កំពង់ធំៈ ការបើកវគ្គហ្វឹកហ្វឺន ដើម្បីបំប៉នជំនាញដល់កងយោធពលខេមរៈភូមិន្ទ ចំណុះឲ្យតំបន់ប្រតិបត្តិការសឹករងកំពង់ធំ ដែលមានរយះពេល៤៥ថ្ងៃ ដោយមានការចូលរួមផ្នែកសឹករងទាំង៨ និងវរៈសេនាតូចលេខ ១ លេខ២ ត្រូវបាន បញ្ចប់នៅព្រឹកថ្ងៃទី ៣ ខែ មេសា ឆ្នាំ ២០១៥ស្ថិតនៅចំនុចព្រំប្រទល់ ស្រុកប្រាសាទបាល័ង្គ និងស្រុកកំពង់ស្វាយ ។
លោក វរៈសេនីយ៍ទោ ថន ស៊ីកដ្កា មេបញ្ជាការវរៈសេនាតូចលេខ១ និងជាអនុប្រធានគ្រប់គ្រប់វគ្គសិក្សានេះបានបញ្ជាក់ ពីការធ្វើយុទ្ធដំណើរ រយះពេល២ថ្ងៃ ១យប់ ដែលមានចម្ងាយដី ៣៣គីឡូម៉ែត្រ និងមានការចូលរួម បូកទាំងគ្រូវ និងអ្នកបច្ចេកទេសក្នុងយុទ្ធវិធី សមយុទ្ធ សរុបចំនួន ២៥០នាក់ ការធ្វើយុទ្ធដំណើរនេះ បានចេញដំណើរពី ភូមិនថ្នល់បែក ស្រុកកំពង់ស្វាយ បានដើរកាត់ ព្រៃតូចធំ កាត់អូរ បឹងបួរ ឆ្លងកាត់ និងវាលលំហរកណ្តាលថ្ងៃក្តៅ សង្កេតឃើញថា សិក្ខាកាមមានចិត្តអំណត់អត់ធ្មត់ ព្យាយាម និងយកចិត្តទុកដាក់ និងសម្រេចបានលទ្ធផលជោគជ័យ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានឲ្យដឹងថា ការលើកយកវិញ្ញាសារ ការធ្វើយុទ្ធដំណើរ ដល់សិក្ខាមនេះ គឺក្នុងគោលបំណងឲ្យទ័ពថ្មី យល់ពីវិន័យកងទ័ព និងការរួមរស់ជាក្រុម ន ចេះសាមគ្គីគ្នា និងយល់ពីយុទ្ធវិធីក្នុងការប្រយុទ្ធជាមួយនិងគូរសត្រូវ ដើម្បីការពារខ្លួនឲ្យមានសុវត្តិភាព ដោយត្រឹមត្រូវ និងជាគំរូដ៏ត្រឹមត្រូវដល់ប្អូនៗជំនាន់ក្រោយ ។
ឯកឧត្តម បានបញ្ជាក់ថា ការហ្វឹកហាត់នូវយុវិធីនេះ គឺមានសារៈសំខាន់ណាស់ សម្រាប់ការប្រើប្រាស់ជិវិតប្រចាំថ្ងៃរបស់ទ័ព ដែលចាំបាច់ណាស់ត្រូវតែចេះនូវក្បួនយុទ្ធសាស្ត្រ គ្រប់សព្វបែបយ៉ាង ទាំងវិន័យ សណ្តាប់ធ្នាប់ ទាំងការប្រុងប្រៀប និងការគោរពប្រនិបត្តិចំពោះថ្នាក់ដឹកនាំ ជាពិសេសទៅទៀតនោះ ក្នុងនាមជាកងកម្លាំងបំរើឲ្យរាជរដ្ឋាភិបាល ត្រូវតែមានស្មារតី សុខភាពល្អ កម្លាំងមាំមួន មានគុណភាពក្នុងការងារ ត្រៀម២៤ម៉ោង លើ២៤ម៉ោង សម្រាប់ការទទួល បទបញ្ជាពីថ្នាក់ដឹកនាំ និងសូមឲ្យប្អូនទាំងអស់យកចិត្តទុកដាក់ សិក្សារៀនសូត្របន្ថែម និងសង្ឃឹមថាប្អូនទទួលបានចំណេះដឹងដ៏មានសារៈសំខាន់ ទៅប្រើប្រាស់ឲ្យមានប្រយោជន៍ដល់សង្គមជាតិ។
ដោយ ប៊ុន រដ្ឋា
