កំពង់ឆ្នាំង៖ ជនសង្ស័យចែកចាយនិងប្រើប្រាស់គ្រឿងញៀនចំនួន២នាក់ត្រូវបានកម្លាំងសមត្ថកិច្ចចម្រុះ ចាប់ឃាត់ខ្លួនក្នុងពេលធ្វើការត្រួតពិនិត្យអាវុធជាតិផ្ទុះនៅពេលយប់ ដោយឆែកឆេររកឃើញថ្នាំញៀន២កញ្ចប់តូច។ករណីចាប់ខ្លួននេះបានធ្វើឡើងនៅវេលា៨និង៣០នាទីយប់ថ្ងៃទី២៥ ខែវិច្ឆិកា ឆ្នាំ២០១៤ នៅចំណុចមុខវត្តយាយទេព ស្ថិតក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង។
លោកស្រី មាស សុម៉ាលី នាយការិយាល័យនគរបាលប្រឆាំងគ្រឿងញៀន នៃស្នងការដ្ឋាននគរ បាលខេត្តកំពង់ឆ្នាំងបាននិយាយអោយដឹងថាៈ មុនពេលមានការឃាត់ខ្លួនជនសង្ស័យទាំង២នាក់ខាងលើនេះ ក្រុមសមត្ថកិច្ចចម្រុះ មាននគរបាល កងរាជអាវុធហត្ថ ក្រុងនិងខេត្ត បានសហការគ្នាត្រួតពិនិត្យអាវុធជាតិផ្ទុះ នៅចំណុចមុខវត្តយាយទេព ពេលនោះជនសង្ស័បានជិៈម៉ូតូ១គ្រឿងមកដល់ ហើយសមត្ថកិច្ចបានធ្វើការឆេរក៏បានរកឃើញថ្នាំញៀនប្រភេទម៉ាទឹកកក២កញ្ចប់តូចនៅជាប់ខ្លួន ទើបធ្វើការឃាត់ខ្លួនមកកាន់ស្នងការដ្ឋានដើម្បីសាកសួរតែម្តង។
លោកស្រីបានបន្តថាៈជនសង្ស័យទាំង២នាក់មាន១,ឈ្មោះភួង ហុង អាយុ២០ឆ្នាំ មានទីលំនៅភូមិកណ្តាល សង្កាត់ផ្សារឆ្នាំង ២, ឈ្មោះ ឌួង វាសនា អាយុ៣០ឆ្នាំ មានទីលំនៅ ភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង។ វត្ថុតាងដែលរឹបអូសបានមាន ថ្នាំញៀនម៉ាទឹកកក២កញ្ចប់តូច ទូរសព្ទ័ដៃ៣គ្រឿង និងម៉ូតូមួយគ្រឿង។ នៅចំពោះមុខសមត្ថកិច្ចឈ្មោះ ឌួង វាសនា សារភាពថាៈខ្លួនគ្រាន់តែជាអ្នករត់ម៉ូតូឌុបប៉ុណ្ណោះចំណែកថ្នាំញៀន២កញ្ចប់ដែលសមត្ថកិច្ចដកហូតនោះ ជារបស់ឈ្មោះ ភួង ហុង ជាអ្នកហៅម៉ូតូខ្លួនជិៈហើយបើ រូបគេដឹងថាៈមានថ្នាំញៀនរូបគេក៏មិនដឹកដែរ។
ជនសង្ស័យទាំង២នាក់ត្រូវបានមន្ត្រីការរិយាល័យប្រឆាំងគ្រឿងញៀនខេត្តបាននិយាយថាៈពួកគេទាំង២ជាមុខសញ្ញា ប្រើប្រាស់និងចែកចាយគ្រឿងញៀន និងបានកសាងសំណុំរឿងតាមផ្លូវច្បាប់ បញ្ជូនខ្លួននិងវត្ថុតាងទៅតុលាការដើម្បីចាត់ការផ្តន្ទាទោសតាមបញ្ញត្តិច្បាប់៕
