ខេត្តកំពង់ធំ៖ នៅរសៀលថ្ងៃទី១៦ ខែធ្នូ ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ បានដឹកនាំក៏កម្លាំងផ្នែកសឹករងស្ទឹងសែន ចាក់បេតុងកែលម្អសោភ័ណភាពក្នុងបរិវេណវិមានរំលឹកគុណយុទ្ធជនពលី ដោយសារសង្គ្រាម ដើម្បីត្រៀមចូល
រួមអបអរសាទរខួបលើកទី ៤៦ ទិវាបុណ្យជាតិ( ៧មករា ឆ្នាំ១៩៧៩ ៧មករា ឆ្នាំ២០២៤) ដែលពិធីនេះប្រព្រឹត្តទៅនៅវិមានរំលឹកគុណយុទ្ធជនពលី នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ស្ថិតនៅក្នុងសង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។
លោកអនុសេនីយ៍ឯក ហែម ថន មេបញ្ជាការរង តំណាងលោកវរសេនីយ៍ទោ សៀង ហុកឃាន់ មេបញ្ជាការផ្នែកសឹករងស្ទឹងសែន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានរាយការណ៍បញ្ជាក់ថា គម្រោងដែលត្រូវចាក់បេតុងបន្ថែមនៅពេលនេះគឺមានទំហំ ១,១៧០ ម៉ែត្រការ៉េ ដោយរៀបចំបាតក្រោមក្រាលឫស្សី និងថ្មប្រភេទ០,១សង់ទីម៉ែត្រ គុណ និង០,២ សង់ទីម៉ែត្រ មានកម្រាស់ ៥០សង់ទីម៉ែត្រ ដើម្បីកែលម្អសោភ័ណភាពក្នុងបរិវេណវិមានរំលឹកគុណយុទ្ធជនពលី ដោយសារសង្គ្រាម នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ។
ឧត្តមសេនីយ៍ទោ សោម ស៊ុន បានគូសបញ្ជាក់ថា កន្លងមកនេះសម្ដេចមហាបវរធិបតី ហ៊ុន ម៉ាណែត កាលលោកនៅជាមេបញ្ជាការកងទ័ពជើងគោក លោកបានជួយឧបត្ថម្ភរៀបចំបេតុងគ្របផ្នូរសព និងចាក់បេតុងក្នុងបរិវេណផ្នូរសពឱ្យមានសោភ័ណភាព ដើម្បីជាទីគោរពសក្ការៈ និងជាការដឹងគុណដល់វិញ្ញាណក្ខន្ធកម្មាភិបាលយុទ្ធជន យុទ្ធនារី ដែលបានពលីជីវិត ដើម្បីបុព្វហេតុជាតិ និងប្រជាជន។
ឧត្តមសេនីយ៍ទោ សោម ស៊ុន បានណែនាំដល់កងកម្លាំងទាំងអស់ ត្រូវរៀបចំសម្ភារៈគ្រឿងសំណង់ ដែលត្រូវចាក់បេតុងឲ្យបានស្របតាមលក្ខណៈបច្ចេកទេសដើម្បីមានគុណភាពល្អ មានសោភ័ណភាព ត្រៀមរៀបចំពិធីមិទិ្ទញរំលឹកខួបអនុស្សាវរីយ៍លើកទី ៤៦ឆ្នាំ នៃទិវាបុណ្យជាតិ ៧មករា ដែលនឹងឈានចូលមកដល់នៅពេលដ៍ខ្លីខាងមុខនេះ។ ជាមួយនោះដែរមេបញ្ជាការតំបន់ប្រតិបត្តិការសឹករងកំពង់ធំ ក៏បានថ្លែងនូវការគោរពដឹងគុណចំពោះវិញ្ញាណក្ខន្ធកម្មាភិបាលយុទ្ធជនយុទ្ធនារី ដែលបានពលីជីវិតក្នុងសម័យសង្គ្រាម រួមចំណែកជាមួយសម្ដេចអគ្គមហាសេនាបតីតេជោ ហ៊ុន សែន ចូលរួមអនុវត្តនូវនយោបាយឈ្នះឈ្នះ នាំមកនូវសុខសន្តិភាព និងការឯកភាពជាតិពេញលេញ ដូចសព្វថ្ងៃនេះ និងសូមគោរពបួងសួងដល់វិញ្ញាណក្ខន្ធពួកគាត់បានទៅកាន់សុគតិភពកុំបីឃ្លៀងឃ្លាតឡើយ៕
