កំពង់ធំៈ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំប្រតិភូ នាំយកអំណោយមានអង្ករ ១តោន និងមីយើង១៥កេស ចែកជូនដល់គ្រួសារកងទ័ព ដើម្បីជួយដោះស្រាយជីវភាព ខ្វះខាតនៅ ក្នុងវរៈសេនាតូចលេខ១ ស្ថិតនៅភូមិ តាឡែកថ្មី ឃុំសាលាវិស័យ ស្រុកប្រាសាទបាល័ង្គ ខេត្តកំពង់ធំ កាលពីរសៀលថ្ងៃទី ៣១ ខែ មិនា ឆ្នាំ២០១៥ ។
បន្ទាប់ពីឯកឧត្តម មេបញ្ជាការ សោម ស៊ុន ចែកអំណោយជូនដល់គ្រួសារកងទ័ពរួចមក ក៏បានអញ្ជើញចុះត្រួតពិនិត្យ ការសាងសង់ឃ្លាំងសម្រាប់ទុកដាក់សម្ភារៈសឹក និង ដែលត្រូវបានដំណើរការសាងសង់បាន៣០ភាគរយ មានទំហំ ៦គុណនិង១២ជញ្ជាំងឥដ្ឋ ប្រកស័ង្កសី ក្រោមការជំនួយឧបត្ថម្ភរបស់ ឯកឧត្តម ឧត្តមសេនីយ៍ឯក ហ៊ុន ម៉ាណែត នូវស៊ីម៉ង់ត៍ ១០តោន ព្រមទាំងថវិការ ៥០០០ដុល្លា ក្នុងនោះក៏មានការឧបត្ថម្ភជាជំនួយរបស់ ឯកឧត្តម ឧត្តមសេនីយ៍ឯក ង៉ែត ណារិន្ទ នាយកនាយកដ្ឋានវិស្វកម្ម ក្រសួងការពារជាតិ បានឧបត្ថម្ភស័ង្កសីចំនួន ១០០០សន្លឹក និងឯកឧត្តម អ៊ុត សំអន អភិបាល នៃគណៈអភិបាលខេត្តកំពង់ធំ បានឧបត្ថម្ភស៊ីម៉ង់ត៍ ចំនួន ៥តោន ផងដែរ ។
ឯកឧត្តម ឧត្តមសេនីយ៍ត្រី សោម ស៊ុន បានផ្តាំផ្ញើរ និងសួរសុខទុក្ខរបស់ គ្រួសារកងទ័ព ជាពិសេសក្មេងដែលប្រឈមមុខនិងជំងឺនារដូវក្តៅ និងសូមឲ្យមាតាបិតា បង្កើតការប្រុងប្រយ័ត្នខ្ពស់ អាចនឹងកើតជំងឺរាករូសបាន ព្រោះអាកាសធាតុ ក្តៅ អាចនឹងឆ្លងជំងឺតាមចំណីអាហារបានយ៉ាងងាយ និងសូមឲ្យថែរក្សាសុខភាពអានាម័យ ទាំងចំណីអាហារ និងសំលៀកបំពាក់ ជាពិសេសសូមឲ្យគ្រួសារទ័ពទាំងអស់ ការពារឲ្យបាន នូវការចំអិនអាហារ និងការប្រើប្រាស់ភ្លើងអាចនិង បង្កើតឲ្យមាននូវអគ្គីភ័យឆាបឆេះបាន នៅពេលដែលយើងមានការធ្វេសប្រហែស ។
ជាចុងក្រោយឯកឧត្តម បានសំណូមពរ ឲ្យនាយទាហាន និងពលទាហាន រួមទាំងគ្រួសារទ័ពទាំងអស់ ជួយគ្នាថែរក្សា នូវសមិទ្ធិផលនានានៅក្នុងបន្ទាយ ដែលបានកសាងរួច កុំឲ្យមានការប្រឡាក់ ឬគូសជារូប និងការបែកបាក់ ព្រោះសមិទ្ធិផលទាំងនេះ មានតំលៃខ្លាំងណាស់ សម្រាប់ការប្រើប្រាស់ ក្នុងវិស័យទ័ព និងជាជំនួនដ៏ថ្លៃថ្លារបស់សម្បុរសជន ដែលលោកបានកាត់ពីមាត់ពីក៏ ចែករំលែកចូនដល់ កងទ័ពសម្រាប់ប្រើប្រាស់គ្រប់ជំនាន់ទៅយូរអង្វែងខាងមុខទៀត ។
