សៀមរាប៖ នៅថ្ងៃទី ១៦ ខែ កុម្ភះ ឆ្នាំ២០១៥នេះ លោកឧត្តមសេនីយ៍ឯក សួស អង្គារ៍ អគ្គស្នងការរងនគរបាលជាតិ តំណាងដ៏ខ្ពង់ខ្ពស់របស់ឯកឧត្តមនាយឧត្តមសេនីយ៍អគ្គស្នងការនគរបាលជាតិ បានជួបធ្វើការសំណេះសំណាលជាមួយមន្ត្រីនគរបាលការពារបេតិកភណ្ឌនិង នគរបាលទេសចរណ៍ប្រចាំខេត្តសៀមរាបនៅស្នងការដ្ឋាននគរបាលខេត្ត ដោយមាន
ការអញ្ជើញចូលរួមពីសំណាក់ឯកឧត្តមអគ្គនាយកដ្ឋាន និង អស់លោកជាស្នងការនគរបាលខេត្ត អាជ្ញាធរ អប្សរាផងដែរ ។
ក្នុងកិច្ចស្វាគមន៍របស់លោកឧត្តមសេនីយ៍ត្រីម៉ាន់ឈឿន អនុប្រធាននាយកដ្ឋាននគរបាលការពារបេតិកភណ្ឌ ក៏បានធ្វើសេចក្តីរាយការណ៍ អំពីលទ្ធផលការងារ ដែលអង្គភាពបានអនុវត្តក្នុងឆ្នាំ២០១៤ ក្នុងការគ្រប់គ្រង និង ការពារ សម្បត្តិបេតិកភណ្ឌ នៃវប្បធម៌ជាតិព្រមទាំងការពារថែរក្សានូវសន្តិសុខសណ្តាប់ធ្នាប់ ក្នុងការធានានូវសុវត្ថិភាព ជូន ដល់ថ្នាក់ដឹកនាំជាន់ខ្ពស់ គណៈប្រតិភូ និង ភ្ញៀវទេសចរណ៍ជាតិ អន្តរជាតិ ដែលបានចូលមកទស្សនាកម្សាន្ត និង ពិធីបុណ្យផ្សេងៗនៅតំបន់អង្គរនេះ។លោកឧត្តមសេនីយ៍ត្រីក៏បានលើកឡើង ពីកិច្ចសហប្រតិបត្តិការជាមួយអាជ្ញាធរខេត្ត សមត្ថកិច្ចពាក់ព័ន្ធ សំខាន់អាជ្ញាធរអប្សរា នគរបាលទេសចរណ៍ ក្នុងបុព្វហេតុការពារសម្បត្តិវប្បធម៌ជាតិ។ក្នុងនោះដែរលោកក៏បានលើកនូវសំណូមពរមួយចំនួន ដល់អគ្គស្នងការនគរបាលជាតិ ក្នុងការជួយសម្រួលនូវសម្ភារៈមធ្យោបាយ ដើម្បីបម្រើក្នុងកិច្ច ប្រតិបត្តិការ ព្រមទាំងសុំបំពេញក្របខណ្ឌ ជំនួសមន្ត្រីនគរបាលដែលបានចូលនិវត្តន៍ផងដែរ ។ 
មានប្រសាសន៍សំណេះសំណាលនោះលោក ឧត្តមសេនីយ៍ឯក សួស អង្គារ៍ ក៏បានធ្វើការកោតសរសើរ អំពីលទ្ធផលដែលអង្គភាពនគរបានការពារបេតិកភណ្ឌប្រចាំខេត្តសៀមរាបសម្រេចបានមកនេះ ក៏ស្តែងឡើងពីកិច្ចចូលរួមសហការបានល្អរបស់អាជ្ញាធរមូលដ្ឋាននិងកម្លាំងសមត្ថកិច្ចគ្រប់ជំនាញ ក្នុងការថែរក្សាសន្តិសុខសណ្តាប់ធ្នាប់សុវត្ថិភាពជូនដល់ភ្ញៀវជាតិអន្តរជាតិដែលចូលមកទស្សនាកម្សាន្ត។ ក្នុងនោះដែរឯកឧត្តមក៏បានលើកឡើងផងដែរអំពីបញ្ហាដែលកើតឡើងកន្លងមកនេះនៅតំបន់អង្គរ គឺជាការប៉ង់ប៉ងរបស់ក្រុមជនឧក្រិដ្ឋជនណាមួយ ក្នុងការបន្ថោកបង្អាប់ពីសម្បត្តិវប្បធម៌ជាតិយើង។ ក្នុងនោះដែរលោក សួសអង្គារ៍ក៏បានលើកនូវវិធានការចម្បងបីចំណុចសម្រាប់មន្ត្រីនគរបាលការងារបេតិកភណ្ឌនិង នគរបាលទេសចរណ៍ក៏ដូចកម្លាំងសមត្ថកិច្ចឯទៀតត្រូវប្រកាន់ឲ្យបានខ្ជាប់ខ្ជួនក្នុងការទទួលបានជោគជ័យ។ ក្នុងនោះលើវិធានការនៃការអប់រំផ្សព្វផ្សាយឲ្យបានទូលាយចូលដល់ស្រទាប់មហាជននិងប្រជាជន សោយលើកនូវសក្តានុពលនៃវប្បធម៌ជាតិព្រមទាំងវិធានការជំនាញក្នុងការគ្រប់គ្រងនៅតាមគោលដៅឈរ ជើងរបស់ខ្លួន ក្នុងការតាមដាននូវគ្រប់រាល់សកម្មភាពរបស់ជនសង្ស័យ ហើយដោយលើយកវិធានការច្បាប់ ក្នុងការ អនុវត្តឲ្យបានម៉ត់ចត់នូវច្បាប់ ចំពោះជនដែលប្រព្រឹត្តបទល្មើស ក្នុងនោះដែរឯកឧត្តមក៏បានសង្កត់ធ្ងន់ ទៅលើមន្ត្រី ជំនាញក្នុងការអនុវត្តច្បាប់ផងដែរ ។ លោកសួស អង្គារ៍ ក៏បានពាំនាំនូវការសាកសួរសុខទុក្ខដល់មន្ត្រីនគរបាលទាំង ពីរអង្គភាព ពីសំណាក់ឯកឧត្តមនាយឧត្តមសេនីយ៍ នេត សាវឿន អគ្គស្នងការនគរបាលជាតិ ព្រមទាំងបានផ្តាំផ្ញើដល់ មន្ត្រីទាំងអស់ ត្រូវរក្សាឲ្យបាននូវប្រពៃណី វប្បធម៌សាមគ្គីផ្ទៃក្នុង និង រួមសហការឲ្យបានល្អ ព្រមទាំងបង្កើននូវការ បណ្តុះបណ្តាល ហ្វឹកហ្វឺននូវជំនាញបច្ចេកទេសឲ្យបានជាប្រចាំដល់មន្ត្រីក្រោមឱវាទ ក្នុងការការពាសម្បត្តិបេតិកភណ្ឌ ជាតិ និង បង្កើនការយកចិត្តទុកដាក់ នូវប្រពៃណីថែរក្សាការពារសន្តិសុខ សណ្តាប់ធ្នាប់ជូនថ្នាក់ដឹកនាំ ភ្ញៀវជាតិ អន្តរជាតិ សំខាន់លើការងារសន្តិសុខទេសចរណ៍ និង ត្រូវគោរពឲ្យបាននូវអង្គការវិន័យនិង ការចាត់តាំងរបស់ថ្នាក់លើ និង អង្គភាព ព្រមទាំងពង្រឹងពង្រីកនូវវប្បធម៌សហការល្អជាមួយអាជ្ញាធរមូលដ្ឋានស្ថាប័នពាក់ព័ន្ធនិង ប្រជាពលរដ្ឋនៅ តាមមូលដ្ឋាន និង ត្រូវគោរពឲ្យបាននូវការអនុវត្តច្បាប់អន្តោប្រវេសន៍ឲ្យបានខ្ជាប់ខ្ជួនផងដែរ ។
ក្នុងឱកាសនោះឯកឧត្តមឧត្តមសេនីយ៍ឯកសួសអង្គារ៍ក៏បាននាំយកនូវអំណោយរបស់ ឯកឧត្តមនាយឧត្តមសេនីយ៍ អគ្គស្នងការនគរបាលជាតិ នូវស្រាបៀរ ១០០កេសទឹកក្រូច៥០កេសមី ចំនួន៣០កេសធំ ត្រីខកំប៉ុងចំនួន១០កេសហើយឯកឧត្តមផ្ទាល់ក៏បានឧបត្ថម្ភនូវថវិកាចំនួន២លានផងដែរ ជូនដល់អង្គភាពនគរបាលការពារបេតិកភណ្ឌនិងនគរបាលទេសចរណ៍ ក្នុងឱកាសបុណ្យចូលឆ្នាំចិនខាងមុខនេះផងដែរ ៕ដោយគឿនវ៉េត
