សៀមរាប ៖ អគ្គនាយកដ្ឋានអន្តោប្រវេសន៍ នៃ ក្រសួងមហាផ្ទៃ បានប្រកាសឲ្យដឹងថា ការប្រើប្រាស់ហត្ថពលករបរទេស គឺត្រូវស្ថិតនៅក្នុងដែននៃការអនុវត្តច្បាប់ ដែលមានចែងនៅក្នុងមាត្រា ២៦១ នៃច្បាប់ស្តីពីការងារ និង មាត្រា ១៩- ៣២- ៣៣ និង ៣៦ នៃច្បាប់ស្តីពីអន្តោប្រវេសន៍ ព្រមទាំងប្រកាសអន្តរក្រសួងមហាផ្ទៃ និង ក្រសួងការងារ បណ្តុះបណ្តាលវិជ្ជាជីវៈ ស្តីពីការធ្វើអធិការកិច្ចហត្ថពលកម្មបរទេស ក្នុងព្រះរាជាណាចក្រកម្ពុជា លេខ ២៦៦២ ប្រក ចុះថ្ងៃទី១៦ ខែកក្កដា ឆ្នាំ២០១៤ ។
សេចក្តីណែនាំរបស់អគ្គនាយកដ្ឋានអន្តោប្រវេសន៍ ចុះថ្ងៃទី០១ ខែមេសា ឆ្នាំ២០១៥ បានបង្ហាញអំពីការសង្កេត ដោយកត់សម្គាល់ឃើញថា៖ នៅមានសហគ្រាស គ្រឹះស្ថាន និងពលករបរទេសមួយចំនួនតូច ពុំទាន់បានយកចិត្តទុកដាក់ ក្នុងការបំពេញកាតព្វកិច្ច ឲ្យបានត្រឹមត្រូវតាមច្បាប់កំណត់នៅឡើយ ។
ជួបប្រឈមនឹងបញ្ហានេះ កិច្ចប្រជុំមួយស្តីអំពីការអនុវត្តច្បាប់អន្តោប្រវេសន៍ និងច្បាប់ស្តីពីការងារ បានរៀបចំធ្វើឡើងនៅក្រុងសៀមរាប នាព្រឹកថ្ងៃទី២១ ខែឧសភា ឆ្នាំ២០១៥ ! ដែលអង្គប្រជុំនេះ ស្ថិតក្រោមកិច្ចសហការរបស់សហព័ន្ធនិយោជក និងសមាគមពាណិជ្ជកម្មកម្ពុជា សមាគមសណ្ឋាគារកម្ពុជា សភាពាណិជ្ជកម្មអ៊ឺរ៉ុប និងសភាពាណិជ្ជកម្មអង់គ្លេស ហើយកិច្ចប្រជុំនេះ ក៏ត្រូវបានការចូលរួមគាំទ្រ និងបានអញ្ជើញចូលរួមជាវាគ្មិន ពីសំណាក់ ឯកឧត្តម ន- ហេងហួត អនុប្រធានអគ្គនាយកដ្ឋានមុខរបបរនិងហត្ថពលកម្ម នៃក្រសួងការងារនិងបណ្តុះបណ្តាលវិជ្ជាជីវៈ និង មានវត្តមានផងដែរ ឧត្តមសេនីយ៍ឯក នៅ លក្ខណា អគ្គនាយករងនៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ។
ឧត្តមសេនីយ៍ឯក នៅ លក្ខណា បានអំពាវនាវនៅក្នុងកិច្ចប្រជុំនោះ ទៅដល់ម្ចាស់ ឬ នាយកសហគ្រាស គ្រឹះស្ថាន និងរាល់ពលករបរទេស ដែលមានបំណង និង កំពុងប្រកបមុខរបបរ ឬធ្វើការនៅក្នុងព្រះរាជាណាចក្រកម្ពុជា ត្រូវរួសរាន់បំពេញបែបបបទ ឲ្យបានគ្រប់គ្រាន់តាមច្បាប់ស្តីពីការងារ និងច្បាប់ស្តីអំពីអន្តោប្រវេសន៍ ។ ជាមួយនឹងការអំពាវនាវនេះ ឯកឧត្តម ក៏បានបង្ហាញឲ្យដឹងថា ៖ ជាទូទៅអគ្គនាយកដ្ឋានអន្តោប្រវេសន៍ នឹងចុះត្រួតពិនិត្យតាមគោលដៅ សហគ្រាស និងគ្រឺះស្ថាននានា ហើយក្នុងករណីរកឃើញថា មានពលករបរទេសណាម្នាក់ដែលកំពុងប្រកបមុខរបបរ ឬធ្វើការដោយគ្មានលិខិតឆ្លងដែន ឬមានលិខិតឆ្លងដែនដែលមានសុពលភាពមិនត្រឹមត្រូវ គ្មានប្រភេទទិដ្ឋាការសម្រាប់ធ្វើការងារ គ្មានប័ណ្ណការងារ នោះក្រុមចម្រុះអធិការកិច្ចហត្ថពលកម្មបរទេស នឹងធ្វើការផាកពិន័យ តាមច្បាប់ជាធរមាន ។
ឧត្តមសេនីយ៍ឯក នៅ លក្ខណា បានបញ្ជាក់ថា ការផាកពិន័យនេះ គឺមិនមែនដើម្បីប្រមូលថវិកានោះទេ តែវាជាការជម្រុញឲ្យមានការស្វែងយល់អំពីច្បាប់ និងកាតព្វកិច្ចរបស់ខ្លួន ក្នុងការអនុវត្តច្បាប់នេះផងដែរ ។ ក៏ប៉ុន្តែទោះជាយ៉ាងណា ឯកឧត្តមបានបង្ហាញអំពីលទ្ធផលនៃការធ្វើប័ណ្ណការងារហត្ថពលកម្មបរទេស ក្នុងរយៈពេលជាង២ឆ្នាំកន្លងមកនេះ ថាមានជំហានរីកចម្រើនគួកត់សម្គាល់ ដោយគិតចាប់ពីឆ្នាំ២០១៣ មកទល់នឹង ខែឧសភា ឆ្នាំ២០១៥នេះ មានចំនួនប្រមាណជា ២ម៉ឺន ប័ណ្ណ ៕ លោក ព្រិន្ទបាលទោ ខេង ខេមរា
