ស្វាយរៀង ៖ ឯកឩត្តមបណ្ឌិតម៉ុង ឫទ្ធី ប្រធានគណៈកម្មការទី ៣ ព្រឹទ្ធសភា (គណៈកម្មការ ទទួលបន្ទុកលើផែនការ វិនិយោគ កសិកម្ម ធនធានទឹក ឧតុនិយម អភិវឌ្ឍន៍ជនបទ និងបរិស្ថាន) នៅព្រឹកថ្ងៃទី២៧ ខែវិច្ឆិកា ឆ្នាំ២០១៤នេះបានអញ្ជើញ ចុះជួបមន្ត្រី និងអភិបាល
ខេត្តស្វាយរៀង ដើម្បីស្វែងយល់ពីស្ថានភាព អភិវឌ្ឍន៍នៅក្នុងខេត្ត ។
ឯកឩត្តមជៀង អំ អភិបាល នៃគណៈអភិបាល ខេត្តស្វាយរៀង បានមានប្រសាសន៍ថា ការអនុវត្តតាមកម្មវិធីនយោបាយ និងយុត្តិសាស្ត្រចតុកោណ របស់រាជរដ្ឋាភិបាលកម្ពុជា ខេត្តស្វាយរៀង មានការប្រែប្រួលរីកចម្រើនកើនឡើង ជាបន្ត បន្ទាប់លើគ្រប់វិស័យ ជាពិសេស ដោយមានគោលនយោបាយ ភូមិ-ឃុំ មានសុវត្ថិភាព បានធ្វើឲ្យសភាពការណ៍សន្តិ សុខសណ្តាប់ធ្នាប់សាធារណៈ នៅទូទាំងខេត្ត មានលក្ខណៈល្អប្រសើរ ។
ក្នុងឱកាសនោះ ក៏មានការឡើងផ្តល់ព័ត៌មាន ជុំវិញវិស័យកសិកម្ម ធនធានទឹក អភិវឌ្ឍន៍ជនបទ និងការធ្វើពាណិជ្ជកម្ម ផងដែរ ។ មន្ទីរកសិកម្មខេត្តស្វាយរៀង បានផ្តោតសំខាន់ ទៅលើដំណាំស្រូវ មន្ទីរធនធានទឹក ផ្តោតលើការងារប្រព័ន្ធ ធារាសាស្ត្រ សេចក្តីរាយការណ៍ ពីមន្ទីរអភិវឌ្ឍន៍ជនបទខេត្ត ផ្តោតលើការងារអភិវឌ្ឍន៍ហេដ្ឋារចនាសម្ព័ន្ធជនបទ និង បញ្ហាប្រឈមនានា សេចក្តីរាយការណ៍ ពីសភាពាណិជ្ជកម្មខេត្ត ផ្តោតលើគោលនយោបាយ របស់រាជរដ្ឋាភិបាល ពាក់ ព័ន្ធទៅនឹងវិនិយោគ លើវិស័យកសិកម្ម ពាណិជ្ជកម្ម ទស្សនវិស័យក្នុងការវិនិយោគ និងបញ្ហាប្រឈម ពាក់ព័ន្ធទៅនឹង ការអនុវត្តច្បាប់ និងសេចក្តីរាយការណ៍ពីក្រុមប្រឹក្សាឃុំ-សង្កាត់ តំណាងសមាគមកសិកម្មផ្តោតលើគោលនយោបាយ ភូមិ ឃុំមានសុវត្ថិភាព ការគ្រប់គ្រង និងការចលនាសមាគម និងបញ្ហាប្រឈមនានាផងដែរ ។
ឯកឩត្តមបណ្ឌិត ម៉ុង ឫទ្ធី បានមានប្រសាសន៍ បង្ហាញគោលបំណងរបស់ខ្លួនថា ការចុះបំពេញបេសកកម្មនេះ គឺសិក្សាស្វែង យល់ និងធ្វើការសម្រង់ព័ត៌មាននានា ពាក់ព័ន្ធវិស័យជាសមត្ថកិច្ច របស់គណៈកម្មការ នៅក្នុងខេត្តស្វាយរៀងនេះ មាន ដូចជា ការអនុវត្តគោលនយោបាយ កំណែទម្រង់វិមជ្ឈការ វិសហមជ្ឈការ និងលទ្ធផល នៃការអភិវឌ្ឍន៍របស់ឃុំ សង្កាត់ ស្រុក ខណ្ឌ ក្នុងខេត្ត និងបច្ចុប្បន្នភាពការងារ និងលទ្ធផលតាមវិស័យ ដែលពាក់ព័ន្ធទៅនឹងសមត្ថកិច្ចរបស់ គណៈកម្មការរួមមាន ផែនការ វិនិយោគ កសិកម្ម ធនធានទឹក អភិវឌ្ឍន៍ជនបទ និងបរិស្ថាន ការផ្សព្វផ្សាយច្បាប់ និង លិខិតបទដ្ឋានគតិយុត្ត ដែលពាក់ព័ន្ធទៅនឹងការពង្រឹងវិស័យនីតិរដ្ឋនៅកម្ពុជា ស្វែងយល់អំពីប្រតិបត្តិការវិស័យឯក ជន និងបញ្ហាប្រឈម ស្វែងយល់អំពីការគ្រប់គ្រង និងការចលនាសហគមន៍កសិកម្ម ។
ឯកឩត្តមបណ្ឌិតបានមានប្រសាន៍បន្តថា គណៈកម្មការទាំង១០ នៃព្រឹទ្ធសភាមានមុខងារសំខាន់ចំនួន ០៣ គឺមុខងារនីតិកម្ម មុខងារត្រួតពិនិត្យ និងមុខងារតំណាង ឬមុខងារផ្តល់ព័ត៌មាន ។
មុខងារផ្តល់ព័ត៌មាន ដែលគណៈកម្មការ ទាំង១០ ទទួលរ៉ាប់រង គឺជាវិធីសាស្ត្រដ៏មានអត្ថប្រយោជន៍បំផុត ដើម្បីឆ្លើយតបបានយ៉ាងត្រឹមត្រូវ ទៅនឹងមុខងារនីតិកម្ម មុខ ងារត្រួតពិនិត្យ និងមុខងារតំណាងរបស់ព្រឹទ្ធសភា ហើយក៏ជាតំណាងឲ្យម្ចាស់ឆ្នោតទាំងមូលផងដែរ ពីព្រោះថា គណៈកម្មការទាំង១០ ដើរតួជាតំណាងឲ្យស្ថាប័នព្រឹទ្ធសភាទាំងមូល ដោយផ្តោតលើវិស័យ ដែលជាសមត្ថកិច្ចរបស់ គណៈកម្មការនីមួយៗ ៕
