កំពង់ឆ្នាំង៖ នៅក្នុងកិច្ចប្រជុំដោះស្រាយទំនាស់ រវាងសហគមន៏នេសាទ និងប្រជាពលរដ្ឋ ក្នុងឃុំផ្លូវទូក ស្រុកកំពង់លែង នៅព្រឹកថ្ងៃទី២០ ខែ ឧសភា ឆ្នាំ២០១៥ លោក ចេង ញ៉ាន់ អភិបាលរងខេត្តកំពង់ឆ្នាំង បានមានប្រសាសន៏លើកឡើងថាៈសហគមន៏នេសាទ បង្កើតឡើងមិនមែនសម្រាប់អ្នកណាម្នាក់ឡើយ គឺបង្កើតឡើង ដើម្បីប្រជាពលរដ្ឋទាំងអស់ញនារស់នៅក្នុងមូលដ្ឋាននិងសហគមន៏ ។ មានប្រសាសន៏បែបនេះពេលដែលលោកចូលរួមជាមួយលោក នាយខណ្ឌ័រដ្ឋបាលជលផល មន្ត្រីអង្គការសម្ព័ន្ធភាពដើម្បីអភិរក្សធនធានជលផល តំណាងសហគមន៍និងប្រជាពលរដ្ឋជាច្រើនរូបទៀត ។
លោក ចេង ញាន់ បាននិយាយថាៈ វេទិកាថ្ងៃនេះ គឺលោកចង់ដឹងព័ត៌មានពីសហគមន៏ និងពីប្រជាពលរដ្ឋ លោកមិនស្តាប់តែម្ខាងនោះទេ ហេតុនេះសូមអោយប្រជាពលរដ្ឋ និងសហគមន៏លើកឡើងយកមកជជែកគ្នា ថាតើបញ្ហាប្រឈមនិងទំនាស់ផ្តើមឡើងដោយសារអ្វី ដោយសារមុខរបរ ដណ្តើមផលគ្នា ឬមានមន្ត្រីខិលខូចជាអ្នកកាងនៅពីក្រោយខ្នង ដែលនាំបង្កអោយមានបញ្ហាកើតឡើង។
លោក ចេង ភាក មេឃុំផ្លូវទូកបានលើកឡើងថាៈ កាលពីដើមរៀងមក សហគមន៏នេសាទពុំដែលមានទំនាស់គ្នាឬមានបញ្ហាជាមួយប្រជាពលរដ្ឋឡើយ ទើបតែដើមឆ្នាំ២០១៥ មកមានបញ្ហារហូត គឺនៅចំណុចខាងចុងព្រែក ដោយមានប្រជាពលរដ្ឋលួចនេសាទក្នុងដែនអភិរក្សរបស់សហគមន៏ ។
លោក ទី សុក តំណាង សហគមន៏ផ្លូវទូក បានលើកឡើងថាៈ សហគមន៏បានធ្វើការងារដោយ ស្មគ្រ័ចិត្ត បើទោះមានការជួយឧបត្ថមពីអង្គការ “ហ្វិក” ក្តី តែវាមិនគ្រប់និងការចំណាយពលកម្មនោះទេ នេះព្រោះតែចង់ថែរក្សា ពូជត្រីនៅក្នុងទឹកអោយបានគង់វង្ស ។ប៉ុន្តែថ្មីៗនេះ មានសកម្មភាពប្រជាពលរដ្ឋលួចចូលមកនេសាទ ក្នុងដែនអភិរក្ស ត្រូវបានសហគមន៏ ចាប់បានទូកមួយគ្រឿង ក្រោយមកស្រាប់តែមានលេចឮពាក្យថាគេប៉ងសម្លាប់មន្ត្រីសហគមន៏ ហេតុនេះសុំអោយអាជ្ញាធរជួយទប់ស្កាត់ដោះស្រាយ ។
ស្ត្រីឈ្មោះ សុខ ខន អាយុ៥៧ឆ្នាំ រស់នៅភូមិពាមខ្នង បានលើកឡើងថាៈ ខ្ញុំទទួលស្គាល់ថា កូនខ្ញុំពិតជាបានលួចទៅនេសាទនៅកន្លែងអភិរក្សពិតមែន ព្រោះតូចចិត្តដោយមានគេមួយចំនួនចូលបាន ហេតុអីកូនខ្ញុំចូលរកមិនបាន ឥញ្ចឹងមានតែទៅទាំងប៉ីទាំងទ្រតែម្តងទៅ ។
ស្ត្រីឈ្មោះ សាន មុំ នៅភូមិជាមួយគ្នាបានលើកឡើងថាៈ សុំអោយថ្នាក់លើជួយនិងយោគយល់ដល់ប្រជាពលរដ្ឋផង បើចាប់សុំអោយចាប់ទាំងអស់គ្នាកុំចាប់មួយ អត់មួយ នាំអោយកើតរឿងទំទាស់ខ្លាំងឡើង ហើយបើចាប់សុំកុំលែងយកលុយ គឺសុំធ្វើទៅតាមច្បាប់ សុំកុំអោយសហគមន៏ បើកដៃអោយគេចូលនេសាទហើយយកលុយស្ងាត់ៗព្រោះសព្វថ្ងៃគឺមាន ទំលាក់កំហុសតែលើប្រជាពលរដ្ឋ ។
