ឯកឧត្តម ខៀវ កញ្ញារិទ្ធ រដ្ឋមន្រី្តក្រសួងព័ត៌មាន បានចាត់ទុកកម្មវិធីនេះថា គឺជាមហោស្របខ្នាតធំ ដែលពុំធ្លាប់មានពីមុនមកនៅកម្ពុជា ហើយគោលបំណងនៃកម្មវិធីនេះគឺដើម្បីផ្លាស់ប្តូរវប្បធម៌ នៃប្រទេសកម្ពុជា ចិនពិសេសគឺដើម្បីអបអរសាទរពិធីបុណ្យចូលឆ្នាំចិនដែលនឹងឈានចូលមកដល់នៅពេលឆាប់ៗខាងមុខនេះ។
ឯកឧត្តមបន្ថែមថា កម្មវិធីបានកើតឡើងតាមរយៈកិច្ចសហប្រតិបត្តិការ រវាងក្រសួងព័ត៌មានកម្ពុជា និងវិទ្យុទូរទស្សន៏ខេត្តយូណាន ប្រទេសចិន តាំងពីឆ្នាំ២០១០មកម្លេះ ហើយតាមរយៈរាត្រីមោសរ និទាឃរដូវ នៃទំនាក់ទំនងមិត្តភាពកម្ពុជា-ចិន ដែលបានរៀបចំឡើងនៅពេលនេះ ។ ឯកឧត្តមមានជំនឿយ៉ាងមុតមាំថា ប្រជាជននៃប្រទេសទាំងពីរនឹងរស់នៅជិតស្និតស្វែងយល់ផ្លាស់ប្តូរពីវប្បធម៌គ្នាទៅវិញទៅមកឱ្យកាន់តែរឹងមាំថែមទៀត។
ក្នុងនាមរាជរដ្ឋាភិបាលកម្ពុជា ឯកឧត្តម ខៀវ កញ្ញារិទ្ធ ក៏បានថ្លែងអំណរគុណ ដល់រដ្ឋាភិបាល និងប្រជាជនចិន ដែលតែងគាំទ្រ ឧបត្ថម្ភដល់កិច្ចអភិវឌ្ឍន៏ប្រទេសកម្ពុជា ។
នៅក្នុងឱកាសនោះដែរ ទាំងមន្រី្តតំណាងខេត្តយូណាន និងលោកជំទាវ ឯកអគ្គរដ្ឋទូតចិន ប្រចាំនៅកម្ពុជាបានថ្លែងអំណរគុន ចំពោះវត្តមានសម្តេចតេជោ និងសម្តេចកិត្តិព្រឹទ្ធបណ្ឌិត និងបានយកឱកាសនេះ ថ្វាយព្រះពរដល់ព្រះមហាក្សត្រ នៃព្រះរាជាណាចក្រកម្ពុជា និងសម្តេចម៉ែ សូមឱ្យព្រះអង្គ មានព្រះរាជសុខភាពរឹងមាំ ។ 
ជាមួយនេះដែរ លោកជំទាវឯកអគ្គរដ្ឋទូតចិន ក៏បានរំលឹកពីទំនាក់ទំនង កម្ពុជា-ចិន ដែលបានបង្កើតឡើងដោយសម្តេចឳ សម្តេចម៉ែ ហើយក៏បានបន្តរឹងមាំដល់សព្វថ្ងៃនេះ ហើយមានជំនឿយ៉ាងមុតមាំថា ប្រទេសយើងទាំងពីរ នឹងប្រើប្រាស់ឱកាសរួមគ្នា ដើម្បីភាពរុងរឿងថ្កុំថ្កើងរូមគ្នា ៕
