សៀមរាប៖ ឆ្នាំនេះ ! គឺជាឆ្នាំទី៥ហើយ ដែលសាលាអនុគណក្រុងសៀមរាប បានប្រារព្ធពិធីបំបួសកុលបុត្រ-កុលធីតាខ្មែរ ដើម្បីអនុមោទនា ទិវាបុណ្យវិសាខបូជា ។ ឆ្នាំ២០១៥នេះ ក៏ដូចជាឆ្នាំ២០១៤កន្លងទៅនេះ ពិធីបំបួសកុលបុត្រកុលធីតាខ្មែរ គឺគ្រោងនឹងធ្វើឡើងក្នុងចំនួន
តែ ៥០០នាក់ប៉ុណ្ណោះ ក៏ប៉ុន្តែអាស្រ័យមានសំណូមពរពីសំណាក់មាតាបិតា និងការស្ម័គ្រចិត្តរបស់សាម៉ីខ្លួន ពិធីបំបួសនេះ ត្រូវបានធ្វើឡើងក្នុងចំនួន ៧៣៥នាក់ ក្នុងនេះរួមមានកុលបុត្រ ៥០០នាក់ និង កុលធីតា ២១៥នាក់ ។ ពិធីបំបួសនេះ ត្រូវបានធ្វើឡើងនៅវត្តឥន្ទបត្តបូរី ហៅវត្តអង្គរតូចខាងត្បូង និងមានកម្មវិធីខ្លះនៃពិធីបំបួសនេះ ក៏ត្រូវបានធ្វើឡើងនៅក្នុងបរិវេណ និងនៅមុខប្រាសាទអង្គរវត្តផងដែរ ។ បុណ្យនេះ មានរយៈពេល ៤យប់ និង ៥ថ្ងៃ គឺចាប់ផ្តើមនៅថ្ងៃទី២៩ ខែមេសា និងបញ្ចប់ដោយកម្មវិធីរាប់បាត្រសាមណេរ និងសីលវត្តី ចំនួន ៧០០អង្គនាក់ ដែលត្រូវបានបំបួសនេះ ។
នៅក្នុងកម្មវិធីកោរសក់ បួងសក់ និងដង្ហែរនាគ ដែលជាកម្មវិធីដំបូងនៃពិធីបំបួសកុលបុត្រ-កុលធីតា ទាំង ៧០០រូប ឲ្យទទួលបានសម្បទាជាសាមណេរ និងជាសីលវត្តី នារសៀលថ្ងៃទី២៩ ខែមេសានេះ សេចក្តីប្រកាសហេតុ ដែលថ្លែងថេរដីកាដោយព្រះមហា ធឿន វុឌ្ឍី ជំនួយការព្រះអនុគណក្រុងសៀមរាប បានបង្ហាញថា ៖ នៅថ្ងៃទី១៥ ខែធ្នូ ឆ្នាំ១៩៩៩ អតីតអគ្គលេខាធិការអង្គការសហប្រជាជាតិ ( លោក កូហ្វីអាណាន់ ) បានប្រកាសទទួលស្គាល់យ៉ាងឱឡារិកថា ថ្ងៃវិសាខបូជា គឺជាទិវាសន្តិភាពនៃពិភពលោក និងជាបុណ្យអន្តរជាតិ ដោយផ្អែកលើទ្រឹស្តីរបស់ព្រះពុទ្ធជាម្ចាស់ ដែលពិភពលោកចាប់អារម្មណ៍ នោះគឺគោលការណ៍ អហឹង្សា និងសន្តិភាព ។ សាលាអនុគណក្រុងសៀមរាប បានរៀបចំពិធីបំបួសនេះ ដើម្បីអនុមោទនាទិវាបុណ្យវិសាខបូជា។
