ខេត្តបន្ទាយមានជ័យ ១២ មិនា ២០១៤ មន្ត្រីជល់ផលប៉ោយប៉ែត កាលពីវេលាម៉ោង៨យប់ ថ្ងៃទី១១ ខែមិនា ឆ្នាំ២០១៤ ចាប់បាន អណ្តើកនាំចូលពីថៃ០២ការ៉ុង នៅចំនុចកន្លែងលក់សំបុត្រ រថយន្តក្រុង តាមបណ្តោយផ្លូវជាតិ លេខ៥ មុខវត្តប៉ាលិលេយ្យ ភូមិក្បាលកោះ សង្កាត់/ក្រុង ប៉ោយប៉ែត មន្ត្រីជលផលបានស៊ីសស៊ុស ជាមួយឈ្មួញ យកលុយ ២៣០០០បាត(ស្មើ៦០០ដុល្លា) រួចដោះលែងវិញទាំងយប់ ឲ្យឈ្មួញនាំយក អណ្តើកទាំងនោះទៅលក់តាមបណ្តាខេត្ត បានម៉ាសប្បាយ។
ស្ថិតក្រោមដំណក់ទឹកភ្នែករលីងរលង ស្ត្រីវ័យសែប្លាយម្នាក់ សុំមិនបញ្ចេញឈ្មោះ បានអះ អាងថា គាត់ត្រូវបានមន្ត្រីជលផលមួយក្រុមនៅក្រុងប៉ោយប៉ែត មានគ្នាប្រមាណ៤នាក់ ស្លៀកពាក់ ស៊ីវិល បានមកសម្លុតគំរាមចាប់គាត់ដាក់គុគ ព្រោះគេដឹងថា គាត់រកស៊ីដឹកអណ្តើក ពីជាយដែនថៃ ទៅលក់នៅរាជធានីភ្នំពេញ។
ស្ត្រីដដែលរូបនេះបានរៀបរាប់បន្ថែមថា អណ្តើកទាំងនោះគឺគាត់ទិញពីផ្សារថៃក្នុង ១៥០០បាត អណ្តើកជាង៣០ក្បាលយកចូលមក កម្ពុជា តាមច្រកអន្តរជាតិប៉ោយប៉ែត ដើម្បីនាំ យកទៅឲ្យម៉ូយតាមភោជនីយ៍ដ្ឋាននៅរាជធានីភ្នំពេញ ពេលដែលគាត់មកដល់ កន្លែងលក់សំបុត្រ រថយន្តក្រុង ស្រាប់តែមានក្រុមជលផល មករករឿងគាត់ និងឃាត់គាត់យកទៅ សួរនាំ នៅស្នាក់ការ របស់ពួកគេខាងក្រោយផ្ទះសំណាក់ភ្នំពេជ្រ ហើយការសួរនាំនោះគ្មានសួរនាំអី ក្រៅពីគំរាមកំហែង យកគាត់ញាត់គុក បើមានលុយបង់ឲ្យពួកគេ១០០០ដុល្លា ទើបរួចខ្លួន។
ដោយភ័យខ្លាចមន្ត្រីជលផលប៉ោយប៉ែតធ្វើបាប គាត់ទៅសុំខ្ចីលុយគេទាំងយប់មកបង់ឲ្យ មន្ត្រីទាំងនោះ ដែលត្រូវរ៉ូវគ្នាក្នុងតម្លៃ២៣០០០បាត (ស្មើ៦០០ដុល្លា) ទើបគេដោះលែងគាត់ឲ្យមាន សេរី ភាពវិញ។ឈ្មួញរូបនេះបានបញ្ជាក់ថា របរនេះមិនមែនគាត់ទើបតែរកស៊ីទេ គាត់រកស៊ីមកយូរ ហើយ បង់ឲ្យលុយឲ្យអស់លោកតែរហូត ហើយថ្ងៃនេះចាប់អណ្តើកគាត់គឺដោយ សាររឿងមិនត្រូវ ថ្លៃគ្នា។