លោក សេន ទ្រី ក្រុមប្រឹក្សាឃុំ បានលើកឡើងថាៈ រឿងថ្ងៃទី២៨ ខែមេសា ឆ្នាំ២០១៥ គឺសហគមន៏បានចាប់ទូកគេនេសាទក្នុងដែនសហគមន៏យកត្រីកេះគេទៅលក់ ហើយសហគមន៍បានយកទូកគេមករក្សាទុក៣ថ្ងៃ មិនត្រឹមតែប៉ុណ្ណឹង ថែមទាំងអោយគេបង់លុយ១៥ម៉ឺនរៀលទៀតផង ។
ក្រោយពីការលើកឡើងរបស់ប្រជាពលរដ្ឋ និងសហគមន៏ជាបន្តបន្ទាប់មក លោក សោម ភិរុណនាយខណ្ឌ័រដ្ឋបាលជលផលកំពង់ឆ្នាំង បានលើកឡើងថាៈ រឿងចាប់យកត្រីគេទៅលក់ រក្សាទុកទូកគេ ៣ថ្ងៃក្រោយលែងយកលុយ១៥ម៉ឺនរៀល សហគមន៏គ្មានសិទ្ឋនោះទេ គឺខុសច្បាប់ហើយ បើចាប់ត្រូវបញ្ជូន ទៅមន្ត្រីជំនាញ កសាងសំណុំរឿងតាមផ្លូវច្បាប់។ដែនអភិរក្សគឺមិនអាចអនុញ្ញត្តិអោយអ្នកណានេសាទបានឡើយ សូម្បីតែសន្ទូចមួយផ្លែ ។ ចាប់ពីពេលនេះទៅត្រូវបញ្ឈប់ជាបន្ទាន់ តែបើមិនរាងចាលនិងធ្វើទៅតាមច្បាប់ ទាំងសហគន៏ ទាំងប្រជាពលរដ្ឋ សូមធ្វើអោយច្បាស់ទាំងអស់គ្នា ។
លោក មាន់ អ៊ានលី អភិបាលស្រុកកំពង់លែង ដោយចង់បញ្ចប់វិវាទនេះអោយកាន់តែល្អ លោកបានស្នើអោយកាត់របាំងតាមមាត់ព្រែក ដើម្បីអោយកំប្លោកហូរចូលក្នុងដែនអភិរក្ស នឹងដើម្បីមិនអោយអ្នកណាលួចចូលនេសាទបាន ចំណែកប្រជាពលរដ្ឋក៏បានទះដៃឯកភាពតាមទាំងអស់គ្នាផងដែរ ។
លោក ឯក ចំរើន មន្ត្រីសម្របសម្រួលកម្មវិធីតំបន់បឹងទន្លេសាបខាងត្បូង របស់អង្គការ សម្ព័ន្ឋភាពដើម្បីអភិរក្ស ធនធានជលផល ហៅកាត់ថា ហ្វិក បានលើកឡើងថាៈក្រៅពីគម្រោងដែលកំពុងគាំទ្រសហគមន៏នេសាទ ខាងមុខនេះ អង្គការនិងផ្តល់ទូកម៉ាស៊ីនចំនួន២គ្រឿងដល់សហគមន៏ ដើម្បីជួយសម្រួលក្នុងការដឹកសិស្សទៅមកសាលារៀន និងជួយដឹកជញ្ជូនអ្នកជំងឺទៅមន្ទីរពេទ្យ ។ ចំណែកក្នុងថ្ងៃនេះផងដែរ អង្គការបាននាំមកនៅសម្ភារៈមួយចំនួនប្រគល់ជូនសហគន៏នេសាទ ក្នុងនោះមាន វិទ្យុទាក់ទង ៤គ្រឿង ម៉ាស៊ីនថត ១គ្រឿង ពិល២ អាគុយ១០០អាំពែរមួយគ្រឿង អាំងវ៉ែទ័រ១ អំពូល L.I.D ១ និងថ្មពិល៤ឡូ ផងដែរ ។
លោក ចេង ញាន់ អភិបាលរងខេត្តបានបញ្ជាក់ថាៈ លោកមិនចង់អោយប្រជាពលរដ្ឋ របស់លោក ណាម្នាក់ ជាប់ទោសពៃពីរឿងនេសាទខុសច្បាប់ ឬព្រោះនេសាទក្នុងកន្លែងអភិរក្សនោះឡើយ លោកសូមអង្វរចិត្តទាំងអស់គ្នា សុំរួមរស់នៅជាមួយគ្នាបន្តទៀតទាំងសហគមន៏ និងទាំងប្រជាពលរដ្ឋ ក្នុងពេលនេះយើងបានឯកភាពគ្នាហើយ គឺកាត់របាំងតាមមាត់ព្រែក អោយកំប្លោកហូរចូលបើមិនហូរចូលទេយើងត្រូវនាំគ្នាជួយច្រានបញ្ជូលក្នុងដែនអភិរក្ស ដើម្បីការពារកុំអោយអ្នកណាមកលួចចូលនេសាទបាន៕
