សៀមរាប ក្នុងដំណើរទស្សនកិច្ចជាផ្លូវការ នៅលើទឹកដីប្រវត្តិសាស្ត្រខេត្តសៀមរាប នាថ្ងៃទី១១ ខែឧសភា ឆ្នាំ២០១៥ របស់លោក ជុង យូអ៊ីហ្វា ប្រធានរដ្ឋសភា នៃសាធារណរដ្ឋកូរ៉េ និង លោកជំទាវ ព្រមទាំងសហការី ក្នុងការរឹតចំណងមិត្តភាព សាមគ្គី និង កិច្ចសហប្រតិបត្តិការយ៉ាងស្អិតរមួតរវាងប្រទេសទាំងពីរកម្ពុជា កូរ៉េ ។
ក្នុងឱកាសពិធីលៀងសាយភោជន៍នៅសណ្ឋាគារសុខាអង្គរខេត្តសៀមរាប មានប្រសាសន៍ក្នុងការស្វាគមន៍នោះ លោក ឃឹម ប៊ុនសុង ក៏បានលើកឡើងពីស្ថានភាពភូមិសាស្ត្រ នយោបាយ សន្តិសុខ សេដ្ឋកិច្ច និង ជីវភាពរស់នៅរបស់ប្រជាជនខេត្តសៀមរាប ម្យ៉ាងទៀតវិស័យសេដ្ឋកិច្ចរបស់ខេត្តសៀមរាប ដោយប្រជាពលរដ្ឋបានពឹងផ្អែកទៅ លើវិស័យ កសិកម្ម វិស័យទេសចរណ៍ ។ ក្រោមកិច្ចដឹកនាំរបស់សម្តេចទាំងបី សម្ខាន់ការកិច្ចដឹកនាំដ៏ឈ្លាសវៃប្រកបដោយគតិបណ្ឌិតដ៏ខ្ពង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យមានការអភិវឌ្ឍន៍រីកចម្រើនលើគ្រប់វិស័យនិង បានលើស្ទួយនូវជីវភាពរស់នៅរបស់ប្រជាពលរដ្ឋកាន់តែមានភាពប្រសើរពិសេសនៅខេត្តសៀមរាប ធ្វើឲ្យមានការអភិវឌ្ឍន៍លើវិស័យទេសចរណ៍ទាំងរចនាសម្ព័ន្ធនិងសេវាកម្មទេសចរណ៍ និងការអភិវឌ្ឍន៍ក្រុងឲ្យកាន់តែមានសោភ័ណ្ឌស្រស់ត្រកាលឡើងនិងបានជាប់ចំណាត់ថ្នាក់ជា ទីក្រុងគោលដៅទេសចរណ៍លេខ១ នៅតំបន់អាស៊ី និង ជាប់ចំណាត់ថ្នាក់លេខ២ នៅលើពិភពលោក ក្នុងការវាយតម្លៃទីក្រុងទាក់ទាញភ្ញៀវទេសចរណ៍នៅឆ្នាំ២០១៥នេះ ។ លោកឃឹម ប៊ុនសុង ក៏បានគូសបញ្ជាក់ថា ដំណើរទស្សនកិច្ចរបស់ឯកឧត្តមប្រធានរដ្ឋសភានាពេលនេះជាការឆ្លុះបញ្ចាំងឲ្យឃើញពីចំណងមិត្តភាព សាមគ្គីភាព និង កិច្ចសហប្រតិបត្តិការយ៉ាងស្អិតរមួត រវាងប្រជាពលរដ្ឋ និង រដ្ឋាភិបាលយើងទាំងពីរ និង បានកំពុងបន្តពង្រឹង ពង្រីកថែរក្សាពូនជ្រុំនៃទំនាក់ទំនងជាប្រពៃណីឲ្យកាន់មានភាពរឹងមាំទ្វេរឡើងហើយកន្លងមកខេត្ត ក្រុងចងសម្ព័ន្ធមេត្រីនិងខេត្តសៀមរាបបានធ្វើកិច្ចសហប្រតិបត្តិការល្អនឹងគ្នាព្រមទាំងបានផ្តល់ ជួយជាសម្ភារៈបរិក្ខាក្នុងការបម្រើដល់ផលប្រយោជន៍សង្គមផងដែរ។ ឯកឧត្តមក៏បានបញ្ជាក់ពីការសុំឲ្យសមាគមន៍ជនជាតិកូរ៉េចូលរួមក្នុងកិច្ចអភិវឌ្ឍន៍ក្រុងសៀមរាប ទៅលើវិស័យទេសចរព្រមទាំងបានសំណូមពរដល់ឯកឧត្តមប្រធានរដ្ឋសភាក៏ដូចប្រតិភូទាំងមូល នូវពេលធ្វើមាតុភូមិនិវត្តន៍ទៅមាតុប្រទេស កូរ៉េវិញ សូមជួយជម្រុញដល់ប្រជាពលរដ្ឋកូរ៉េ ឲ្យចូលមក វិនិយោគនិងធ្វើទេសចរណ៍នៅកម្ពុជាសំខាន់ខេត្តសៀមរាបក្នុងការចូលរួមកិច្ចអភិវឌ្ឍន៍ សេដ្ឋកិច្ចនៃប្រទេសទាំងពីរ ផងដែរ ។
