កាលព្រឹកថ្ងៃទី ០៨ ខែ មេសា ឆ្នាំ២០១៤ គណៈកម្មាធិការសាខាកាកបាទក្រហមខេត្ត ដែលដឹកនាំដោយលោកជំទាវ គួយ ណាលីនឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្ត បាននាំយកអំណោយដ៏ថ្លៃថ្លារបស់សម្តេចគត្តិព្រឹទ្ធបណ្ឌិត ប៊ុន រ៉ានី ហ៊ុន
សែន ប្រធានកាកបាទក្រហមកម្ពុជា ប្រគល់ជូនដល់គ្រួសាររងគ្រោះដោយខ្យល់កន្ទ្រាក់ កាលពីវេលាម៉ោង ១៨និង១០នាទី រសៀលនាថ្ងៃទី០៥ ខែមេសា ឆ្នាំ២០១៤ នៅភូមិចំនួន៥ក្នុងសង្កាត់ចុងឃ្នៀស និងសង្កាត់សៀមរាប ដែលបានធ្វើឲ្យរលំផ្ទះ១៧ខ្នង និង ឆេះផ្ទះ ០២ ខ្នង ព្រមទាំងធ្វើឲ្យរបួសមនុស្ស០៣នាក់ផងដែរនៅសាលាសង្កាត់ចុងឃ្នៀស ក្រុង ខេត្តសៀមរាប ។
តាមសេចក្តីរាយការណ៍របស់លោកស្រីកុយ វិសាលអភិបាលរងនៃគណៈអភិបាលក្រុងសៀមរាប បានឲ្យដឹងថា នៅវេលាប្រហែលម៉ោង១៨ និង១០នាទី រសៀលថ្ងៃទី ០៥ មេសា ឆ្នាំ២០១៤ មានខ្យល់កន្ត្រាក់មួយយ៉ាងធំ ដែលលាយឡំទៅដោយដំណក់ទឹកភ្លៀងចេញមកពីទិសបច្ចឹម មកប៉ះចំភូមិសាស្ត្រសង្កាត់ចុងឃ្នៀស និង សង្កាត់សៀមរាបមានចំនួន៥ភូមិ ធ្វើឲ្យរលំផ្ទះសម្បែងរបស់បងប្អូនប្រជាពលរដ្ឋ ចំនួន ១៧ខ្នង ធ្វើឲ្យមនុស្សរងរបួសស្រាល០៣នាក់ និង នៅរាត្រីថ្ងៃទី៦ មេសា ឆ្នាំ២០១៤ មានកើតអគ្គីភ័យនៅភូមិពោធិ៍បន្ទាយជ័យ ឆេះផ្ទះអស់០២ខ្នង ដោយសារភ្លើងធូកផងដែរ ។
លោក ចយ សឿតនាយករងប្រតិបត្តិសាខាកាកបាទក្រហមកម្ពុជាខេត្តសៀមរាប បានធ្វើសេចក្ដីរាយការណ៍ អំពី ស្ថានភាពរងគ្រោះ និង ប្រភពជំនួយសង្គ្រោះ ព្រមទាំងអំណោយដែលត្រូវចែកជូនបងប្អូនប្រជាពលរដ្ឋ ទាំង១៩ គ្រួសារ ក្នុងនោះ មុង០១ ភួយ០១ សារុង០១ ក្រមា០១ កន្ទេល០១ ស្លាបព្រា៥ ចាន៥ ឆ្នាំង០១ ឡាំងទឹក០១គូ និង តង់កៅស៊ូ០១ អង្ករ ២៥គក្រ ក្នុងនោះអ្នកទាំង០៣នាក់ម្នាក់ៗទទួលបានមុង០១ ភួយ០១ សារុង០១ ក្រមា០១ កន្ទេល០១អង្ករ២៥គក្រក្នុងនោះដែរអាជ្ញាធរក្រុងក៏បានឧបត្ថម្ភគ្រួសារក្រីក្រនិងរងគ្រោះចំនួន០៦គ្រួសារក្នុង មួយគ្រួសារ១០ម៉ឺនរៀលផងដែរ ។
