សហព័ន្ធបាល់ទាត់ប្រទេសអ៊ីតាលីបានយល់ព្រមបន្តកិច្ចសន្យាថ្មីជាមួយគ្រូបង្វឹក សេសា ប្រានដេលី (Cesare Prandelli) បានន័យថា គ្រូបង្វឹករូបនេះនឹងទទួលភារកិច្ចបន្តដឹកនាំអ៊ីតាលីរហូតដល់ឆ្នាំ ២០១៦ ។
អ្នកចាត់ការដែលពោរពេញទៅដោយបទពិសោធន៍រូបនេះបានចូលមកដឹកនាំអ៊ីតាលីចាប់តាំងពីឆ្នាំ ២០១០ ហើយរូបគាត់ក៏បានជួយឲ្យអ៊ីតាលីឈានដល់វគ្គផ្តាច់ព្រ័ត្របាល់ទាត់ពានរង្វាន់ទ្វីបអឺរ៉ុប Euro 2012 ផងដែរ ។
លោក Prandelli ប្រាប់គេហទំព័រ ANSA ថា “ខណៈពេលនេះខ្ញុំពិតជាមានអារម្មណ៍ថាអស្ចារ្យណាស់ ខ្ញុំពិតជាមានមោទនភាពដែលសហព័ន្ធបាល់ទាត់ប្រទេសអ៊ីតាលីផ្តល់ការទុកចិត្តមកលើរូបខ្ញុំ” ។
គួរបញ្ជាក់ថា លោក Prandelli ធ្លាប់ឆ្លងកាត់បទពិសោធន៍ដឹកនាំក្រុមជាច្រើនដែលក្នុងនោះក៏មានក្លិបរបស់អ៊ីតាលីដូចជា Parma, Roma និង Fiorentina ផងដែរ ៕
