សៀមរាប ៖ កាលពីថ្ងៃទី២៥ ខែវិច្ឆិកា ឆ្នាំ២០១៤ នៅរដ្ឋបាលសាលាខេត្តសៀមរាប មានធ្វើកិច្ចប្រជុំពិភាក្សាដោះស្រាយករណីវិវាទការងាររួម រវាងវិយោជក និង និយោជិកនៅព្រលានយន្តហោះអន្តរជាតិសៀមរាប ក្រោមការដឹកនាំសម្រប សម្រួលរបស់ឯ.ឧ ឃឹម ប៊ុនសុង អភិបាលនៃគណៈ
អភិបាលខេត្តសៀមរាប និង វត្តមានរបស់ឯ.ឧ សយ សុខាន់ អនុរដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិល ព្រមទាំងអស់លោក លោកស្រីថ្នាក់ដឹកនាំមន្ទីរ អង្គភាពមានការពាក់ព័ន្ធ អាជ្ញាធរក្រុង តំណាងក្រុមហ៊ុន និង សហជីពផងដែរ ។
បន្ទាប់ពីឯ.ឧ ឃឹម ប៊ុនសុង និង ឯ.ឧ សយ សុខាន់ ធ្វើការបើកកិច្ចប្រជុំរួចមក ខាងវិយោជក និង វិយោជិត ក៏បានលើកនូវចំណុចមួយចំនួន ដែលបង្កឲ្យក្រុមហ៊ុន និង បុគ្គលិកមានវិវាទរាំរ៉ៃរវាងគ្នា ដោយភាគីសហជីព ដែលមានលោក រ៉ន រ៉ាវ៉ាន់ប្រធានសហជីពកម្មករឧស្សាហកម្មទេសចរណ៍កម្ពុជានៃព្រលានយន្តហោះ អន្តរជាតិសៀមរាប បានបញ្ជាក់ថា ចំពោះក្រុមហ៊ុនបាននូវតែចាំចាប់កំហុសរបស់បុគ្គលិក ដែលមានការខុសឆ្គង ហើយក៏មិនបានធ្វើការណែនាំ ថែបានធ្វើការបញ្ឈប់ការទៅលើបុគ្គលិកនោះ ហើយដោយយកបុគ្គលិកពីខាងក្រៅមកធ្វើការជំនួសវិញការងារនោះ ។
ក្នុងនោះក៏ខាងសហជីព លើកឡើងពីការរើសអើងចំពោះបុគ្គលិក ការមិនលើកទឹកចិត្តដល់បុគ្គលិកបម្រើការ ងារ ព្រមទាំងបានលើកសំណូមមួយចំនួន ដល់ក្រុមហ៊ុនឲ្យអនុវត្តទៅលើចំណុចទាំង០៧ ដែលសហជីពបានលើកឡើង ដើម្បីបញ្ចប់នូវវិវាទដ៏រ៉ាំរ៉ៃនេះ ។
ក្នុងនោះសំណូមពររបស់សហជីព គឺសុំឲ្យក្រុមហ៊ុនកុំកាត់ប្រាក់បុគ្គលិក ដែល ចេញមកធ្វើកូដកម្ម និង ឲ្យចូលបម្រើការងារធម្មតាវិញ , រាល់កិច្ចការដែលពុំទាន់បានដោះស្រាយនិងព្រមព្រៀងគ្នានោះ សុំឲ្យបន្តការអនុវត្តបន្តទៀត និង សុំឲ្យទទួលបុគ្គលិកឈ្មោះ លេង ពិសិដ្ឋ ឲ្យចូលបំរើការងារវិញ ។
ក្នុងនោះដែរតំណាងក្រុមហ៊ុន ក៏បានលើកឡើងពីហេតុផលមួយចំនួនរបស់បុគ្គលិកព្រលាន និង លើកនូវរាល់ ចំណុចដែលសហជីពធ្វើការស្នើសុំ ហើយចំពោះការតវ៉ារបស់បុគ្គលិកប៉ុន្មានថ្ងៃនេះ ក្រុមហ៊ុនក៏មិនបានធ្វើការកាត់កង ប្រាក់ខែដែរ តែសុំឲ្យខាងសហជីពត្រូវគោរពទៅតាមមតិដែលឯកឧត្តមអភិបាលខេត្តលើកឡើង ដើម្បីវិលត្រឡប់ទៅ រកតុចរចារអត្ថប្រយោជន៍នឹងគ្នា ហើយចំពោះបុគ្គលិកឈ្មោះ លេង ពិសិដ្ឋ ពុំមានបញ្ហាអ្វើឡើយ ឲ្យធ្វើការជាធម្មតាឡើងវិញ ហើយ ចំពោះពហុជំនាញរបត់បង្កើត ក្រុមហ៊ុនមិនអាចបញ្ឈប់បានទេ ។
