សៀមរាប៖ សហភាពសហគមន៍កសិកម្មកំពង់ធំតេជៈមានជ័យ បានប្រារព្ធធ្វើមហាសន្និបាតប្រចាំឆ្នាំ២០២៤ និង លើកទិសដៅអនុវត្តបន្តឆ្នាំ២០២៥ របស់ខ្លួន ក្រោមវត្តមានរបស់លោក ខោល ម៉ានី ប្រធានការយាល័យសាវនកម្មសហគមន៍កសិកម្ម នៃនាយកដ្ឋាន អភិវឌ្ឍន៍សហគមន៍កសិកម្ម នៃក្រសួងកសិកម្ម រុក្ខាប្រមាញ់ និង
នេសាទ និង លោកឧកញ៉ា ហង់ សុគន្ធ ប្រធានក្រុម ប្រឹក្សាភិបាល នៃសហភាពសហគមន៍កសិកម្មកំពង់ធំតេជៈមានជ័យ ដោយមានការអញ្ជើញចូលរួមពីអស់លោក លោកស្រីជាអាជ្ញាធរមូលដ្ឋានក្រុង ស្រុក ខេត្តសៀមរាប និង កំពង់ធំ ក្រុមហ៊ុនដៃគូរជាតិ អន្តរជាតិ ព្រមទាំងសមាជិក សមាជិកាសហភាពសហគមន៍កសិកម្មកំពង់ធំតេជៈមានជ័យ និង អ្នកពាក់ព័ន្ធប្រមាណជា ៣០០នាក់ចូលរួម នៅព្រឹកថ្ងៃទី ២៦ ខែ មីនា ឆ្នាំ២០២៥។
ឆ្លងតាមការធ្វើបទបង្ហាញអំពីរបាយការណ៍សកម្មភាពសង្ខេប ដែលសហគមន៍កសិកម្មសម្រេចបាន ក្នុងឆ្នាំ ២០២៤ ព្រមទាំងផែនការអាជីវកម្ម និងមុខរបរ របស់សហគមន៍ មាន ទិញ-លក់បន្លែសុវត្ថិភាព សម្រាប់ផ្គត់ផ្គង់ទីផ្សារតាមកិច្ចសន្យា លក់ធាតុចូលកសិកម្ម (ជី ថ្នាំ ពូជ អង្ករ) និងការធ្វើឥណទានសាច់ប្រាក់ (ឥណទានកសិកម្ម) ។ សម្រាប់ផែនការក្នុងឆ្នាំ២០២៥នេះ សហគមន៍គ្រោងថវិកាបន្តអាជីវកម្ម របស់ខ្លួន និង ស្វែងរកដៃគូរ ទីផ្សារជូនដល់កសិករទៀតផង ។
មានប្រសាសន៍នោះដែរលោក ខោល ម៉ានី បានគូសបញ្ជាក់ថា មហាសន្និបាតនាថ្ងៃនេះ ជាឱកាសដ៏មានតម្លៃ សម្រាប់បងប្អូនមកពី ២៥ សហគមន៍ នៃខេត្តសៀមរាប និង ខេត្តកំពង់ធំ ដើម្បីបង្ហាញលទ្ធផលការងារលើវិស័យ កសិកម្ម ពិសេសភាពខ្លាំងក្នុងការអនុវត្តផលិតកម្មកសិកម្ម តាមកិច្ចសន្យាស្ដីពីការផលិត និងផ្គត់ផ្គង់ស្រូវសរីរាង្គដែលសម្រេច បាន ក្នុងឆ្នាំ២០២៤ និងលើកទិសដៅ ផែនការការងារសម្រាប់ឆ្នាំ២០២៥ ។ លោកបានលើកឡើងថា សូម អង្គសន្និបាតទាំងមូល ត្រូវផ្តោតទៅលើការងារផ្គត់ផ្គង់ទៅកសិកម្ម និង ការប្រើប្រាស់សេវាកម្មរួមគ្នា និង ពាក់ព័ន្ធទៅនឹងធនធានចូលទៅកសិកម្ម ។ លោកក៏បានគូសបញ្ជាក់ទៀតថា សហភាពសហគមន៍ដែលរឹងមាំទៅបាន គឺអាស្រ័យ ដោយគណៈកម្មការគ្រប់គ្រងផងដែរ ។ នៅពេលនេះសហភាពសហគមន៍នៅមិនទាន់មានចំណូល និង ចំណាយក៏ពិតមែន ក៏គណៈកម្មការ បានធ្វើការគាំទ្រសហគមន៍ផងដែរ ។ ម៉្យាងទៀគណៈកម្មការក៏ត្រូវពឹងផ្អែកទៅលើបទបញ្ជាផ្ទៃក្នុងរបស់ខ្លួន ដើមី្បធានាបាននូវគុណភាពនៃការដឹកនាំសហគមន៍ ។ លោកបានបញ្ជាក់ផងដែរថា ចំពោះមុខរបរ សំខាន់ៗ របស់សហគមន៍កសិកម្មមាន មុខរបរ ឥណទានកសិកម្មខ្នាតតូច ទីផ្សារទិញលក់ កសិផលមាន . ស្រូវ ដំឡូងមី និងស្វាយចន្ទី ព្រមទាំងមុខរបរសេវាកម្មដូចជា ត្រាក់ទ័រភ្ជួរដី ម៉ាស៊ីនច្រូតស្រូវ ម៉ាស៊ីនបោកស្រូវ និងមុខរបរ កិនស្រូវ លក់អង្ករ កែច្នៃគ្រាប់ចន្ទី និងមុខរបរផ្គត់ផ្គង់ទឹកស្អាតដល់សមាជិក ជាដើម។
មានប្រសាសន៍នោះដែរ លោកឧកញ៉ា ហង់ សុគន្ធ ប្រធានក្រុមប្រឹក្សាភិបាល នៃសហភាពសហគមន៍កសិកម្ម កំពង់ធំតេជៈមានជ័យ បានលើកឡើងថា សហភាពសហគមន៍កសិកម្ម កំពង់ធំតេជៈមានជ័យ បានបង្កើតឡើងរយៈពេល៣ឆ្នាំមកហើយ ថ្ងៃនេះបងប្អូនកសិករយើង ដែលបានចូលរួម ក្នុងការបង្ហានូវឆន្ទះដ៏ថ្លៃថ្លា ក្នុងការបំពេញភាកិច្ច ជាមួយសហភាពសហគមន៍កំពង់ធំតេជៈមានជ័យ ដោយមានទឹកចិត្តចេញពីបេះដូងទៀតផង ។ លោកឧកញ៉ាបានធ្វើការបញ្ជាក់ថា ការបង្កើតសហភាពសហគមន៍កំពង់ធំតេជៈមានជ័យ ដោយមានការចូលរួមពីសហគមន៍ផលិតស្រូវ ២៥សហគមន៍ ហើយកិច្ចការនេះបានដំណើរការទៅបានល្អ ធ្វើឲ្យសហភាពសហគមន៍បានបោះជំហាននឹងទៅបង្កើតជាសហភាពស្រូវ អង្ករកម្ពុជា ។ នៅពេលបង្កើតបានហេដ្ឋារចនាសម្ព័ន្ធនោះហើយ ភាពចាំបាច់គឺត្រូវមានកិច្ចសន្យាផលិតកម្ម ដើមី្បភាពជោគជ័យលើវិស័យសហគមន៍ វិស័យកសិករ កត្តាសំខាន់នោះលើកិច្ចសន្យាផលិតកម្ម ។ លោកឧកញ៉ាបានលើកឡើងថា បច្ចុប្បន្នរាជរដ្ឋាភិបាល និង ក្រសួងកសិកម្ម បានបង្កើតសហគមន៍ទំនើប ព្រមទាំងឲ្យមានកសិកម្មឃុំ សង្កាត់ ដើមី្បបង្កើនតម្លៃលក់ឲ្យបានខ្ពស់ ក្នុងការកាត់បន្ថយថ្លៃដើម ទើបធ្វើឲ្យសហគមន៍មានការរីកចម្រើន ។ ក្នុងករណីនេះដែរ ការកាត់បន្ថយថ្លៃដើមដែលពាក់ព័ន្ធ ធាតុចូលកសិកម្ម មាន(ជី , ថ្នាំ , ពូជ )ជាដើម ។ ដើមី្បភាពជោគជ័យ យើងរួមគ្នាបង្កើតផលិតកម្មរួម ដែលមានការចូលរួមពីក្រុមហ៊ុនជាតិ អន្តរជាតិជាដៃគូរ ព្រមទាំងរួមគ្នាធ្វើ រួមគ្នាគិត ធ្វើឲ្យសហគមន៍នីមួយៗដំណើរការទៅបានល្អប្រសើរ ។ លោកឧកញ៉ា បានផ្ដាំផ្ញើដល់សហភាពសហគមន៍នៃខេត្តទាំងពីរ ត្រូវបន្តពង្រឹងស្មារតីសាមគ្គីភាព ឯកភាពផ្ទៃក្នុងរបស់ខ្លួនឲ្យបានល្អប្រសើរ ធ្វើយ៉ាងណាសម្រេចឲ្យបាននូវ ផែនការអាជីវកម្មរបស់ខ្លួនឲ្យរឹងមាំ ប្រកបដោយតម្លាភាព គណនេយ្យភាព និងមានការចូលរួមពីសមាជិកទាំងអស់ ដើម្បីរួមចំណែក ក្នុងការដោះស្រាយបញ្ហាប្រឈមលើផលិតភាព គុណភាព សុវត្ថិភាព និងបញ្ហាទីផ្សារជាដើម ៕
