បាត់ដំបង: ប្រជាពលរដ្ឋចំនួន67គ្រួសារដែលរស់នៅភូមិក្បាលថ្នល់ ឃុំកំពង់ព្រៀង ស្រុកសង្កែ
ខេត្តបាត់ដំបង បាននិងកំពុងរង់ចាំដោយក្តីអន្ទះសារ នូវការរកដំណោះស្រាយរបស់អាជ្ញាធរខេត្តដោយសារតែរដូវភ្លៀងកាន់តែខិតជិតមកដល់ហើយ បន្ទាប់ពីផ្ទៃដីបឹងតាអឿដែលមានទំហំជិតមួយហិកតានេះ ត្រូវបានបុគ្គលមួយរូបខំប្រឹងរត់ការដើម្បីជ្រែយកបឹងនេះមកធ្វើជាកម្មសិទ្ធិឯកជន។
គួររំលឹកដែរថា តាមការស្រាវជ្រាវមួយរយ:កន្លងមកទាំងចាស់ព្រឹទ្ធាចារ្យនៅក្នុងភូមិ
ទាំងលោកចៅ គិមអូន អនុប្រធានមន្ទីរដែនដីនគរូបនីយកម្ម ដែលបានចូលនិវត្តន៍ ក៏ដូចជាលោកសួន សាវ៉េត អភិបាលស្រុកសង្កែ សុទ្ធតែបានអះអាងយ៉ាងមុតមាំថា ដីឡូតិ៍ដែលមានក្បាលដីលេខ67ស្ថិតនៅក្នុងភូមិក្បាលថ្នល់ ឃុំកំពង់ព្រៀង ពិតជាដី”បឹងតាអឿ”ដែលមានតាំងពីបុរាណកាលមកយ៉ាងពិតប្រាកដ ហើយក៏ជាសម្បត្តិរដ្ឋដែលមិនអាចអោយបុគ្គលណាមួយយកធ្វើជាកម្មសិទ្ធិឯកជនបានឡើយ ម្យ៉ាងទៀតប្លង់ដីរបស់ប្រជាពលរដ្ឋដែលបានចងក្រងជាប្រព័ន្ធដោយមន្ទីរដែនដីនគរូបនីយកម្មកាលពីអំឡុងឆ្នាំ2008ក៏បានបញ្ជាក់យ៉ាងច្បាស់នូវព្រំប្រទល់ប្លង់នីមួយៗសុទ្ធតែជាប់ជាមួយនឹងនឹងតាអឿទាំងអស់ ដែលគ្មានអ្វីអាចមកប្រកែកបានឡើយ។
ប្រជាពលរដ្ឋជាច្រើនគ្រួសារបានកើតមាននូវចម្ងល់យ៉ាងខ្លាំងអំពីដំណោះស្រាយរបស់អាជ្ញាធរតាំងពីជំនាន់លោកអភិបាលខេត្តប្រាជ្ញ ចន្ទ រហូតមកដល់លោកអភិបាលខេត្តច័ន្ទ សុផល ក៏នៅតែមិនទាន់រកច្រកចេញបាន ព្រោះបើគេរំលឹកឡើងវិញនូវឯកសារមួយចំនួនក្នុងការចុះរកដំណោះស្រាយកាលពីរសៀលថ្ងៃទី10ខែមិថុនាឆ្នាំ2013 នៅក្នុងបរិវេណវត្តបឹងឈូក ដែលកាលណោះសមាសភាពចូលរួមមាន លោកអុិន ប៊ុនម៉ាត់នាយករងទីចាត់ការអន្តរវិស័យនៃសាលាខេត្តបាត់ដំបង លោកសួន សាវ៉េត អភិបាលស្រុកសង្កែលោកមេឃុំង៉ែត សឿ ព្រមទាំងមានប្រជាពលរដ្ឋចូលរួមប្រមាណ300នាក់ផង។
ក្នុងវេទិការសាធារណ:នាឱកាសនោះ ប្រជាពលរដ្ឋបានលើកឡើងនូវ3ចំនុចដោយទីមួយ
