សៀមរាប : នៅព្រឹកថ្ងៃទី២៨ ខែមីនា ឆ្នាំ២០១៤នេះលោកវរសេនីយ៍ឯក តេង ច័ន្ទណាត ស្នងការរងទទួលបន្ទុកចរាចរណ៍ និង លោក វរសេនីយ៍ទោ ជឹម សុវណ្ណ នាយការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប ។ ដោយមានការរួមដំណើរពីសំណាក់ អស់លោកជានាយរងការិយាល័យនិងមន្ត្រីនគរបាលចរាចរណ៍ជាច្រើនរូបទៀតតំណាងដ៏ខ្ពង់ខ្ពស់ពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប។បានអញ្ជើញទៅចូលរួមក្នុងពិធីគោរពវិញ្ញាណក្ខ័ន្ធ និង ចូលរួមរំលែកទុក្ខជាមួយក្រុមគ្រួសារសពលោកព្រិន្ទបាលឯក ស៊ូ សុផល ដែលជាមន្ត្រីនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប ។
ដែលលោកបានទទួលមរណះភាពកាលពីថ្ងៃទី២៤ខែមីនាឆ្នាំ២០១៤កន្លងទៅនេះនៅក្នុងជន្មាយុ៤៣ឆ្នាំដោយជម្ងឺលើសឈាម។ដោយពិធីនេះបានប្រារព្វធ្វើឡើងនៅគេហដ្ឋាននៃសពដែលស្ថិតនៅក្នុង ភូមិស្ទឹងថ្មី សង្កាត់ស្វាយដង្គំ ក្រុងសៀមរាបផ្ទាល់តែម្តង។ដោយអស់លោកក៏បានធ្វើការបូជាទៀនធូក ដើម្បីឧទ្ទិសជូនដល់ដួងវិញ្ញាណក្ខ័ន្តសពលោកព្រិន្ទបាលឯក ស៊ូ សុផល សូម ឲ្យបានទៅកាន់សុខតិភពផងដែរ។
ដោយអស់លោកក្នុងនាមជាថ្នាក់ដឹកនាំក្នុងជូរកងកម្លាំងនគរបាលជាតិទាំងអស់ក៏បានចូលរួមសម្តែងនូវការអាណិតអាសូរយ៉ាងខ្លាំងចំពោះ ក្រុមគ្រួសារសព ដែលធ្វើ ឲ្យមានការសោកស្តាយយ៉ាងខ្លាំងដែលបានបាត់បង់នៅកងកម្លាំងនគរបាលជាតិម្នាក់ដូចជារូបលោក ព្រិន្ទបាលឯក ស៊ូ សុផល ដែលធ្លាប់បានបំពេញការងារភារះកិច្ចស្នូលរបស់ខ្លួនជូនជាតិមាតុភូមិពោលគឺជូនបងប្អូនប្រជាពលរដ្ឋកន្លងមកក្នុងខេត្តសៀមរាបបានយ៉ាងល្អប្រសើរ។
ដោយអស់លោកក្នុងនាមជំនួសមុខឲ្យថ្នាក់ដឹកនាំនៃស្នងការដ្ឋាននគរបាលខេត្តសៀមរាបទាំងអស់នៅតែចងចាំមិនភ្លេចចំពោះស្នាដៃកន្លងមកដែលសពលោកព្រិន្ទបាលឯក ស៊ូ សុផលជា មន្ត្រីនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាបបានបន្សល់ទុកជាមេរៀន ល្អៗសម្រាប់ធ្វើឲ្យកងកម្លាំងនគរបាលជំនាន់ក្រោយៗទៀតយកទៅអនុវត្តបន្តផងដែរ។
ដោយនៅក្នុងការចូលរួមរំលែកទុក្ខនោះដែរក្នុងនាមតំណាងដ៏ខ្ពង់ខ្ពស់ពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបអស់លោកក៏បាននាំយកនូវថវិកាផ្ទាល់របស់លោក ឩត្តមសេនីយ៍ទោ សត ណាឌី ចំនួន១លានរៀលមកធ្វើការប្រគល់ជូនដល់គ្រួសារសពផងដែរ។
បើទោះបីជាថវិកាទាំងអស់នេះមិនស្មើនិងការបាត់បង់អាយុជីវិតរបស់សពលោកព្រិន្ទបាលឯក ស៊ូ សុផល ក៏ពិតមែនតែនេះក៏ជាការជួញឩបត្ថមដល់ក្រុមគ្រួសារសពសម្រាប់យកទៅប្រើប្រាស់ទៅតាមតំរូវការនៅក្នុងពិធីបុណ្យនេះបានមួយចំនួនផងដែរ៕ ដោយ លោក ខេង ខេមរា
