ភ្នំពេញ៖ សមត្ថកិច្ចនគរបាលខណ្ឌ៧មករាបានបើកប្រតិបត្តិការទ្រង់ទ្រាយធំព័ទ្ធចាប់ជនសង្ស័យបានចំនួន៣នាក់និងដកហូតបានគ្រឿងញៀនមួយចំនួនធំ ដែលការព័ទ្ធចាប់ជនសង្ស័យនេះគឺបានធ្វើឡើងនៅតាមបណ្តោយផ្លូវ២១៧ ស្ថិតនៅក្នុងសង្កាត់អូឬស្សី២ ខណ្ឌ៧មករា វេលាម៉ោង៩និង៥៥នាទីយប់ថ្ងៃទី១៨ខែមីនាឆ្នាំ ២០១៤។ ចំពោះប្រតិបត្តិការនេះសមត្ថកិច្ចបានដកហូតម៉ូតូសង់ប៊ិចសេ១១០ចំនួន២គ្រឿងរបស់ជនសង្ស័យ ពណ៌ខ្មៅដែលមានស្លាកលេខ ភ្នំពេញ1BQ-7867 និងមួយគ្រឿងទៀត ពាក់ស្លាកលេខ ភ្នំពេញ 1BW-1394 ។
គេមិនទាន់ដឹងថាគ្រឿងញៀន ដែលសមត្ថកិច្ចពទ្ធ័ចាប់បាននោះមានចំនួនប៉ុន្មាននោះទេ? ហើយជនសង្ស័យក៏មិនទាន់ស្គាល់អត្តសញ្ញាណដែរដោយសារតែសមត្ថកិច្ចខណ្ឌ៧មករា មិនបានផ្តល់ប្រភពព័ត៌មាន ថែមទាំងមិនចង់អោយអ្នកសារព័ត៌មានផ្ដិតយករូបភាពជនសង្ស័យថែមទៀតផង។
ប៉ុន្តែបើតាមប្រភពព័ត៌មានក្រៅផ្លូវការដែលអ្នកយកព័ត៌មានទទួលបានឱ្យដឹងថា នៅក្រោមកែបម៉ូតូជនសង្ស័យខាងលើមានដាវសាំម៉ូរ៉ៃចំនូន៣ដើមនិងគ្រឿងញៀនមួយចំនួនធំ។ បច្ចុប្បន្ន ជនសង្ស័យទាំង៣នាក់ត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលខណ្ឌ៧មករាដើម្បីធ្វើការសាកសួរ៕ 
