ស្ទឹងត្រែង៖អាជ្ញាធរឃុំនៅតាមបណ្តាស្រុកក្នុងខេត្តស្ទឹងត្រែង បាននាំគ្នាសំណូមពរឲ្យ ក្រសួងក៏ដូចជាមន្ទីរអភិវឌ្ឍន៍ជនបទខេត្ត ជួយស្ថាបនាឬជួសជុលឡើងវិញ នូវផ្លូវគ្រួសក្រហមតាមបណ្តាឃុំ ក្នុងពេលដែលផ្លូវទាំងនោះ រងការប៉ះពាល់ដោយសារទឹកជំនន់ទន្លេមេគង្គ ហើយខូចខាតបង្កភាពលំបាកដល់ការធ្វើដំណើរ ។
នៅក្នុងសន្និបាតបូកសរុបការងារឆ្នាំ២០១៤ និងលើកទិសដៅការងារសំរាប់អនុវត្តឆ្នាំ ២០១៥ របស់មន្ទីរអភិវឌ្ឍន៍ខេត្តស្ទឹងត្រែងថ្មីៗនេះ អាជ្ញាធរនៅតាមឃុំក្នុងខេត្តបានស្នើរសុំឲ្យ ក្រសួងក៏ដូចជាមន្ទីរអភិវឌ្ឍន៍ជនបទ ចុះទៅពិនិត្យមើលផ្លូវលំជនបទនៅតាមឃុំនិមួយៗ ដែលបច្ចុប្បន្នពិបាកក្នុងការធ្វើចរាចរណ៍ ។
លោកស្រី ជា ណម មេឃុំអូរម្រះបានលើកឡើងថា ៖ ផ្លូវលំប្រវែងជាង ២០ គីឡូម៉ែត្រ នៅក្នុងឃុំអូរម្រះក៏ពិបាកខ្លាំងដែរ ប្រជាពលរដ្ឋធ្វើដំណើរដឹកកសិផល សិស្សសាលាទៅរៀនក៏មិនទាន់ម៉ោង ស្ត្រីមានផ្ទៃពោះក៏ពិបាកទៅរកសេវាសុខភាព ដូចនេះស្នើឲ្យក្រសួងអភិវឌ្ឍន៍ជនបទ ជួយជួសជុលឬកែសំរួលយ៉ាងណាឲ្យប្រជាពលរដ្ឋ ងាយស្រួលក្នុងការធ្វើដំណើរផង ពីព្រោះឃុំពុំមានលទ្ធភាពក្នុងការស្ថាបនានិងជួសជុលទេ ដោយសារថវិកាមូលនិធិឃុំមានតិចតួច ហើយគោល ដៅអភិវឌ្ឍន៍មានច្រើន ។
លោក សាន វិសាល អនុរដ្ឋលេខាធិការក្រសួងអភិវឌ្ឍន៍ជនបទមានប្រសាសន៍ទទួលស្គាល់ថាៈ ផ្លូវលំនៅតាមទីជនបទពិតជានៅមិនទាន់មានគុណភាពឆ្លើយតាមនិងការប្រើប្រាស់របស់ប្រជាពលរដ្ឋឡើយដោយសាតែប៉ុន្មានឆ្នាំចុងក្រោយនេះផ្លូវមួយចំនួនរងគ្រោះដោយសាទឹកជំនន់ ។
លោកបញ្ជាក់ថា ៖ បញ្ហានេះក្រសួងក៏ដូចជារាជរដ្ឋាភិបាលបានជំរុញដល់ការអភិវឌ្ឍន៍នូវហេដ្ឋារចនាសម្ពន្ធ័ឲ្យមានដល់ទីជនបទ គ្រាន់តែការរៀបចំនៅមានគម្រិតដូចនេះ បញ្ហាស្នើឡើងរបស់អាជ្ញាធរឃុំ និងប្រជាពលរដ្ឋត្រូវតែដោះស្រាយ ។
ជាមួយនេះលោកបានណែនាំ ឲ្យមន្ទីរអភិវឌ្ឍន៍ជនបទខេត្តស្ទឹងត្រែង ដឹកនាំក្រុមការងារបច្ចេកទេសចុះទៅពិនិត្យផ្ទាល់ គ្រប់ផ្លូវលំដែលអាជ្ញាធរឃុំបានលើកឡើង ហើយធ្វើផែនការ និងលើកគម្រោងស្ថាបនា ឬជួសជុលទាំងផ្លូវ ស្ពាន លូ ជូនប្រជាពលរដ្ឋយើងឲ្យបានឆាប់ ។
លោក មិញ ស៊ីចាយ ប្រធានមន្ទីរអភិវឌ្ឍន៍ជនបទខេត្តស្ទឹងត្រែង បានទទួលយកនូវការណែនាំនេះហើយ
ប្តេជ្ញាខិតខំប្រឹងប្រែងប្រែងបំពេញ កិច្ចការងារនេះឲ្យបានឆ្លើយតបតាមសំណូមពរ ។
លោកប្រធានមន្ទីរបញ្ជាក់ថា ៖ នេះក៏ជាទិសដៅក្នុងឆ្នាំ ២០១៥ ក្នុងការអភិវឌ្ឍន៍តាម ផែនការរបស់ក្រសួង និងយុទ្ធសាស្ត្រចតុកោណរបស់រាជរដ្ឋាភិបាល ដើម្បីទាញយកផលប្រយោជន៍ ពីចំណងទាក់ទងរវាងជនបទ និងទីក្រុងសំរាប់កិច្ចអភិវឌ្ឍន៍តាមរយៈការលើកកំពស់សេដ្ឋកិច្ចជនបទ និងការបង្កើតការងារធ្វើ ។
សូមបញ្ជាក់ថា ៖ ផ្លូវលំជនបទបណ្តាឃុំក្នុងខេត្តដែលឃុំបានស្នើឡើងនេះ មានឃុំកោះ សំពាយ ឃុំអន្លុងជ្រៃ ឃុំថាឡាបរិវ៉ាត់ ឃុំសំអាង ឃុះអូរម្រះ និងឃុំស្រែឬស្សី។ល ៕
