ខេត្តព្រះសីហនុព្រឹកថ្ងៃទី១១ ខែឧសភា ឆ្នាំ២០១៥ លោកវរសេនីយឯក សាន់ ប៊ុនថន ស្នងការរងទទួលបន្ទុកប្រធានការិយាល័យកណ្តាលប្រឆាំងបទល្មើស នៃស្នងការដ្ឋាននគរបាលខេត្តព្រះសីហនុ និងសហការីបាននាំយកកង់ចំនួន០២គ្រឿង និងថវិកាទៅចែកជូនសិស្សានុសិស្សក្រីក្រ នៅស្រុកព្រៃនប់ ខេត្តព្រះសីហនុ ។
លោកវរសេនីយឯក សាន់ ប៊ុនថន បានមានប្រសាសនថា ក្រៅពីការងារស្នូលនៅស្នងការដ្ឋាននគរបាលខេត្តព្រះសីហនុ លោកតែងតែបានចូលរួមការងារមនុស្សធម៌ជាមួយប្រជាពលរដ្ឋនៅក្នុងសហគមន៌ក្នុងខេត្តព្រះសីហនុ ម្យ៉ាងទៀតដោយមើលឃើញនូវការខ្វះខាតរបស់សិស្សានុសិស្ស ដែលមានផ្ទះនៅឆ្ងាយពីសាលារៀនក្នុងការដំណើរមកមានការលំបាក ទើបលោកបានជួយឧបត្ថម្ភនូវកង់ចំនួនពីរគ្រឿង ។ មួយគ្រឿងប្រគល់ជូនសិស្សឈ្មោះ ហ៊ីម មុស្លីម ភេទប្រុស អាយុ១៦ឆ្នាំ សិស្សថ្នាក់ទី១១ គ មានទីលំនៅភូមិទួលទទឹង៣ ឃុំទួលទទឹង ស្រុកព្រៃនប់ និងកង់មួយគ្រឿងទៀត ប្រគល់ជូនកុមារី សំ ភារម្យ ភេទស្រី អាយុ ១៤ឆ្នាំ រៀនថ្នាក់ទី៨ ខ រស់នៅភូមិបែកក្រង់ ឃុំព្រៃនប់ ស្រុកព្រៃនប់ ព្រមទាំងផ្តល់ថវិការជូនដល់សិស្សក្រីក្រទាំងពីរនាក់ ក្នុងម្នាក់ទទួលបានថិវកា ១០ម៉ឺនរៀល ។ ព្រមទាំងផ្តល់ថវិកាជូនសាលាឃុំព្រៃនប់ ១០ម៉ឺនរៀល ប៉ុស្តិនគរបាលឃុំព្រៃនប់ថវិកា ១០ម៉ឺនរៀល និងសាលាស្រុកព្រៃនប់នូវថវិការ ៥០ម៉ឺនរៀលផងដែរ ។
លោកវរសេនីយឯក សាន់ ប៊ុនថន បានមានប្រសាសន៌សំណេះសំណាលជាមួយ លោកគ្រូ អ្នកគ្រូ និងសិស្សានុសិស្សក្នុងសាលាវិទ្យាល័យហ៊ុនសែន ស្រុកព្រៃនប់ថា វិស័យអប់រំមានតួនាទីសំខាន់ក្នុងការបណ្តុះបណ្តាលនូវធនធានមនុស្ស ដើម្បីរួមចំណែកធានាបាននូវលក្ខណះសម្បត្តិគ្រប់គ្រាន់ក្នុងការជំរុញវិស័យអប់រំឪ្យមានការរីកចំរើន រឹងមាំ ធានាបានទាំងបរិមាណ និងគុណភាពទាមទារនូវយន្តការមួយប្រកបដោយប្រសិទ្ធិភាព និងធនធានមនុស្សប្រកបដោយសមត្ថភាព ដើម្បីសំរេចនបានគោលដៅនៃការអប់រំសំរាប់ទាំងអស់គ្នា ហើយការបណ្តុះបណ្តាលនូវធនធានមនុស្ស ដើម្បីធានានិរន្តរភាពនៃការអភិវឌ្ឍន៌ប្រទេសជាតិ ។ ព្រោះក្មួយៗទាំងអស់ជាទំពាំងស្នងឬស្សី ក្នុងការចូលរួមចំណែកកសាងអភិវឌ្ឍន៌ប្រទេសជាតិឪ្យមានការរីកចំរើនដែលមិនអាចខ្វះបាន ។ ហើយក្មួយៗត្រូវខិតខំសិក្សារៀនសូត្រក្រេបយកនូវចំណេះដឹង ពីលោកគ្រូ អ្នកគ្រូ ដើម្បីយកចំណេះវិជ្ជាដែលបានខិតខំរៀនសូត្រទៅបំរើការងារជួយដល់ក្រុមគ្រួសារ និងសង្គមជាតិ ។
កាលពីដើមឆ្នាំ២០១៥កន្លងមក លោកវរសេនីយឯកសាន់ប៊ុនថន ក៌បានជួយសាង សង់ផ្លូវបេតុងមួយខ្សែក្នុងសាលាវិទ្យាល័យស្ទឹងហាវ ដើម្បីជួយសម្រួលការធ្វើដំណើររបស់សិស្សក្នុងសាលាបានកាន់តែងាយស្រួលផងដែរ ព្រមទាំងបានជួយដល់ជនរងគ្រោះធម្មជាតិក្នុងស្រុកព្រៃនប់ផងដែរ ៕ 
