កំពង់ឆ្នាំង៖ស្របតាមគោលនយោបាយកែទម្រង់របស់រាជរដ្ឋាភិបាលអាណត្តិទី៥ និងដើម្បីពង្រឹងកិច្ចការពារវិស័យព្រៃឈើរបស់ជាតិ នៅព្រឹកថ្ងៃទី២០ ខែឧសភា ឆ្នាំ២០១៥ នៅក្នុងសាលាខេត្តកំពង់ឆ្នាំងបានធ្វើពិធីប្រកាសតែងតាំង និងផ្ទេរភារកិច្ចនាយខណ្ណ័រដ្ឋបាលព្រៃឈើកំពង់ឆ្នាំង ដោយបានតែងតាំងលោក ថោង វ៉ាន់វីរ៉ាវុឌ្ឍី ជានាយខណ្ណ័រដ្ឋបាលព្រៃឈើកំពង់ឆ្នាំងថ្មី ក្រោមអធិបតីភាព ឯកឧត្តម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទដោយមានការចូលរួមពីលោកជំទាវ ប៉ាល់ យឿន អភិបាលរងខេត្តកំពង់ឆ្នាំង និងមន្ត្រីរាជការជុំវិញខេត្តជាច្រើនរូបទៀត។
លោក ស៊ិន កុសល អតីតៈនាយខណ្ឌ័រដ្ឋបាលព្រៃឈើកំពង់ឆ្នាំងបានឡើងអានរបាយការណ៍សង្ខេបពីលទ្ធផលនៃការងាររបស់ខណ្ណ័រដ្ឋបាលព្រៃឈើកំពង់ឆ្នាំងដែលសម្រេចបានក្នុងដើមឆ្នាំ២០១៥កន្លងមក ដោយបញ្ជាក់អោយដឹងថា៖លទ្ធផលដែលសម្រេចបានកន្លងមកគឺដោយសារ មន្ត្រីទាំងអស់ក្នុងខណ្ណ័ ក្នុងផ្នែក និងក្នុងសង្កាត់រដ្ឋបាលព្រៃឈើ បានអនុវត្តបានត្រឹមត្រូវនូវតួនាទីភារកិច្ចរបស់ខ្លួនដែលប្រធានរដ្ឋបាលព្រៃឈើ និងក្រសួងកសិកម្ម រុក្ខាប្រមាញ់និងនេសាទបានដាក់ចុះ។ទន្ទឹមនោះដែរក៏មានការសាមគ្គីយ៉ាងរឹងមាំ និងសហការបានយ៉ាងល្អជាមួយសមត្ថកិច្ចពាក់ពន្ធ័នៅក្នុងខេត្ត ដោយបានបង្ក្រា
បបទល្មើសព្រៃឈើបានជាច្រើនករណី និងបានកសាងសំណុំរឿងបញ្ជូនទៅតុលាការខេត្ត។
លោក ជឹម ប៊ុនថាវីន នាយកដ្ឋានរដ្ឋបាលផែនការ និងគណនេយ្យ នៃរដ្ឋបាលព្រៃឈើ បានអានសេចក្តីប្រកាសរបស់ក្រសួង តែងតាំងលោក ថោង វ៉ាន់វីរ៉ាវុឌ្ឍី អតីតៈនាយរងខណ្ណ័រដ្ឋបាលព្រៃឈើកំពង់ឆ្នាំង ឡើងជានាយខណ្ណ័រដ្ឋបាលព្រៃឈើកំពង់ឆ្នាំង ដោយឡែលលោក ស៊ិន កុសល អតីតៈនាយខណ្ណ័រដ្ឋបាលព្រៃឈើកំពង់ឆ្នាំង ត្រូវផ្លាស់ទៅទទួលភារកិច្ចថ្មី ក្នុងនាយកដ្ឋានមួយរបស់រដ្ឋបាលព្រៃឈើ។នៅក្នុងពិធីនេះ លោក ថោង វ៉ាន់វីរ៉ាវុឌ្ឍី នាយខណ្ណ័រដ្ឋបាលព្រៃឈើកំពង់ឆ្នាំងថ្មី បានឡើងធ្វើសេចក្តីប្តេជ្ញាចិត្តថា៖ដើម្បីតបស្នងនិងការជឿទុកចិត្តរបស់ថ្នាក់ដឹកនាំ លោកនិងខិតខំដឹកនាំខណ្ណ័រដ្ឋបាលព្រៃឈើកំពង់ឆ្នាំង អោយសម្រេចបានស្នាដៃល្អៗអោយបានច្រើនជូនខេត្ត ដោយបង្កើនសាមគ្គីភាពផ្ទៃក្នុង
អង្គភាពអោយបានល្អរឹងមាំ និងបន្តកិច្ចសហការជាមួយស្ថាបន័ពាក់ពន្ធ័ក្នុងខេត្តអោយបានស្អិតរមួតដើម្បីទប់ស្កាត់ និងបង្ក្រាបបទល្មើសព្រៃឈើអោយបានជោគជ័យ។
នៅក្នុងឱកាសនោះដែរ ឯកឧត្តម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម អ៊ុង សំអាត អនុប្រធានរដ្ឋបាលព្រៃឈើ និង លោកជំទាវ ប៉ាល់ យឿន អភិបាលរងខេត្តកំពង់ឆ្នាំង បានមានមតិសំណេះសំណាល និងផ្តាំផ្ញើដល់លោកនាយខណ្ណ័ថ្មី និងមន្ត្រីក្នុងខណ្ណ័ទាំងអស់ថា៖កត្តាដែលនាំអោយការងារគ្រប់វិស័យព្រៃឈើរបស់ជាតិទទួលបានជោគជ័យ គឺត្រូវចេះសាមគ្គីធ្វើការងារជាមួយគ្នាបានល្អ ចេះគោរពសិទ្ធក្នុងការងារ គោរពតួនាទីរបស់ខ្លួន ត្រូវចេះយល់យោគអធ្យាស្រ័យអោយគ្នា ពិសេសគឺចេះជួយដាស់តឿនអប់រំ
ណែនាំគ្នា ពេលឃើញមានចំណុចខ្វះខាតជាគុណវិបត្តិ និងត្រូវចេះរស់នៅជាមួយគ្នា ដឹងសុខទុក្ខគ្នាពេលបំពេញការងារនិងភារកិច្ច។ដើម្បីអោយការងារនិងតួនាទីរបស់ខ្លួនបានជោគជ័យ ត្រូវសហការជាមួយស្ថាបន័មានសមត្ថកិច្ចគ្រប់អង្គភាពក្នុងខេត្ត ពិសេសស្ថាបន័តុលាការខេត្ត ក្នុងនោះដែរក៏ត្រូវសហការជាមួយអាជ្ញាធរមូលដ្ឋានសហគមន៍ព្រៃឈើ និងគោរព អនុវត្តអោយបាននូវច្បាប់ស្តីពីព្រៃឈើ ដោយមិនត្រូវឃុបឃិតជាមួយបទល្មើសឡើយ។ទន្ទឹមនោះដែរត្រូវអនុវត្តនិងគោរពគោលការដឹកនាំរបស់គណៈបញ្ជាការឯកភាពខេត្តទើបភារកិច្ចទាំងអស់ទទួលបានជោគជ័យ៕
