បាត់ដំបង: មានអ្នកសារព័ត៌មានជាច្រើនរូប ដែលមកពីគ្រប់ស្ថាប័នក្នុងខេត្តបាត់ដំបង បានមកជួបជុំគ្នា នៅក្នុងស្ថានីយ៍វិទ្យុប៉ុស្តិ៍ចំការចេក កាលពីរសៀលថ្ងៃទី3-4-15 ដើម្បីស្វាគមន៍
ដល់លោកអភិបាល នៃគណ:អភិបាលខេត្ត ច័ន្ទ សុផល ដែលលោកអញ្ជើញចុះមកជួប និងធ្វើការសំណេះសំណាល នាឱកាសឆ្នាំថ្មីប្រពៃណីជាតិ ដែលនឹងឈានចូលមកដល់នាពេលដ៏ខ្លីខាងមុខនេះ។
ក្នុងឱកាសនោះដែរគេសង្គេតឃើញមានវត្តមានដ៏ខ្ពង់ខ្ពស់របស់លោកច័ន្ទ សុផល
អភិបាលនៃគណ:អភិបាលខេត្ត លោកអ៊ុក វង្ស ប្រធានក្រុមប្រឹក្សាខេត្ត ប្រធានមន្ទីរនានាជុំវិញខេត្ត កងកំលាំងប្រដាប់អាវុធ និងបណ្តាអ្នកសារព័ត៌មានគ្រប់អង្គភាពក្នុងខេត្តជាច្រើនរូបផងដែរ។
ជាកិច្ចចាប់ផ្តើម លោកគ្រី ចំរុើន ប្រធានមន្ទីរព័ត៌មានបានឡើងអានរបាយការណ៍ស្វាគមន៍
ព្រមទាំងបានលើកឡើងនូវប្រវត្តិនៃមន្ទីរនេះដែលមានអាយុកាលជាង14ឆ្នាំមកហើយ ដែលបច្ចុប្បន្នវិស័យព័ត៌មាន មានការលូតលាស់ និងជឿនលឿនយ៉ាងខ្លាំងក្លាគួរអោយកត់សំគាល់។លោកប្រធាន មន្ទីរក៏បានក្រើនរំលឹកដល់បណ្តាអ្នកសារព័ត៌មានទាំងអស់ ត្រូវចេះថ្លឹងថ្លែងនូវប្រភេទព័ត៌មានអោយ បានច្បាស់លាស់ដើម្បីសមស្របទៅនឹងក្រមសីលធ៌ម និងវិជ្ជាជីវ:របស់ខ្លួន មុននឹងសរសេរ។ 
បន្ទាប់មកលោកអភិបាលខេត្តច័ន្ទ សុផល បានធ្វើការកោតសរសើរយ៉ាងក្រៃលែងដល់
អង្គភាពព័ត៌មានដែលមានការវិវឌ្ឍន៍យ៉ាងឆាប់រហ័ស ស្របពេលនឹងបច្ចុប្បន្នបច្ចេកវិជ្ជាក៏ទំនើបៗ ដែលជាកត្តាមួយដ៏សំខាន់សំរាប់អ្នកសារព័ត៌មានក្នុងការបំពេញការងាររបស់ខ្លួន។
លោកអភិបាលខេត្តបានសង្កត់ធ្ងន់ថា បណ្តាញព័ត៌មានគឺមានសារសំខាន់ណាស់ក្នុងការ
ផ្តល់ដំណឹងទៅដល់គ្រប់មជ្ឈដ្ឋាន នៅទូទាំងពិភពលោក ហើយក៏ជាកញ្ចក់សំរាប់ឆ្លុះបញ្ចាំងសង្គម ផងដែរ ព្រមទាំងបានធ្វើការលាតត្រដាងអំពីអ្វីដែលល្អ និងអ្វីដែលអាក្រក់ ប៉ុន្តែធ្វើយ៉ាងណាសំរាប់
