កំពត៖នៅបញ្ជាការដ្ឋានកងរាជអាវុធហត្ថ ខេត្តកំពត កាលពីព្រឹកថ្ងៃទី១៩ ខែឧសភា ឆ្នាំ២០១៥ មានរៀបចំពិធីផ្ទេរតំណែងមេបញ្ជាការ កងរាជអាវុធហត្ថ ខេត្តកំពត ដែលជំនួសដោយលោកកែវ សុផលមេបញ្ជាការរង ជាកូនប្រុសរបស់សពលោក កែវ សាមួន អតីតមេបញ្ជាការយោធភូមិភាគ៣ ខណៈពេលដែល មេបញ្ជាការខេត្តចាស់ ត្រូវទទួលតំណែងថ្មី នៅបញ្ជាការដ្ឋានកងរាជអាវុធហត្ថលើផ្ទៃប្រទេស ក្រោមអធិបតីភាពឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងឯកឧត្តមខួយ ឃុនហ៊ួរអភិបាល នៃគណៈអភិបាលខេត្តកំពត ។
បន្ទាប់មកលោកឧត្តមសេនីយ៍ត្រី ស្រ៊ុន គឹមស្រៀង នាយការិយាល័យបុគ្គលិកកងរាជអាវុធហត្ថ លើផ្ទៃប្រទេសបានអានប្រកាសរបស់ក្រសួងការពារជាតិ ចុះថ្ងៃទី៩ ខែមេសា ឆ្នាំ២០១៥ ដែលមានខ្លឹមសារថា លោកឧត្តមសេនីយ៍ត្រី ទេព វណ្ណា អត្តលេខ០១២៥៦១ មេបញ្ជាការកងរាជអាវុធហត្ថ ខេត្តកំពត ត្រូវបានតែងតាំងជានាយរងសេនាធិការដ្ឋានកងរាជអាវុធហត្ថលើផ្ទៃប្រទេស និង លោកវរសេនីយ៍ឯក កែវ សុផល អត្តលេខ០១២៩៣៣ មេបញ្ជាការរងកងរាជអាវុធហត្ថខេត្ត ត្រូវបានតែងតាំង ជាមេបញ្ជាការកងរាជអាវុធហត្ថខេត្តកំពត ។
ក្នុងពិធីផ្ទេរតំណែងនេះដែលឯកឧត្តម នាយឧត្តម សេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានប្រសាសន៏បញ្ជាក់ថា៖ នេះជាការអនុវត្តន៍តាមគោលការណ៍ធ្វើកំណែទម្រង់របស់កងរាជអាវុធហត្ថលើផ្ទៃប្រទេស បំណងឱ្យស្ថាប័នអាវុធហត្ថកាន់តែមានប្រសិទ្ធភាព និងគុណភាពទាំងការដឹកនាំ គ្រប់គ្រង ក៏ដូចជា ការបង្កើតសមិទ្ធផលនានាបន្ថែមទៀត ៕
