អតីតខ្សែប្រយុទ្ធបិសាចក្រហម Manchester United កីឡាករ Diego Forlan បានលើកឡើងថា គាត់បានជម្រុញឲ្យកីឡាករ Luis Suarez ឲ្យចាកចេញពី Liverpool ហើយផ្លាស់ទៅកាន់ Manchester United ។
Suarez ដែលស៊ុតបញ្ចូលទី ២៩ គ្រាប់ក្នុងការចូលលេង ២៨ លើកនៅ Premier League នៅរដូវក្តៅកាលនេះបានផ្លាស់មកកាន់ក្របខណ្ឌ Premier League ក្រោយពេលផ្ទេរចេញពីក្រុម Ajax កាលពីឆ្នាំ ២០១១ ក្នុងតម្លៃខ្លួន ២២.៨ លានផោន ។ ប៉ុន្តែទោះបីជាយ៉ាងណាក៏ដោយ Forlan បានព្យាយាមបញ្ចុះបញ្ចូលមិត្តរួមជាតិអ៊ុយរ៉ាហ្គាយរូបនេះឲ្យផ្លាស់ទៅកាន់ទឹកដី Old Trafford ជំនួសវិញ ។
Forlan ប្រាប់អ្នកសារព័ត៌មានថា “ខ្ញុំបានប្រាប់ Suarez ឲ្យចូលរួមជាមួយ Manchester United ព្រោះវាជាក្លិបដ៏អស្ចារ្យមួយដែលខ្ញុំធ្លាប់លេងនៅទីនោះ ។ Manchester United អាចធ្វើរឿងគ្រប់យ៉ាងបានដោយមិននឹកស្មានដល់” ។
គួរបញ្ជាក់ថា Forlan បានចំណាយពេល៣ឆ្នាំលេងឲ្យ Manchester United ដោយស៊ុតបញ្ចូលទីបាន ១០ គ្រាប់មុនផ្លាស់ទៅកាន់ក្រុម Villarreal របស់អេស្ប៉ាញ ៕