យើងទាំងអស់គ្នា មេត្តាកុំក្បត់ឧត្តមគតិខ្លួនឯងអោយសោះ ត្រូវធ្វើអោយបានត្រឹមត្រូវតាមក្រមសីលធ៌ម និងវិជ្ជាជីវ:របស់ខ្លួន ទើបឈ្មោះយើងមិនងាយសាបសូន្យឡើយ។ម្យ៉ាងទៀតវិស័យព័ត៌មានគឺជាស្ពាន សំរាប់ចម្លង ហើយក៏មានតួនាទីយ៉ាងសំខាន់ក្នុងការអភិវឌ្ឍន៍ប្រទេសជាតិ ដែលគ្មានប្រទេសណាមួយ ខ្វះវិស័យព័ត៌មាននេះបានឡើយ ព្រោះមានបញ្ហាខ្លះក៏ត្រូវពឹងផ្អែកទៅលើព័ត៌មាននេះដែរ នៅពេលដែល យើងបានដឹង ឧទាហរណ៍ថាបើមានដុំរងើកភ្លើងដ៏តូចមួយកំពុងតែឆេះ គឺយើងត្រូវរិះរកវិធានការយ៉ាងណា ដើម្បីទប់ស្កាត់ដើម្បីពន្លត់វា ដោយមិនត្រូវសំងំទុកអោយដុំភ្លើងដ៏តូចនោះក្លាយជាអគ្គីភ័យបានឡើយ។ទន្ទឹមនឹងខេត្តបាត់ដំបងបច្ចុប្បន្នដែលទទួលបាននូវផ្ការំដួលបីទងលើប្រធានបទទីក្រុងស្អាត
ក៏ក្នុងនាមអភិបាលខេត្ត គឺលោកនៅតែបន្តធ្វើការអភិវឌ្ឍន៍ ដោយកែប្រែមុខមាត់ខេត្តអោយបានល្អប្រសើ ជាងនេះតទៅទៀត ហើយនៅពេលខាងមុខលោកសង្ឃឹមថា ខេត្តបាត់ដំបងនឹងមានឈ្មោះជាខេត្ត ដែលផ្ទុកដោុជង្រុកស្រូវជាមិនខាន ដោយសារតែបន្តិចទៀតប្រភពទឹកក្នុងខេត្តចាប់ផ្តើមមានស្ទើរតែ គ្រប់ទីកន្លែងដូចជា អាងទឹកកំពីងពួយ ទំនប់ទឹកកង្ហត និងទំនប់ទឹកសេកសក ដែលកត្តាទាំងនេះហើយ អាចធ្វើអោយប្រជាពលរដ្ឋមានទឹកធ្វើស្រែជាប់ជាប្រចាំ ដោយអាចធ្វើបានក្នុងមួយឆ្នាំបីដង ហើយបើ កសិករធ្វើស្រែបានច្រើន អាជីវករដែលលក់ដូរនៅតាមទីផ្សារក៏អាចមានជីវភាពធូរធារទៅតាមហ្នឹងដែរ ឯវិស័យទេសចរណ៍ក៏កាន់តែមានការរីកចំរើន ព្រោះបាត់ដំបងឥឡូវមានភ្ញៀវជាតិ និងអន្តរជាតិ ចេញចូលច្រើឡើងគួរអោយកត់សំគាល់។
នៅល្ងាចថ្ងៃដដែលនោះដែរលោកអភិបាលខេត្តក៏បានអញ្ជើញទៅកាត់ខ្សែបូរជានិមិត្តរូប
នៃការសម្ពោធនូវសម្មិទ្ធិផលនានាដែលលោកស្នងការ ស ថេត បានកសាងឡើងយ៉ាងច្រើននៅក្នុង ស្នងការដ្ឋានគរបាលខេត្ត ដែលសរុបជាទឹកប្រាក់អស់ប្រមាណជាង12មុឺនដុល្លារសហរដ្ឋអាមេរិក ប៉ុន្តែសម្មិទ្ធិផលទាំងនេះនៅមិនទាន់រួចរាល់ជាស្ថាពរនៅឡើយទេ ព្រោះនៅមានទីតាំងជាច្រើនទៀត ដែលត្រូវធ្វើបន្ត។នៅក្នុងរាត្រីនោះដែរក៏មានរៀបចំជាពិធីជប់លៀងដើម្បីអបអរសាទរដល់ថ្ងៃបុណ្យ ចូលឆ្នាំដែលជាបុណ្យប្រពៃណីជាតិខ្មែរនាពេលខាងមុខនេះ៕