ព្រះគ្រូប្រាសាទរង្សី ឡាច លាង ព្រះគ្រូអនុគណក្រុងសៀមរាប និងជាប្រធានគណកម្មការរៀបចំពិធីបុណ្យ មានថេរដីកាថា៖ រដ្ឋធម្មនុញ្ញនៃព្រះរាជាណាចក្រកម្ពុជា បានចែងថា ព្រះពុទ្ធសាសនាគឺជាសាសនារបស់រដ្ឋ ព្រោះព្រះពុទ្ធសាសនាមានតួនាទីយ៉ាងសំខាន់ក្នុងការជួយអភិវឌ្ឍសង្គមជាតិ តាំងពីអតីតកាលរហូតដល់បច្ចុប្បន្ន និងទៅអនាគត ។ រាជរដ្ឋាភិបាលកម្ពុជា បានចាត់ទុកព្រះពុទ្ធសាសនាជាកង់ម្ខាង គឺ ពុទ្ធចក្រ ដែលត្រូវដើរទន្ទឹមគូគ្នានឹងវិស័យអាណាចក្រ ព្រោះវិស័យព្រះពុទ្ធសាសនានិងសង្គមអាណាចក្រ មានទំនាក់ទំនងគ្នា ស្ទើរគ្រប់វិស័យ ដូចជា ៖ វិស័យសង្គមកិច្ច សេដ្ឋកិច្ច វប្បធម៌ នយោបាយ សុខាភិបាល និង ការអប់រំជាដើម ។ ល។ ព្រះគ្រូអនុគណក្រុងសៀមរាប បានបន្តសង្ឈដីកាថា៖ ការអប់រំបន្ទំនិស្ស័យកុលបត្រកុលធីតាខ្មែរ តាមមាគ៌ាព្រះពុទ្ធសាសនា ដោយការបួសរយៈពេលខ្លីនេះ គឺមានគោលបំណង ដើម្បីផ្តល់ឱកាសឲ្យកុលបុត្រ-កុលធីតាខ្មែរ ចូលសាងផ្នួសតបស្នងសងគុណ ចំពោះអ្នកមានគុណរបស់ខ្លួន មានមាតាបិតា ព្រះមហាក្សត្រ និងថ្នាក់ដឹកនាំប្រទេសជាតិផងដែរ ។
អភិបាលនៃគណអភិបាលខេត្តសៀមរាប (លោកឃឹម ប៊ុនសុង ) បានថ្លែងនៅក្នុងកម្មវិធីកោរសក់ បួងសក់ នោះថា ៖ តាមប្រពៃណីរបស់ខ្មែរយើងតាំងពីបូរាណមក កូនប្រុសត្រូវបួសរៀនជាសាមណេរ ជាភិក្ខុ ចំណែកឯកូនស្រីត្រូវចូលម្លប់ ឬបួសជាសីលវតី ដើម្បីអប់រំខ្លួន តម្រង់ស្មារតី ស្គាល់ខុស ស្គាល់ត្រូវ ហើយខិតខំសិក្សាស្វែងយល់ពីដំណើរជីវិត ដែលនឹងត្រូវដើរទៅកាន់អនាគតដ៏វែងឆ្ងាយនោះឲ្យមានពន្លឺភ្លឺថ្លានៃសុភមង្គល។ លោកបានផ្ញើនូវក្តីសង្ឃឹមថា ៖ តាមរយៈនៃពិធីបំបួសនេះ កុលបុត្រ កុលធីតាខ្មែរ នឹងបានយល់អំពីគោលធម៌ នឹងចូលចិត្តព្រះធម៌ យកព្រះធម៌មកដាក់ក្នុងខ្លួន និងបានធ្វើឲ្យកុលបុត្រកុលធីតាខ្មែរ បានបំពេញតួនាទីជាកូនល្អ សិស្សល្អ មិត្តល្អ ពលរដ្ឋល្អ និងជាពុទ្ធសាសនិកល្អ ស្គាល់ច្បាស់ព្រពៃណី ទំនៀមទម្លាប់ វប្បធម៌ អរិយធម៌ ដ៏ល្អផូរផង់ របស់ខ្មែរយើង ។
ជាការកត់សម្គាល់ ក្រោយពិធីបំបួសនេះត្រូវបានបញ្ចប់ គឺមានសាមណេរមិនតិចជាង២០០អង្គនោះទេ ដែលស្ម័គ្រព្រះទ័យបន្តការសាងផ្នួស មិនលាចាកសិក្ខាបទ ភ្លាមៗនោះទេ ។ ទាំងនេះ គឺឆ្លុះបង្ហាញឲ្យឃើញថា នៅខេត្តសៀមរាប តាមរយៈនៃពិធីបំបួសអនុមោទនាទិវាបុណ្យវិសាខបូជា គឺត្រូវទទួលបាននូវកំណើនធនធានសង្ឃ ជារៀងរាល់ឆ្នាំ ៕
