ខេត្តព្រះសីហនុកាលពីថ្ងៃរសៀលថ្ងៃទី ២៣ ខែមេសា ឆ្នាំ ២០១៥ នៅសាលប្រជុំសាលាខេត្តព្រះសីហនុ បានរៀបចំកិច្ចប្រជុំដើម្បីត្រៀមលក្ខណៈរៀបចំប្រារព្ធទិវាអន្តរជាតិ កាកបាទក្រហម អឌ្ឍចន្ទ័ក្រហម ៨ឧសភា ខួបទី១៥២ឆ្នាំ ក្រោមប្រធានបទ “ កម្លាំងមនុស្សធម៌ គោលកាណ៌គ្រឹះក្នុងសកម្មភាព ” ក្រោមអធិបតីភាពឯកឧត្តម ឈិត សុខុន អភិបាលនៃគណអភិបាលខេត្តព្រះសីហនុ និងជាប្រធានកិត្តិយសសាខាកាកបាទក្រហមកម្ពុជាខេត្ត និងឯកឧត្តម លូ គឹមឈន់ ប្រធានសាខាកាកបាទក្រហមកម្ពុជាខេត្តព្រះសីហនុ និងជាអគ្គនាយកកំពង់ផែស្វយ័តក្រុងព្រះសីហនុ ។
ឯកឧត្តម ឈិត សុខុន មានប្រសាសន៍បើកកិច្ចប្រជុំថា ទិវាពិភពលោកកាកបាទក្រហម អឌ្ឍច័ន្ទក្រហម៨ ឧសភា ឆ្នាំ២០១៥នៅខេត្តព្រះសីហនុយើងនឹងរៀបចំនៅថ្ងៃទី០៥ ខែឧសភា ឆ្នាំ២០១៥ ក្នុងនោះបង្កើតគណៈកម្មការបម្រើឲ្យការរៀបចំទិវា ៨ឧសភា ឆ្នាំ២០១៥ខាងមុខឪ្យទទួលបានជោគជ័យ ដើម្បីកៀរគររកថវិកាជួយទ្រទ្រង់ដល់សាខាកាកបាទក្រហមកម្ពុជាខេត្តព្រះសីហនុ ហើយថិវកាដែលយើងប្រមូលបានពីពិធីកាកបាទក្រហម៨ ឧសភា ដើម្បីយកទៅជួយសង្គ្រោះដល់ជនរងគ្រោះដោយសារគ្រោះមហន្តរាយនានា ដូចគ្រោះធម្មជាតិ ឬដោយប្រការណាមួយ ជាពិសេសជួយដល់ចាស់ជរាគ្មានទីពឹង ក្មេងកំព្រាជាដើម និងជនងាយរងគ្រោះផ្សេងទៀត។
ឯកឧត្តមអភិបាលខេត្ត បានបន្តថា ទិវាកាកបាទក្រហម និងអឌ្ឍចន្ទ័ក្រហម ៨ឧសភា ឆ្នាំនេះ ក៌មិនខុសពីឆ្នាំមុនៗដែរ យើងត្រូវផ្សព្វផ្សាយ និងអំពាវនាវដល់សប្បុរសជន អង្គការសង្គមស៊ីវិល ក្រុមហ៊ុនឯកជននានា ឲ្យចូលរួមជួយឧបត្ថម្ភគាំទ្រជាសម្ភារះប្រើប្រាស់ផ្សេងៗ សម្រាប់ការចាប់ឆ្នោតផ្សងសំណាងដល់សមាជិក សមាជិកា ចូលរួមក្នុងពិធី និងប្រមូលថវិកា ដើម្បីជួយដល់សាខាកាកបាទក្រហមកម្ពុជាខេត្តព្រះសីហនុ ។
ឯកឧត្តមប្រធានកិត្តិយសសាខាកាកបាទក្រហមខេត្តព្រះសីហនុ ក៏បានសំណូមពរដល់ថ្នាក់ដឹកនាំមន្ទីរអង្គភាព និងស្ថាប័នជុំវិញខេត្ត ព្រមទាំងអនុសាខាទាំងអស់ផ្សព្វផ្សាយដល់សមាជិក សមាជិកានៅតាមអនុសាខា ដើម្បីប្រមូលថវិកាពីសមាជិកភាពមកបង់ឲ្យបានមុនពិធីដំណើរការ និងសុំឲ្យប្រធានមន្ទីរ អង្គភាព ក្រុង ស្រុក និងសប្បុរសជននានាបន្តជួយឧបត្ថម្ភថវិកា សម្ភារះដល់សាខាកាកបាតក្រហមកម្ពុជា ខេត្តព្រះសីហនុបន្ថែមទៀតក្នុងការជួយសង្គ្រោះដល់ជនរងគ្រោះបានទាន់ពេលវេលា ៕ 