មានប្រសាសន៍នោះដែរឯ.ឧ ឃឹម ប៊ុនសុង និង ឯ.ឧ សយ សុខាន់ ក៏បានលើកឡើងថា ដើម្បីជាអត្ថ ប្រយោជន៍ដល់យើងទាំងអស់គ្នា គឺត្រូវរួមសាមគ្គីគ្នា មិនត្រូវស្តាប់ការញួសញុងពីប្រភពខាងក្រៅឡើយ ដែលធ្វើឲ្យបាត់ បង់នូវអត្ថប្រយោជន៍របស់ខ្លួន ទាំងក្រុមហ៊ុន និង សហជីព ។ ក្នុងនោះឯកឧត្តមអភិបាលខេត្តក៏បាន ឲ្យក្រុមហ៊ុន និង បុគ្គលិក កសាងនូវសមត្ថភាពរបស់ខ្លួន និង ត្រូវយកអនុសញ្ញារួមទៅធ្វើការជជែកគ្នា ដោយមានការចូលរួមពីមន្ទីរការងារ និង បណ្តុះបណ្តាលវិជ្ជាជីវៈចូលរួម ហើយចំពោះពហុជំនាញក៏ត្រូវធ្វើការជជែកគ្នាផងដែរ ។ ឯកឧត្តម ឃឹម ប៊ុនសុង ក៏បានបញ្ជាថា ដើម្បីឲ្យបញ្ចប់បញ្ហាវិវាទរវាងគ្នានេះ ក្រុមហ៊ុន និង បុគ្គលិក ត្រូវមានធ្វើការជួបជុំគ្នាជាមហា គ្រួសារធំមួយ ក្នុងការត្រួតពិនិត្យនូវរាល់បញ្ហាកំហុសឆ្គង ដើម្បីធ្វើការកែលម្អគ្នា ដោយមិនត្រូវធ្វើការបញ្ឈប់ការងារអ្វី ឡើយ ដោយយើងចេះបង្រួបបង្រួមគ្នា យល់ចិត្តគ្នា សាមគ្គីគ្នាល្អ នោះទើបក្រុមគ្រួសារយើងរុងរឿង ។
ក្នុងនោះដែរ ឯកឧត្តម ក៏បានធ្វើការស្នើសុំដល់ក្រុមហ៊ុន និង សហជីព សូមបញ្ចប់នូវវិវាទនេះ ហើយត្រូវបន្តលើកិច្ចចរចាគ្នានូវចំណុច សំខាន់ដែលសហជីពលើកឡើង នឹង សុំឲ្យទទួលយកនូវបុគ្គលិកដែលបានបញ្ឈប់ ឲ្យបានចូលបម្រើការងារវិញ ព្រម ទាំងមិនត្រូវកាត់នូវប្រាក់របស់បុគ្គលិក ដែលបានចូលរួមធ្វើកូដកម្ម នឹងឲ្យចូលធ្វើការងារជាធម្មតាវិញ ។ ម្យ៉ាងទៀត ក្រុមហ៊ុន និង សហជីព ត្រូវធ្វើកិច្ចសន្យានឹងគ្នា ដោយមានមេធាវីជាសាក្សីផងដែរ ។
កិច្ចប្រជុំនេះបានបញ្ចប់ទៅដោយមានភាពយោគយល់ និង ឯកភាពគ្នា ទៅតាមការណែនាំ និង សំណូមពរ របស់អាជ្ញាធរខេត្ត ហើយការធ្វើកូដកម្មរបស់បុគ្គលិក ព្រលានយន្តហោះ ក៏បានធ្វើការរំសាយ និង ចូលទៅបម្រើការងារ វិញក្រោយពេលកិច្ចប្រជុំនេះផងដែរ ៕លោក ខេង ខេមរា
