(កំពង់ធំ): ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម ជាប្រធានក្រុមការងារចុះមូលដ្ឋានស្រុកស្ទោង បានលើកឡើងថា មានតែគណបក្សប្រជាជនមួយទេ ដែលតែងតែនិងរួមរស់ជាមួយប្រជាជនគ្រប់កាលៈទេសៈ ឯកឧត្តមបានថ្លែងដូច្នេះនៅក្នុងឱកាសដែលឯកឧត្តម និងសហការីព្រមទាំងអាជ្ញាធរស្រុកស្ទោង
បានអញ្ជើញជាអធិបតីភាពក្នុងពិធីសម្ពោធកាត់ខ្សែបូដាក់ឱ្យប្រើប្រាស់អគារស្នាក់ការគណបក្សប្រជាជនកម្ពុជាឃុំពពក និងសមិទ្ធផលនានា កាលពីព្រឹកថ្ងៃទី២១ ខែមិថុនាឆ្នាំ ២០២៥។
ឯកឧត្តមបានបន្ថែមថា ទីណាមានគណបក្សប្រជាជនកម្ពុជានិងសម្ដេចអគ្គមហាសេនាបតីតេជោ ហ៊ុន សែន ជាប្រធានគណបក្ស រួមជាមួយនឹងសម្ដេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាល នៃព្រះរាជាណាចក្រកម្ពុជា ទីនោះនឹងមានការអភិវឌ្ឍឥតឈប់ឈរ ជាក់ស្ដែងសម្រាប់ខេត្តកំពង់ធំគឺសមិទ្ធផលទំនប់ស្ទាក់ទឹកកំពង់គោ និងទំនប់ស្ទាក់ទឹកដងកាំបិតតាមបណ្ដោយស្ទឹងសែន ព្រមទាំងសមិទ្ធផលនិងហេដ្ឋារចនាសម្ព័ន្ធក៏ដូចជាប្រព័ន្ធធារាសាស្ត្រស្អេកស្កះជាច្រើនទៀត ដែលស្រោចស្រពស្រែស្រូវរាប់ម៉ឺនហិចតាហើយប្រជាជននៅក្នុងខេត្តកំពង់ធំ និងស្រុកស្ទោងបានឃើញនិងបានកំពុងប្រើប្រាស់ជារួម ។
លើសពីនេះឯកឧត្តមបានសង្កត់ធ្ងន់ថា ស្នាក់ការគណបក្សប្រជាជនដែលសម្ពោធនៅក្នុងឱកាសនេះក៏ដូចជាស្នាក់ការនៅតាមបណ្ដាឃុំផ្សេងៗទៀតនិងស្នាក់ការគណបក្សស្រុកស្ទោងនឹងជួយបង្កើននូវគុណភាពប្រសិទ្ធភាពការងាររបស់គណបក្សក៏ដូចជាអាចជូនដល់ពុកម៉ែបងប្អូនប្រជាពលរដ្ឋនៅក្នុងមូលដ្ឋានបានប្រើប្រាស់ទៅតាមស្ថានភាពចាំបាច់និងជាក់ស្តែងផងដែរ។
សូមបញ្ជាក់ថា អគារស្នាក់ការគណបក្សដែលកាត់ខ្សែបូសម្ពោធដាក់ឱ្យប្រើប្រាស់នៅពេលនេះមានទំហំ១៤ម៉ែត្រគុណនឹង១០,៥ត្រ រួមជាមួយនឹងសមិទ្ធផលផ្សេងៗទៀតជាច្រើន។