ក្នុងនាមឯ.ឧ ឃឹម ប៊ុនសុង ប្រធានគណៈកម្មាធិការសាខាកាកបាទក្រហមកម្ពុជាខេត្ត និងជាអភិបាលនៃគណៈ អភិបាលខេត្ត លោកជំទាវ គួយ ណាលីន ក៏បានមានប្រសាសន៍សំណេះសំណាលជាមួយបងប្អូនប្រជាពលរដ្ឋ ដែលរងគ្រោះរលំផ្ទះនិង ឆេះផ្ទះទាំងអស់ ព្រមទាំងសម្ដែងនូវការសោកស្តាយជាពន់ពេក ចំពោះបងប្អូនដែលបានរងគ្រោះនូវឧបទ្ទេវហេតុ ដោយខ្យល់កន្ទ្រាក់ ដែលបណ្ដាលឲ្យរលំផ្ទះ មានមនុស្សរងរបួសនេះ ។ លោកជំទាវក៏បានបន្តទៀតថា ក្នុងនាមកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏មិនបានទុកឲ្យបងប្អូនប្រជាពលរដ្ឋរងការលំបាក ក្នុងគ្រោះមហន្តរាយណាមួយដែលបានកើតឡើង ក្នុងមូលដ្ឋានរបស់ប្រជាពលរដ្ឋឡើយ ដូចពាក្យស្លោកថា ទីណាមានទុក្ខលំបាក ទីនោះមាន កាកបាទក្រហមជានិច្ច ។ ជាក់ស្ដែងថ្ងៃនេះដោយទទួលបានព័ត៌មានថាមានប្រជាជនរងគ្រោះធម្មជាតិនៅសង្កាត់ចុងឃ្នៀសសង្កាត់ សៀមរាប យើងបានបញ្ចុះក្រុមអ្នកស្ម័ត្រចិត្តកាកបាទក្រហមប្រចាំក្រុងសង្កាត់ ចុះស្រង់នូវផលប៉ះពាល់ភ្លាមៗ ហើយនៅថ្ងៃនេះ គណៈកម្មាធិការសាខាកាកបាទក្រហមកម្ពុជាខេត្តសៀមរាប បានរៀបចំនូវអំណោយសង្គ្រោះបន្ទាន់ ដើម្បីយកមក ចែកជូនបងប្អូនផងដែរ។ លោកជំទាវក៏មានប្រសាសន៍បញ្ជាក់ថា សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ព្រមទាំងថ្នាក់ដឹកនាំគ្រប់លំដាប់ថ្នាក់ មិនទុកឲ្យបងប្អូនប្រជាពលរដ្ឋ ដែលរងគ្រោះ នៅកណ្ដោចកណ្ដែង និង ស្លាប់ដោយអត់អាហារ និង គ្មានទីជំរកនោះឡើយ ។ លោកជំទាវ គួយ ណាលីន បានមានប្រសាសន៍បន្ថែមទៀតថា ទោះបីជាអំណោយទាំងនេះ វាមានលក្ខណៈតិចតួចក្ដី វាសងទៅនឹងការខូចខាត របស់បងប្អូនដែលរងគ្រោះក៏ពិតមែន តែជាស្មារតីយកចិត្តទុកដាក់របស់ថ្នាក់ដឹកនាំខេត្ត ក៏ដូចជាថ្នាក់ដឹកនាំគ្រប់លំដាប់ថ្នាក់ ដើម្បីជួយសម្រួល និង សម្រាលដល់ការលំបាករបស់បងប្អូនបានមួយរយៈផងដែរ ។ ក្នុងនោះដែរលោកជំទាវ ក៏បានផ្ដាំផ្ញើដល់បងប្អូនទាំងអស់ ធ្វើយ៉ាងណាត្រូវប្រុងប្រយ័ត្ន ដែលពេលនេះជារដូវក្តៅ សូមបងប្អូនយកចិត្តទុកដាក់ ចំពោះកូនតូចៗរបស់ខ្លួន កុំឲ្យមានជម្ងឺសង្កាត់ ចំណីចំណុកផ្សេងៗ សម្ខាន់ចំពោះភ្លើងផ្សែង នារដូវប្រាំងនេះ ស្របពេលដែលប្រជាពលរដ្ឋខ្មែរយើង ទទួលអំណរសាទរបុណ្យចូលឆ្នាំថ្មីប្រពៃណីជាតិខ្មែរ នាថ្ងៃខាងមុខផងដែរ ៕