សុំអោយក្រុមហ៊ុនចិនដែលកាយប្រលាយត្រូវធ្វើស្ពានឆ្លងចំនួន16ស្ពាន ទីពីរសុំអោយរក្សាទុកនូវបឹងតាអឿ ជាសម្បត្តិរដ្ឋ និងទីបីសុំអោយអាជ្ញាធរជួយរកទីផ្សារសំរាប់កសិផលដែលប្រជាពលរដ្ឋផលិតបាន។
នៅពេលនោះដែរ ស្រាប់តែមានសំលេងទះដៃហ៊ោរកញ្ជ្រៀវយ៉ាងកងរំពង បន្ទាប់ពីលោក សួន សាវ៉េត និងលោកអុិន ប៊ុនម៉ាត់ បានប្រកាសសម្រេចរក្សាទុក”បឹងតាអឿ”ជាសម្បត្តិរដ្ឋ”
ដែលមានទំហំ9347ម៉ែត្រក្រឡា ដោយមិនអនុញ្ញាតិអោយបុគ្គលណាម្នាក់យកធ្វើជាកម្មសិទ្ធ
ឯកជនបានឡើយ។
ចាប់តាំងពីពេលនោះមកក្តីកង្វល់របស់ប្រជាពលរដ្ឋត្រូវបានរសាយចេញពីទ្រូង ដោយម្នាក់ៗ
គិតថា ពួកគេអាចមានបឹងដ៏ធំមួយដែលមានតាំងពីបុរាណមកនោះ សំរាប់រក្សាទឹកទុកប្រើប្រាស់នារដូវប្រាំង ហើយក៏អាចជួយរំដោះទឹកចេញបាននៅពេលមានទឹកជំនន់ម្តងៗនារដូវវស្សាផងដែរប៉ុន្តែក្រោយមកដោយសារតែបឹងនេះមានការរាក់ខ្លាំងពេកទើបនៅថ្ងៃទី5ខែមករាឆ្នាំ2015 លោកហើស គី ប្រធានសហគមន៍បឹងតាអឿ រួមជាមួយស្នាមមេដៃប្រជាពលរដ្ឋទាំង67គ្រួសារ បានធ្វើពាក្យស្នើសុំទៅអាជ្ញាធរខេត្ត តាមរយ:លោកមេភូមិក្បាលថ្នល់ លោកមេឃុំកំពង់ព្រៀង លោកអភិបាលស្រុកសង្កែ ក្នុងគោលបំនងសុំស្តារបឹងនេះឡើងវិញដើម្បីយកទឹស្រោចស្រពស្រូវនារដូវប្រាំង និងផលដំណាំនានាផងដែរ ទើបនៅថ្ងៃទី24ខែកុម្ភ:ឆ្នាំ2015 លោកអភិបាលខេត្តរងជាម ច័ន្ទសោភ័ណបានចេញលិខិតមួយច្បាប់ ដោយមានចំណារយល់ព្រមចុះថ្ងៃទី19ខែកុម្ភ:ឆ្នាំ2015 របស់លោកអភិបាលនៃគណ:អភិបាលខេត្តច័ន្ទ សុផល បានសម្រេចអោយប្រជាពលរដ្ឋនៅក្នុងសហគមន៍បឹងតាអឿនធ្វើការស្តារបឹងនេះឡើងវិញតាមសំណូមពរ។
សកម្មភាពស្តារបឹងដើម្បីផលប្រយោជន៍រួមនៅក្នុងសហគមន៍មិនទាន់ទាំងបានពាក់កណ្តាល ផង ក៏ស្រាប់តែលេចមុខលោកឡេង ស្រ៊ុន បានចុះទៅរារាំងដោយបានប្រកាសថាដីបឹងនេះគឺមានម្ចាស់ ដែលម្ចាស់ដីនេះមានឈ្មោះ ហេង ហុង និងអ្នកស្រីម៉ាក់ ចាន់ថន ដែលមានទីលំនៅ នៅក្នុងស្រុកគាស់ក្រឡឯណោះ ព្រមទាំងមានបញ្ជាពីស្ថាប័នតុលាការអោយដកគ្រឿងចក្រចេញពីក្នុងបឹងនេះផងដែរ ដែលធ្វើអោយប្រជាពលរដ្ឋទាំងអស់មានការងឿងឆ្ងល់ជាខ្លាំងអំពីការរារាំងនូវត្រារបស់លោកអភិបាលខេត្តបែបនេះ។