ជុំវិញករណីនេះលោក សី ស៊ីល័យ នាយសង្កាត់រដ្ឋបាលជលផលប៉ោយប៉ែតបានឲ្យដឹងតាម ទូរសព្ទ័ថា ពិតជាមានករណីនោះមែន ហើយការពិន័យប្រាក់ពីស្ត្រីរូបនោះក៏មានដែរ តែយើងពិន័យ តាមតម្លៃទីផ្សារ គ្រាន់បានចែកគ្នាចាយបន្តិចបន្តួច និងមួយចំនួនបង់ជូនរដ្ឋ។និយាយបានតែត្រឹម នឹងលោក សី ស៊ីល័យ ក៏ប្រាប់ថា គាត់មានធុរះរវល់កម្មវិធីឡើងផ្ទះមិត្តភក្តិ កុំនិយាយច្រើនអី ក្រែងបែករឿងដល់កាសែតផ្សេងចាំព្រឹកជួបគ្នា។
លុះថ្ងៃទី១២ ខែមិនា ឆ្នាំ២០១៤ នេះ លោក សី ស៊ីល័យ បានទូរសព្ទ័មកភ្នាក់ងារប៉ុស្តិលេខ៣ ប្រចាំខេត្តបន្ទាយមានជ័យ ដោយលក្ខណះមើលងាយថា (នៅឲ្យស្ងៀមទៅ ខ្ញុំឲ្យលុយក្រុមអ្នកយក ពត៏មានប៉ុស្តិលេខ៣ ឯង ២០ដុល្លាចាក់សាំង)។នេះសរបញ្ជាក់ឲ្យឃើញថា អំពើរពុករលួយ របស់ ក្រុមមន្ត្រីជល ផលប៉ោយប៉ែត ពិតជាមានយ៉ាងច្បាស់ឥតប្រកែក បានឡើយ។បើយើងពិត ជាមន្ត្រី អនុវត្តន៍ ច្បាប់ មែនហេតុអ្វីមិនធ្វើការតាមតួនាទីឲ្យបានល្អទៅ។
ចំពោះការបង្ក្រាបបទល្មើសជំនួញសត្វអណ្តើកនិងឃាត់ឈ្មួញយកទៅសួរនាំនេះ ស្ថាប័ន តុលាការ ដែលមានលោក ផាន់ ភីរម្យ ព្រះរាជអាជ្ញារងអមសាលាដំបូងខេត្តបន្ទាយមានជ័យ បានឲ្យ ដឹងតាមទូរសព្ទ័ថា លោកពុំបានទទួលរបាយការណ៍ឬការសុំអនុញាតិពីស្ថាប័ន សង្កាត់រដ្ឋបាល ជលផលប៉ោយប៉ែតថា អង្គភាពខ្លួនចុះបង្ក្រាបបទល្មើស ឬឃាត់ខ្លួនមនុស្សយកមកសួរនាំទេ។
លោក គោស៊ុំ សារឿត អភិបាលខេត្តបន្ទាយមានជ័យ គួរមើលចំនុចខ្វះចន្លោះ និងអំពើរពុក រលួយ របស់ពួកមន្ត្រីជលផលប៉ោយប៉ែតផង សកម្មភាពទាំងនេះហើយដែលធ្វើឲ្យគេរិះគន់ថា ថ្នាក់ ដឹកនាំ ធ្វើការមិនល្អ។បើលោកនៅតែបណ្តោយតទៀត សកម្មភាពរបស់មន្ត្រីទាំងនេះនឹងក្លាយជា វប្បធម៌ ដល់ពេលនេះប្រជាពលរដ្ឋក្តៅក្រហាយដោយសារមន្ត្រីមួយក្តាប់នេះ អាចធ្វើឲ្យបាត់បង់ សន្លឹកឆ្នោតកាន់តែច្រើនជាងនេះមិនខាន៕ ដោយ ដុំ សំបូរ
