អ្នកចាំទីរបស់ក្លឹប Barcelona Victor Valdes អាចនឹងត្រូវបញ្ចប់អាជីព ដោយសាររងរបួសក្បាលជង្គង់យ៉ាងធ្ងន់ធ្ងរ កីទ្បាករ Victor Valdes ជាអ្នកចាំទីរបស់ក្លឹប Barcelona អាចនឹងត្រូវបញ្ចប់អជីពរបស់ខ្លួន ក្រោយពីកីទ្បាកររូបនេះ រងរបួសក្បាលជង្គង់យ៉ាងធ្ងន់ធ្ងរ អំឡុងពេលជួបជាមួយក្រុម Celta Vigo កាលពីយប់ថ្ងៃពុធ ។
អ្នកចាំទីសញ្ជាតិអេស្ប៉ាញម្នាក់នេះ នឹងត្រូវការវះកាត់របួសក្បាលជង្គង់ ក្រោយពេល លោកលោតចាប់បាល់ របស់ Celta Vigo រួចធ្លាក់មកវិញ ត្រូវក្បាលជង្គង់យ៉ាងដំណំ ហើយត្រូវបានបញ្ជូនបន្ត ទៅកាន់មន្ទីរពេទ្យភ្លាមៗ ។ សូមបញ្ជាក់ថា កីទ្បាករ Valdes បានចូលលេងឲ្យក្លឹប Barcelona ជាលើកដំបូងនៅឆ្នាំ២០០២នោះ ហើយទោះបីជា Barcelona បានយកឈ្នះ
ដោយលទ្ធផល ៣-០ ក៏ពិតមែន ប៉ុន្តែក្លឹបនេះ បានរងផលប៉ះពាល់យ៉ាងខ្លាំង ដោយសារតែ Valdes ត្រូវអវត្តមានពីការប្រកួតយ៉ាងហោចណាស់៧ខែ ដូច្នេះវាមានការពិបាក ក្នុងការប្រជែងពាន La Liga ពានរង្វាន់ Copa del Rey និង UEFA Champions Leagueផងដែរ។ ក្រោយពីបញ្ចប់ការប្រកួត Neymar បានបង្ហាញពីអារម្មណ៍ផ្ទាល់ខ្លួនថា យើងពិតជាក្រៀមក្រំ
ណាស់ ចំពោះការរងរបួសរបស់ Valdes ។ លោក Tata Martino ដែលជាគ្រូបង្វឹករបស់ F C Barcelonaមិនបាននិយាយអ្វីទាំងអស់ ជុំវិញស្ថានភាពរបួស របស់អ្នកចាំទីរូបនេះ ដោយលោកគ្រាន់តែនិយាយថា បញ្ហានេះវាជាសម្ពាធរបស់ក្លឹប តែទោះយ៉ាងណាក៏ដោយ យើងនិងព្យាយាមដោះស្រាយឲ្យបានល្អនៅបញ្ហានេះ ។
ខណៈនោះប្រធានក្លឹប Barcelona បានបើកភ្លើងខៀវ ឲ្យទិញកីឡាករជាបន្ទាន់ម្នាក់ ប៉ុន្តែគ្រូបង្វឹក Barcelona នៅមិនទាន់មានជំរើសនៅឡើយទេ ។ លោកបានបញ្ជាក់ទៀតថា យើងមិនចាំបាច់ទិញអ្នកចាំទីបន្ថែមទេ ព្រោះក្លឹបនៅមានកីឡាករល្អជាច្រើនសំរាប់ក្រុមនេះ ៕
