សៀមរាប៖ នៅក្នុងខែមីនា ឆ្នាំ២០១២ កន្លងទៅ ស្ថាប័នឥណ្ឌា (ASI) ដែលកំពុងបំពេញការងារអភិរក្ស និងជួសជុល ប្រាសាទតាព្រហ្ម ក្រោមកិច្ចសហការជាមួយ អាជ្ញាធរជាតិអប្សរា បានធ្វើកំណាយស្រាវជ្រាវប្រទះឃើញ ម្កុដ ឬភ្នួងសក់ធ្វើពីមាស ដែលជាវត្ថុសិល្បៈមានតម្លៃដ៏
កម្រនឹងជួបប្រទះ ក្នុងប្រវត្តិនៃសិល្បៈខ្មែរ ភ្លាមៗនោះស្ថាប័នឥណ្ឌានិងអាជ្ញាធរជាតិអប្សរា ក៏បានធ្វើការសិក្សា និងលាងសម្អាតតាមបច្ចេកទេសរបស់អ្នកអភិរក្សវត្ថុបុរាណ ក្រោមការដឹកនាំនិងចាត់ចែងដោយផ្ទាល់ពីសំណាក់ ឯកឧត្តម អគ្គនាយក អាជ្ញាធរជាតិអប្សរា។
ការប្រទះឃើញវត្ថុបូរាណដ៏មានតម្លៃនេះ អាជ្ញាធរជាតិអប្សរា បានធ្វើការផ្សព្វផ្សាយជាព័ត៌មាន ដើម្បី សាធារណជនបានជ្រាប ។
មិនតែប៉ុណ្ណោះ ក្នុងឱកាសព្រះរាជពិធីបុណ្យអុំទូកឆ្នាំ២០១២ អាជ្ញាធរជាតិអប្សរា បានរៀបចំតាំងពិព័ណ៌មួយ នៅវាលព្រះមេរុ រាជធានីភ្នំពេញ ហើយរូបភាពរបស់ម្កុដ ឬភ្នួងសក់នេះ ក៏ត្រូវបានដាក់តាំងថ្វាយព្រះមហាក្សត្របានទត រួមទាំងថ្នាក់ដឹកនាំរាជរដ្ឋាភិបាល ព្រមទាំងសាធារណជនទូទៅ បានចូលទស្សនា ដោយមិនមានការលាក់បាំងអ្វីនោះឡើយ។អាជ្ញាធរជាតិអប្សរា សូមធ្វើការអះអាងបញ្ជាក់ជូនជនរួមជាតិ មេត្តាជ្រាបថា បច្ចុប្បន្ននេះម្កុដិ ឬ ភ្នួងសក់ ដែលជាវត្ថុបូរាណដ៏មានតម្លៃនេះ ត្រូវបានរក្សាទុកនៅកន្លែងដែលមានសុវត្ថិភាព ស្របតាមតាមគោលការណ៍នៃការអភិរក្សវត្ថុបុរាណ ដែលជាមរតករបស់មនុស្សជាតិទាំងមូល ។ក្នុងរយៈពេលប៉ុន្មានថ្ងៃថ្មីៗនេះ មានការផ្សព្វផ្សាយព័ត៌មានមិនពិត តាមរយៈបណ្តាញទំនាក់ទំនងសង្គម ( Facebook ) ដោយចោទប្រកាន់មកលើ អាជ្ញាធរជាតិអប្សរាថា បានធ្វើឲ្យបាត់បង់ ឬលក់វត្ថុបូរាណដែលមានតម្លៃជាមរតកបេតិកភណ្ឌរបស់ជាតិ ។
ដើម្បីបញ្ជាក់ជូនជនរួមជាតិ ឲ្យកាន់តែជ្រាបច្បាស់នូវការពិតបន្ថែមទៀត ក៏ដូចជាការបដិសេធរបស់អាជ្ញាធរជាតិអប្សរា លើការចោទប្រកាន់គ្មានការពិតខាងលើ នារសៀលថ្ងៃទី២៨ ខែមេសា ២០១៥នេះលោកអគ្គនាយកអាជ្ញាធរជាតិអប្សរា បានណែនាំមន្ត្រីជំនាញដែលជាអ្នកមានសមត្ថកិច្ច ពិនិត្យមើលនិងថតយករូបភាពវត្ថុសិល្បៈនេះ ដើម្បីបញ្ជាក់ឲ្យកាន់តែច្បាស់ថា ម្កុដិ ឬ ភ្នួងសក់ ដែលជាវត្ថុបូរាណនេះ ពិតជាគ្មានការបាត់បង់ដូចការចោទប្រកាន់នោះឡើយ ។ ហើយវត្ថុដ៏មានតម្លៃនេះ អាជ្ញាធរជាតិអប្សរានៅបន្តថែរក្សា ដើម្បីធ្វើការសិក្សាស្រាវជ្រាវបន្ថែមទៀត រហូតដល់បាន លទ្ធផលគ្រប់ជ្រុងជ្រោយ ៕ 
