្នុងបឹងធម្មជាតិ បញ្ហាបង់ប្រាក់សេវាអគ្គិសនី និងប្រព័ន្ធទឹកស្អាត បញ្ហាលក់ដីតែទទួលប្រាក់មិនគ្រប់ចំនួន ធ្វើប្លង់ដីរួចតែមិនទាន់បានទទួល បញ្ហាចង់លក់ដីតែមន្ត្រីមិនចុះវាស់វែង បញ្ជាបិទផ្លូវមិនឱ្យចេញចូល និងការខ្វះខាតថវិការឱ្យកូនរៀនសូត្រ ។ ល។
ក្នុងឱកាសនោះដែរ ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម បានគូសបញ្ជាក់ថា ក្នុងវេទិកាផ្សព្វផ្សាយ និងពិគ្រោះយោបល់ យើងទាំងអស់គ្នា បានពិភាក្សា ពិគ្រោះយោបល់ ជាមួយអ្នកចូលរួមទាំងអស់ បានរកឃើញនូវបញ្ហាអាទិភាពសំខាន់ៗសម្រាប់ រដ្ឋបាលខេត្តយកទៅពិនិត្យ ពិចារណាក្នុងការឆ្លើយតប ដើម្បីលើកកម្ពស់ជីវភាពរស់នៅ របស់ប្រជាពលរដ្ឋក្នុងខេត្ត ជាពិសេសពង្រឹងការចូលរួមរបស់ប្រជាពលរដ្ឋ និងអង្គការសង្គមស៊ីវិល ក្នុងកិច្ចអភិវឌ្ឍន៍ខេត្តឱ្យកាន់តែល្អប្រសើរឡើង ក្នុងគោលបំណងពង្រឹងយន្តការ តម្លាភាព ព្រមទាំងលើកកម្ពស់គោលការណ៍អភិវឌ្ឍន៍តាមបែបប្រជាធិបតេយ្យ នៅថ្នាក់ក្រោមជាតិ ៕
