ខេត្តព្រះសីហនុ កាលពីថ្ងៃទី២០ ខែវិច្ឆិកា ឆ្នាំ២០១៤ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ធ្វើការផ្សព្វផ្សាយច្បាប់ស្តីពីព្រៃឈើ នៅស្រុកព្រៃនប់ ដោយមានការចូលរួមពីប្រធាន អនុប្រធានមន្ទីរ អង្គភាពជុំវិញខេត្ត កងកម្លាំងប្រដាប់អាវុធ ក្រុមប្រឹក្សាភូមិ ឃុំ លោកគ្រូ
អ្នកគ្រូ សិស្សានុសិស្ស និងប្រជាពលរដ្ឋ ។ ដោយមានការអញ្ជើញចូលរួមពីឯកឧត្តម ស៊ុំ រុំ អនុរដ្ឋលេខាធិការ និងជាតំណាងដ៌ខ្ពង់ខ្ពស់លោកជំទាវឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភានិងអធិការកិច្ច ។
ឯកឧត្តម ស៊ុំ រុំ បានមានប្រសាសន៌សំណេះសំណាល កោតសរសើរការខិតខំយកអស់កម្លាំងកាយចិត្តក្នុងការរៀបចំផ្សព្វផ្សាយច្បាប់ស្ទីពីព្រៃឈើ ក្នុងគោលបំណងស្វែងយល់កាន់តែច្បាស់អំពីសិទ្ធិ និងករណីកិច្ចរបស់ខ្លួន ដើម្បីអនុវត្តបន្តនូវច្បាប់ប្រកបដោយប្រសិទ្ធភាព និងឆ្លុះបញ្ចាំងឪ្យឃើញពីការបេជ្ញាចិត្តដ៌មុតមាំក្នុងការចូលរួមចំណែក ការពារធនធានព្រៃឈើប្រកបដោយនិរន្តរភាពនៅក្នុងព្រះរាជាណាចក្រកម្ពុជា ដើម្បីឆ្លើយតបទៅនឹងកម្មវិធីនយោបាយរបស់រាជរដ្ឋាភិបាលកម្ពុជានីតិកាលទី៥ នៃរដ្ឋសភា ដែលបានផ្តោតការយកចិត្តទុកដាក់ជាសំខាន់លើការធានាឪ្យបាននូវការគ្រប់គ្រងព្រៃឈើប្រកបដោយចីរភាព តាមរយះការបង្កើតឡើងនូវគោលនយោបាយគ្រប់គ្រងព្រៃឈើ និងអនុវត្តកម្មវិធីអភិវឌ្ឍន៌សហគមន៌ព្រៃឈើមួយរឹងមាំ មានតម្លាភាព ព្រមទាំងមានការគ្រប់គ្រងដោយផ្ទាល់របស់អាជ្ញាធរ និងប្រជាពលរដ្ឋនៅក្នុងតំបន់ ។
ឯកឧត្តម មានប្រសាសន៌បន្តថា ព្រៃឈើជាសម្បត្តិមានតម្លៃមិនអាចកាត់ថ្លៃបានហើយជាផ្នែកមួយសំខាន់ក្នុងការផ្តល់ជាចំណូលសម្រាប់កិច្ចអភិវឌ្ឍន៌សេដ្ឋកិច្ចជាតិ ឪ្យទទួលបានការរីកចំ រើន ពិសេសជាងនេះទៀត ព្រៃឈើជាធនធានមួយយ៉ាងសំខាន់បំផុតសម្រាប់ជីវិតមនុស្ស សត្វ ជីវសាស្ត្រចម្រុះ និងធ្វើឪ្យមានលំនឹងធម្មជាតិ ។ ព្រៃឈើជាដំបូលធមជាតិ ក្នុងការការពារស្រទាប់ផែនដី ហើយក៌មានតួនាទីសំខាន់ផងដែរក្នុងការធ្វើសំយោគជាមួយកាំរស្មីព្រះអាទិត្យ និងស្រូបយកនូវឧស្មន័កាបូនិច និងជាតិពុល ។
ការបាត់បង់ព្រៃឈើនិងធ្វើឪ្យផែនដីក្លាយជាវាលហោឋាន មានន័យស្មើនឹងបាត់បង់សត្វលោក រួមទាំងមនុស្សផងដែរ ព្រោះព្រៃឈើគឺជាជម្រក ជាប្រភពចំណី និងជាប្រភពឪសថសម្រាប់មនុស្ស សត្វគ្រប់ប្រភេទ ព្រមទាំងជារនាំងធម្មជាតិសម្រាប់ទប់ទល់នឹងខ្សល់ព្យុះផងដែរ ។ កន្លងមកមានការខិតខំប្រឹងប្រែងពីសមត្ថកិច្ច អាជ្ញាធរ ក្នុងការទប់ស្កាត់យ៉ាងណាក្តី ក៌យើងនៅតែសង្កេតឃើញមានសកម្មភាពបំភ្លិចបំផ្លាញព្រៃឈើរបស់មនុស្សមួយចំនួន ដូចជាការទន្ទ្រានយកដីព្រៃធ្វើជាស្រែចំការ កាចាប់ដីយកមកធ្វើជាកម្មសិទ្ធិឯកជនដោយខុសច្បាប់ ជាហេតុធ្វើឪ្យព្រៃឈើធ្លាក់ចុះគួរឪ្យព្រួយបារម្មណ៌ ។
ដោយមើលឃើញភាពហិនហោចនៃធនធានព្រៃឈើ រាជរដ្ឋាភិបាលដឹកនាំដោយសម្តេចអគ្គមហាសេនាបតីតេជោ ហ៊ុន សែន បានធ្វើការកែទម្រង់វិស័យព្រៃឈើជាបន្តបន្ទាប់តាមរយះការបង្កើតឡើងនូវយន្តការជាច្រើន ពិសេសយន្តការច្បាប់ លិខិតបទដ្ឋានគតិយុត្តិនានាសំដៅការពារ ដកហូត ដាំបន្ថែម និងគ្រប់គ្រងអាជីវកម្មដីសម្បទានព្រៃឈើ ព្រមទាំងទប់ស្កាត់បទល្មើសព្រៃឈើនានា ដើម្បីរួមចំណែកថែរក្សា ការពារព្រៃឈើឪ្យបានគង់វង្សទុកជាកេរ្ត៍មរតកដល់កូនចៅជំនាន់ក្រោយទៀត ។
ឯកឧត្តម ក៌បានសំណូមពរដល់អាជ្ញាធរបន្តផ្សព្វផ្សាយច្បាប់ស្តីពីព្រៃឈើដល់ប្រជាពលរដ្ឋ ឪ្យបានយល់ដឹងអំពីច្បាប់ និងសារះសំខាន់នៃព្រៃឈើ ព្រោះកង្វះខាតនៃការយល់ដឹងអាចជាប្រភពនៃការប្រព្រឹត្តបទល្មើសការកាប់បំផ្លាញព្រៃឈើជាដើមនៅតាមមូលដ្ឋាន ៕