មានប្រសាសន៍នោះលោកជុងយូអ៊ីហ្វាក៏បានលើកឡើងពីគោលបំណង នៃដំណើរទស្សនៈកិច្ចរបស់គណៈប្រតិភូ នៅលើទឹកដីកម្ពុជា ព្រមទាំងបានសម្លែងនូវក្តីស្ញប់ស្ញែង កោតសរសើរ ចំពោះកេរ្តិ៍មរតកខ្មែរដ៏មហាអស្ចារ្យ ពិតជាអច្ឆរិយៈវត្ថុគ្មានពីរលើលោក ប្រៀបបាននឹងសំណង់ស្ថាបត្យកម្មទេពនិម្មិត មិនអាចកាត់ថ្លៃបាននៃដួងព្រលឹងជាតិកម្ពុជាហើយបានក្លាយជាសម្បត្តិបេតិកភណ្ឌ ពិភពលោករបស់មនុស្សជាតិផងដែរ។ម្យ៉ាងទៀតមរតកដ៏មានតម្លៃដោយមិនអាចកាត់ថ្លៃបាននេះ គឺជាសំណង់ស្ថាបត្យកម្មដ៏កំពូលបានបង្ហាញនូវការសិក្សាស៊ីជម្រៅនាសម័យអតិតកាល បានឆ្លុះបញ្ចាំងដល់ការវាយតម្លៃខ្ពស់ នូវទេពកោសល្យ ស្នាដៃបុព្វបុរសដូនតាខ្មែរ នៃចក្រភពមួយលើលោកនេះ ។ ឯកឧត្តមប្រធានប្រតិភូក៏បានលើកឡើងពីកិច្ចខិតខំអភិវឌ្ឍន៍របស់ខេត្តសៀមរាប ដែលសម្បូរទៅដោយសម្បត្តិវប្បធម៌ដ៏សម្បូរបែបដែលមានប្រាង្គប្រាសាទបុរាណជាច្រើន ដែលបានកំពុងទាក់ទាញនូវភ្ញៀវទេសចរណ៍មកពីគ្រប់មជ្ឈដ្ឋាននៅលើពិភពលោកចូលមកទស្សនា ហើយក៏ជាប្រភពចំណូលមិនចេះរីងស្ងួតរបស់ជាតិកម្ពុជាផងដែរ ។
លោកជុងយូអ៊ីហ្វាក៏បានលើកពីជីវប្រវត្តិប្រទេសកូរ៉េក្រោយពីបញ្ចប់សង្គ្រាមលោកនិង ពីដំណើរទស្សនកិច្ចនៅខេត្តសៀមរាបនេះ ក្នុង ការពិនិត្យទៅលើគម្រោងក្នុងការជួសជុលប្រាសាទ ព្រះពិធូរ ក្នុងបរិវេណប្រាសាទអង្គរធំព្រមទាំងត្រួតពិនិត្យមើលនូវរាល់សមទ្ធិផលជាផ្លែផ្កា ក្នុងកិច្ចសហប្រតិបត្តិការរវាងកម្ពុជា កូរ៉េ ក៏ដូចខេត្តសៀមរាប ដោយផ្តោតលើវិស័យអប់រំ និង ការបណ្តុះបណ្តាលធនធានមនុស្សជាដើម ។ ឯកឧត្តមក៏បានបញ្ជាក់នូវការងារជាច្រើន សម្រាប់ជួបធ្វើកិច្ចពិភាក្សាជាមួយរាជរដ្ឋាភិបាលកម្ពុជាផងដែរ ។
លុះនៅរសៀលថ្ងៃដដែលនោះដែរ គណៈប្រតិភូ ក៏បានធ្វើដំណើរបន្តឆ្ពោះទៅកាន់រាជធានីភ្នំពេញ តាមជើងហោះ ហើរ K៦១១៦ ចេញពីអាកាសយានដ្ឋានអន្តរជាតិសៀមរាប នៅវេលាម៉ោង១៨ និង ១៥នាទី ប្រកបដោយសុវត្ថិភាព ផងដែរ ៕
