កំពង់ឆ្នាំង៖អនុវត្តតាមផែនការយុទ្ធសាស្ត្រក្នុងវិស័យអប់រំនិងដើម្បីជ្រើសរើសកីឡាករ និងក្រុមកីឡាករជើងឯករបស់សិស្សបឋម និងមធ្យមសិក្សាក្នុងខេត្តប្រចាំឆ្នាំសិក្សា២០១៤.២០១៥ នៅរលៀសថ្ងៃទី១៧ ខែកុម្ភៈ ឆ្នាំ២០១៥ ខេត្តកំពង់ឆ្នាំងបានធ្វើពិធីបើកការប្រកួតកីឡាសិស្សទូទាំងខេត្ត ដែលមានលោក សៀក គឹមលៀង អភិបាលរងខេត្តកំពង់ឆ្នាំងជាគណៈអធិបតី និងមានសិស្សជាកីឡាករ កីឡាការិនីសរុបចំនួន១.២៣៦នាក់មកពីស្រុកទាំង៨ក្នុងខេត្តបានចូលរួមប្រកួត។
លោក ពេជ្រ សំបូរ ប្រធានមន្ទីរអប់រំយុវជននិងកីឡាខេត្តកំពង់ឆ្នាំងបានថ្លែងសន្ទរកថាអោយដឹងថា៖អនុវត្តតាមផែនការរបស់ក្រសួងអប់រំ និងដើម្បីជ្រើសរើសជើងឯកកីឡាករសិស្សបឋមសិក្សា និងមធ្យមសិក្សាក្នុងខេត្តប្រចាំឆ្នាំ២០១៤.២០១៥ ទៅចូលរួមប្រកួតកីឡាសិស្សថ្នាក់ជាតិក្នុងខែខាងមុខនេះ មន្ទីរអប់រំយុវជននិងកីឡាខេត្ត បានបើកការប្រកួតកីឡាក្នុងខេត្តចំនួន៥ថ្ងៃគឺចាប់ពីថ្ងៃទី១៦ ដល់ថ្ងៃទី២០ ខែកុម្ភៈ ឆ្នាំ២០១៥នៅក្នុងក្រុងកំពង់ឆ្នាំង ដែលមានទីលានប្រកួត៣កន្លែង គឺទីលានកីឡាមុខសាលាខេត្ត ទីលានកីឡាដ្ឋានខេត្តវត្តធម្មយុត្តិ និងទីលានកីឡាវិទ្យាល័យក្រុងកំពង់ឆ្នាំង។
ការប្រកួតកីឡានេះមាន៖ បាល់ទាត់ បាល់ទះ បាល់បោះ និងអត្តពលកម្ម កីឡាករសិស្សបឋមសិក្សាមានចំនួនសរុប៦០០នាក់ ស្រី២៧៦នាក់ កីឡាករសិស្សមធ្យមសិក្សាមានចំនួនសរុប៦៣៦នាក់ ស្រី៣០០នាក់ សមាសភាព ប្រតិភូ គ្រូបង្វឹក និងកីឡាករសរុបមានចំនួន១៣៥៧នាក់ ស្រី៥៧៨នាក់ ចំណែកកីឡាករសុទ្ធមានចំនួន១.២៣៦នាក់ ស្រី៥៧៦នាក់។
លោក សៀក គឹមលៀង អភិបាលរងខេត្តអញ្ជើញចូលរួមក្នុងពិធីបើការប្រកួតកីឡានេះបានលើកឡើងថា៖នៅលើសកលលោកត្រូវបានគេចាត់ទុកវិស័យកីឡាគឺជាឧស្សាហកម្មគ្មានផ្សែង ដែលជួយអភិវឌ្ឍន៍សេដ្ឋកិច្ចជាតិ និងប្រជាពលរដ្ឋមិនខុសពីវិស័យទេសចរណ៍ឡើយ។ការហ្វឹកហាត់កីឡា ប្រកួតកីឡា នាំមកនូវសុខភាពល្អ ធ្វើអោយយុវវ័យចៀសឆ្ងាយពីគ្រឿងញៀន កីឡានាំមកនូវបញ្ញាស្មារតីវាងវ័យរហ័សរហួន មានភាពសាមគ្គីក្នុងក្រុមរឹងមាំ ចេះជួយគ្នាសហការគ្នាដើម្បីយកជ័យជំនះជូនក្រុមខ្លួន។
លោក សៀក គឹមលៀង បានធ្វើការផ្តាំផ្ញើរដល់កីឡាករ កីឡាការិនី និងគណៈកម្មការដឹកនាំការប្រកួតទាំងអស់ថា៖ត្រូវសហការគ្នាធ្វើអោយការប្រកួតកីឡាទទួលបានលទ្ធផលល្អ។គឺកីឡាករត្រូវយល់ថា ការប្រកួតកីឡាគឺជាការវាស់ស្ទង់សមត្ថភាព ដកពិលោធន៍បច្ចេកទេសកីឡាទៅវិញទៅមក ដូច្នេះកីឡាករត្រូវគោរពអាជ្ញាកណ្តាលនិងច្បាប់កីឡា ត្រូវចេះសាមគ្គីគ្នា ដើម្បីបញ្ចេញសមត្ថភាពយកជ័យជំនះ មិនត្រូវបង្កហេតុអោយមានទំនាស់ក្នុងពេលប្រកួតឡើយ ដើម្បីរក្សាកិតិយសអោយក្រុម និងអោយសាលារបស់ខ្លួន។
គណៈកម្មការប្រកួតកីឡានៃមន្ទីរអប់រំយុវជននិងកីឡាខេត្តបានអោយដឹង អំពីលទ្ធផលនៃការប្រកួតកីឡាក្នុងថ្ងៃទី១៧ ខែកុម្ភៈ ឆ្នាំ២០១៥នេះថា៖ កីឡាបាល់ទាត់ សិស្សមធ្យមសិក្សាស្រុករលាប្អៀរប្រកួតឈ្នះ ស្រុកបរិបូណ៌៧គ្រាប់ទល់និង៦ ស្រុកទឹកផុសប្រកួតឈ្នះស្រុកំពង់លែង៦គ្រាប់ទល់និង១ ក្រុងកំពង់ឆ្នាំងប្រកួតឈ្នះស្រុកសាមគ្គីមានជ័យ៦គ្រាប់ទល់និង០ កីឡាករបាល់ទាត់មធ្យមសិក្សាផ្នែកនារី ក្រុងកំពង់ឆ្នាំងប្រកួតឈ្នះស្រុករលាប្អៀរ២ទល់និង១ ស្រុកទឹកផុសប្រកួតឈ្នះស្រុកជលគីរី៤គ្រាប់ទល់និ០។
ក្នុងការប្រកួតកីឡានេះអ្នកចាញ់ពុំមានសិទ្ធចូលប្រកួតទៀតទេ ចំណែកក្រុមអ្នកឈ្នះនិងធ្វើការប្រកួតជាមួយក្រុមអ្នកឈ្នះ បន្តគ្នាដើម្បីដណ្តើមយកជ័យលាភីជាជើងឯកប្រចាំខេត្ត និងត្រៀមចូលរួមប្រកួតកីឡាសិស្សនៅថ្នាក់ជាតិនាខែខាងមុខនេះទៀត៕