នៅថ្ងៃទី3ខែមេសាឆ្នាំ2015 ក្នុងសាលាឃុំកំពង់ព្រៀង បើទោះបីជាមានក្រុមគណ:កម្មការ
ដែលដឹកនាំដោយលោកអ៊ូ ដារី ប្រធានមន្ទីរដែនដីនគរូបនីយកម្មបានចុះទៅរកដំណោះស្រាយលើបញ្ហាបឹងតាអឿនេះយ៉ាងណាក៏ដោយ ក៏លទ្ធផលគឺទទួលបានជាអវិជ្ជមាន ដោយសារតែការចាប់ផ្តើមនិងការលើកឡើងរបស់លោកប្រធានមន្ទីរ វាស្ថិតនៅលើភាពលំអៀង និងមានទំនោរទៅរកបុគ្គលដែលចង់បានដីបឹងជាកម្មសិទ្ធិឯកជន ដោយហាក់បីដូចជាមិនឈរលើភាពយុត្តិធ៌មទាល់តែសោះ។
ដោយសារតែការទន្ទឹងរង់ចាំរបស់ប្រជាពលរដ្ឋទៅលើដំណោះស្រាយដោយក្តីអន្ទះសារ
ផងនោះកម្ពុជាថ្មី បានព្យាយាមសុំជួបជាមួយលោកព្រះរាជអាជ្ញានួន សាន ដើម្បីចង់ដឹងអំពីនិតិវិធីនៃការផ្អាកសកម្មភាពរបស់ប្រជាពលរដ្ឋក្នុងការស្តារបឹងដែលពួកគាត់មានច្បាប់ក្នុងដៃត្រឹមត្រូវហើយបច្ចុប្បន្នរដូវវស្សាក៏កាន់តែខិតជិតមកដល់ផងនោះ។នៅក្នុងជំនួបដែលមានរយ:ពេលប្រមាណ30នាទី លោកព្រះរាជអាជ្ញាបានលើកឡើងថាលោកពិតជាបានចេញបញ្ជាអោយផ្អាកសកម្មភាពគ្រឿងចក្រយ៉ាងពិតប្រាកដ ដោយសារតែមានការចូលមកបំភ្លឺពីភាគីម្ខាងទៀតដែលបានអះអាងថាដីឡូតិ៍លេខ67នេះគឺជាដីរបស់ខ្លួន ដូច្នេះលោកត្រូវតែធ្វើការផ្អាកជាបណ្តោះអាសន្ន ជៀសវាងនូវបញ្ហាណាមួយដែលអាចកើតមានឡើងជាយថាហេតុ ប៉ុន្តែរាល់បញ្ហាខាងលើនេះសូមប្រជាពលរដ្ឋទាំងអស់ត្រូវយល់ថាគឺមិនមានពាក់ព័ន្ធនឹងបទល្មើសព្រហ្មទណ្ឌអ្វីនោះឡើយ។
លោកនួន សាន បានបន្ថែមថា ថ្មីៗនេះលោកបានចូលរួមប្រជុំជាមួយនឹងលោកអភិបាលខេត្ត
អំពីបញ្ហាខាងលើនេះដោយលោកអភិបាលខេត្តបានស្នើសុំមកស្ថាប័នតុលាការ ដោយទុករឿងនេះអោយលោកជាអ្នកដោះស្រាយព្រោះខេត្តបានឈានមួយជំហានមុនតុលាការ ហើយខេត្តបានសន្យាថានឹងធ្វើការដោះស្រាយរឿងនេះក្នុងពេលឆាប់ៗខាងមុខនេះ។
