ភ្នំពេញ៖ ជនសង្ស័យ ចំនួន ០៣នាក់ ត្រូវបាននគរបាលខណ្ឌទួលគោក ធ្វើការចាប់ឃាត់ខ្លួន ក្នុងនោះមានស្រីម្នាក់ បន្ទាប់ពីជនសង្ស័យ ទាំងនេះ បានធ្វើសកម្មភាពវាយប្លន់យកម៉ូតូម៉ាក ស្កុបពី ពណ៌ខ្មៅ ស៊េរីឆ្នាំ២០១១ គ្មានស្លាកលេខ នៅលើដងផ្លូវ ចំណុចមុខផ្ទះលេខ ១៤Eoផ្លូវលេខ ១១៤ កែងផ្លូវ ៥១ ក្នុងភូមិ១០ សង្កាត់ផ្សារថ្មីទី១ ខណ្ឌដូនពេញ កាលពីវេលាម៉ោង ២៣ និងសូន្យនាទី យប់ថៃ្ងទី៨ ខែមីនា ឆ្នាំ២០១៤ ។
ការចាប់ឃាត់ខ្លួនជនសង្ស័យទាំង ៣នាក់នេះបានធ្វើឡើងកាលពីវេលាម៉ោង ១៣ និងសូន្យនាទី ថៃ្ងទី១១ ខែមីនា ឆ្នាំ២០១៤ នៅចំណុចផ្លូវលេខ ១៦៨ ក្រុមទី៣ ភូមិ២ សង្កាត់ទឹកល្អកទី៣ ខណ្ឌទួលគោក ។ ជនសង្ស័យទាំង៣នាក់ ដែលសមត្ថកិច្ចនគរបាលខណ្ឌទួលគោក ធ្វើការចាប់ឃាត់ខ្លួនបាន ទី១មានឈ្មោះ សន សត្យាត្រាពេជ្រ ភេទប្រុស អាយុ១៩ឆ្នាំមានមុខរបរមិនពិតប្រាកដ ស្នាក់នៅផ្ទះគ្មានលេខ ផ្លូវលំ ក្នុងភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិសែនជ័យ ។ ជនសង្ស័យទី២មានឈ្មោះ រឿន ដា ភេទប្រុសអាយុ ១៨ឆ្នាំ មានមុខរបរមិនពិតប្រាកដ ស្នាក់នៅបន្ទប់ជួលលេខ៣ ក្នុងផ្ទះសំណាក់ បុប្ឆា ម្តុំបឹងកក់ សង្កាត់ស្រះចក ។
និងជនសង្ស័យម្នាក់ទៀតមានឈ្មោះ ហង់ ស្រីពៅ ភេទស្រី អាយុ២៤ឆ្នាំ មានមុខរបរជាអ្នករកស៊ីផ្លូវភេទ ម្តុំវត្តភ្នំ ស្នាក់នៅបន្ទប់ជួលលេខ៣ ក្នុងផ្ទះសំណាក់ បុប្ឆា ម្តុំបឹងកក់ សង្កាត់ស្រះចក ។ ចំណែកជនរងគ្រោះជាម្ចាស់ម៉ូតូម៉ាក ស្កុបពី ពណ៌ខ្មៅ ស៊េរីឆ្នាំ២០១១ គ្មានស្លាកលេខ មានឈ្មោះ រុន ផល្លា ភេទប្រុស អាយុ២៣ឆ្នាំ មានមុខរបរជាងភ្លើង ស្នាក់នៅផ្ទះជួលលេខ០៩៣ ផ្លូវលេខ៧០ ភូមិទួលសង្កែ សង្កាត់ទួលសង្កែ ខណ្ឌឬស្សីកែវ ។
សមត្ថកិច្ចនគរបាលខណ្ឌទួលគោកបានឲ្យដឹងថា នៅយប់ថៃ្ងកើតហេតុ ខាងលើ ជនរងគ្រោះបានជិះម៉ូតូម៉ាក ស្កុបពីរបស់ខ្លួន មករកសេវាផ្លូវភេទ ហើយកក៏មានទំនាក់ទំនងគ្នាជាមួយជនសង្ស័យឈ្មោះ ហង់ ស្រីពៅ ដែលកំពុងប្រើប្រាស់រូបភាពការឈទាក់ម៉ូយនៅម្តុំផ្លូវលេខ ៧០ ពេលដែលជនរងគ្រោះ និងនារីដែលជាជនសង្ស័យបានទាក់ទងគ្នារួច ជនសង្ស័យឈ្មោះ ហង់ ស្រីពៅ បានសុំជនរងគ្រោះបើកម៉ូតូហើយក៏ឈប់នៅចំណុចកើតហេតុ ពេលនោះស្រាប់តែមានជនសង្ស័យចំនួន ០២នាក់ទៀត បានដើរមករករឿង ជនរងគ្រោះ ដោយបានចោទទៅលើជនរងគ្រោះថា ជនរងគ្រោះទាក់ទងជាមួយសង្សាររបស់រូបគេ ដែលជាជនសង្ស័យ ហើយជនសង្ស័យទាំង២នាក់បាននាំគ្នាព្រួតដេញវាយជនរងគ្រោះ ពេលនោះជនរងគ្រោះបានរត់ចេញពីម៉ូតូ ទើបជនសង្ស័យឈ្មោះ ហង់ ស្រីពៅ បានយកម៉ូតូរបស់ជនរងគ្រោះឌុបបក្សពួក ទាំង៣នាក់ រត់គេចខ្លួនតែម្តង ក្រោយពីធ្វើសកម្មភាពវាយប្លន់ទៅលើជនរងគ្រោះរួចមក ក្រុមជនសង្ស័យបានជិះម៉ូតូមកគេចខ្លួនព្រមទាំងដោះស្លាកលេខម៉ូតូចេញ ។
សមត្ថកិច្ចបានបន្តថា លុះមកដល់ថៃ្ងទី១១ ខែមីនា វេលាម៉ោង ១៣ និងសូន្យនាទី ជនសង្ស័យទាំង៣នាក់ បានជិះម៉ូតូរបស់ជនរងគ្រោះដែលប្លន់បាននៅថៃ្ងកើតហេតុខាងលើ ជិះតាមបណ្តោយផ្លូវលេខ ១៨៦ ក៏ត្រូវបានកម្លាំងនគរបាលប៉ុស្ត៏ទឹកល្អក់ទី៣ កំពុងដើរល្បាតការពារសុវត្ថិភាពក្នុងមូលដ្ឋាន បានឃើញចាប់ធ្វើការឃាត់ខ្លួនបានតែម្តង។ បច្ចុប្បន្នជនសង្ស័យទាំង៣នាក់ខាងលើ ត្រូវបានឃុំខ្លួនបណ្តោះអាសន្ននៅអធិការរដ្ឋាននគរបាលខណ្ឌទួលគោក ដើម្បីកសាងសំណុំរឿងបញ្ជូនខ្លួនជនសង្ស័យទាំង ៣នាក់ ទៅកាន់សាលាដំបូងរាជធានីភ្នំពេញ ចាត់ការតាមផ្លូវច្បាប់ ៕ 