រាល់បញ្ហានេះគឺប្រជាពលរដ្ឋមិនមានគំនិតចង់បានបឹងតាអឿនេះមកជារបស់បុគ្គលណាមួយឡើយដោយគ្រាន់តែចង់បានទុកជាសម្បត្តិរដ្ឋតែប៉ុណ្ណោះ ដើម្បីប្រើប្រាស់ក្នុងផលប្រយោជន៍រួមនៅក្នុងសហគមន៍បឹងតាអឿទាំងមូល ព្រោះបើគេពិនិត្យនៅរដូវប្រាំង គឺតំបន់នេះគ្មានប្រភពទឹកទាល់តែសោះដែលត្រូវពឹងផ្អែកទៅលើបឹងនេះទាំងស្រុងតាំងពីបុរាណកាលមកម្ល៉េះ។ហើយរហូតមកទល់នឹងពេលនេះការទន្ទឹងរង់ចាំរបស់ប្រជាពលរដ្ឋកាន់តែមានភាពតានតឹងខ្លាំងឡើងៗដោយសារតែភាពស្ងប់ស្ងាត់របស់អាជ្ញាធរខេត្ត ហើយបើលោកអភិបាលខេត្តដោះស្រាយតាមរបៀបប្រគល់នាទីទៅអោយខាងមន្ទីរជំនាញនោះគឺមិនអាចទៅរួចបានឡើយដោយសារតែភាពលំអៀង គ្មានយុត្តិធ៌ម ដូច្នេះគួរណាស់តែលោកអភិបាលខេត្តអញ្ជើញចុះទៅសិក្សាដោយខ្លួនឯងទើបបានដឹងច្បាស់ថាតំបន់នេះវាយ៉ាងម៉េចបើមិនដូច្នោះទេ រឿងទំនាស់ផ្ទៃបឹងដែលជាសម្បត្តិរដ្ឋនឹងកាន់តែរីកធំឡើងៗ ព្រោះរឿងនេះមិនគួរលោក
អភិបាលខេត្តធ្វើការបណ្តែតបណ្តោយ និងអូសបន្លាយពេលទាល់តែសោះព្រោះថ្មីៗនេះគឺនៅមុនថ្ងៃបុណ្យចូលឆ្នាំប្រពៃណីជាតិ ក្នុងការចុះជួបសំណេះសំណាលជាមួយបណ្តាអ្នកសារព័ត៌មានក្នុងខេត្តលោកច័ន្ទ សុផល ធ្លាប់បានលើកឡើងនូវប្រយោគមួយយ៉ាងល្អថា ហើយត្រូវរកវិធីដោះស្រាយ ឬពន្លត់អោយបាននូវកូនដុំរងើកភ្លើងដ៏តូចមួយនដោយយើងមិនត្រូវទុកកូនដុំរងើកភ្លើងដ៏តូចមួយនេះអោយក្លាយទៅជាអគ្គីភ័យឡើយ ។ដូច្នេះបើយើងយករឿងនេះមកវិភាគគឺមានន័យថាពីរជំនាន់មកហើយរបស់អាជ្ញាធរខេត្តក្នុងការរកដំណោះស្រាយនៅតែមិនទាន់មានផ្លែផ្កាទាល់តែសោះបើទោះបីជាមានការឯកភាព សម្រេចនៅក្នុងអង្គប្រជុំនៅក្នុងវត្តបឹងឈូកដោយលោកអុិន ប៊ុនម៉ាត់ និងលោកសួន សាវ៉េត រួចហើយក៏ដោយ។
នៅថ្ងៃទី24ខែមេសាឆ្នាំ2015 វេលាម៉ោង11,09នាទី កម្ពុជាថ្មីបានទូរស័ព្ទទៅលោកអភិបាលខេត្ត ដើម្បីចង់ដឹងអំពីចំណាត់ការរបស់លោកក្នុងការរកដំណោះស្រាយរឿងបឹងតាអឿនេះ
ជូនប្រជាពលរដ្ឋ ប៉ុន្តែលោកអភិបាលខេត្តមិនបានទទួលទូរស័ព្ទយើងឡើយ រីឯប្រជាពលរដ្ឋទាំងអស់នៅក្នុងភូមិក្បាលថ្នល់ ឃុំកំពង់ព្រៀង កំពុងតែកាប់បំពង់រង់ចាំទឹកភ្លៀងយ៉ាងអន្ទះសារជាទីបំផុត៕
