សៀមរាប៖ រដ្ឋលេខាធិការក្រសួងសុខាភិបាល លោក សាស្ត្រាចារ្យ ធា គ្រុយ បានណែនាំដល់គ្រូពេទ្យទាំងអស់ ត្រូវតែពង្រឹងជំនាញសុខាភិបាល ប្រកបដោយក្រមសីលធម៌វិជ្ជាជីវៈ ក្នុងការព្យាបាលអ្នកជំងឺ ដើម្បីលើកកម្ពស់វិស័យសុខាភិបាល ។ ជាមួយគ្នានេះ ឯកឧត្តម ព្រមានថា
នឹងដាក់វិន័យទៅកាន់គ្រូពេទ្យ ដោយផ្អាកការងារពួកគេមួយរយៈផងដែរ ក្នុងករណីចាំបាច់ បើសិនជាគ្រូពេទ្យទាំងនោះ នៅតែធ្វេសប្រហែស នៅតែបន្ដអនុវត្តភារកិច្ចដោយខ្ជីខ្ជា និងប្រព្រឹត្តិខុសក្រមសីលធម៌វិជ្ជាជីវៈរបស់ខ្លួន ។លោកបានថ្លែងយ៉ាងដូច្នេះ នៅក្នុងទិវាអភិវឌ្ឍន៍វិជ្ផាជីវៈវេជ្ផសាស្ត្របន្តនៅខេត្តសៀមរាបលើកទី០៤ នាព្រឹកថ្ងៃទី២២ ខែឧសភា ឆ្នាំ២០១៥ នៅសណ្ឋាគារអប្សរាអង្គរ ( ក្រុងសៀមរាប ) ដោយមានការចូលរួមពីសំណាក់សិក្ខាកាមប្រមាណជាង២០០នាក់ ដែលជាគ្រូពេទ្យមកពីតាមបណ្តាខេត្តនានា ទូទាំងប្រទេស ។
លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល និងជាប្រធានគណៈគ្រូពេទ្យជាតិ បានបន្ថែមថា គ្រូពេទ្យត្រូវតែអនុវត្តការងារឲ្យបានច្បាស់លាស់ ដោយពឹងផ្អែកលើជំនាញសុខាភិបាល ក្នុងស្មារតីគោរពក្រមសីលធម៌-វិជ្ជាជីវៈ ដើម្បីទប់ស្កាត់គ្រោះថ្នាក់ចំពោះអ្នកជំងឺ ។ គ្រូពេទ្យត្រូវតែគោរពពេលវេលាការងារឲ្យបានត្រឹមត្រូវ ព្រោះទាំងនេះគឺជាតម្រូវការចាំបាច់ ក្នុងការផ្ដល់សេវាសុខាភិបាលសម្រាប់អ្នកជំងឺ។
លោករដ្ឋលេខាធិការបានរំលឹកដល់គ្រូពេទ្យទាំងអស់ថា ៖ ក្រសួងកំពុងតែពិចារណានិងពិនិត្យឡើងវិញ ចំពោះគ្រូពេទ្យដែលណា ដែលនៅតែមានការធ្វេសប្រហែស និងខ្ជីខ្ជាក្នុងការងារ ធ្វើឱ្យប៉ះពាល់ដល់អ្នកជំងឺហើយក្រសួងនឹងដាក់វិន័យ ធ្វើការព្រមាន និងអាចឈានទៅផ្អាកមិនឱ្យធ្វើជាគ្រូពេទ្យក្នុងមួយរយៈណាមួយ បើសិនជារកឃើញករណីបង្កបញ្ហា ជាបន្ដបន្ទាប់នោះ ។លោកលើកឡើងថា ក្រសួងសុខាភិបាល បានខិតខំអភិវឌ្ឍន៍ និង ពង្រឹងសមត្ថភាពគ្រូពេទ្យនៅទូទាំងប្រទេស ឱ្យចេះគ្រប់គ្រងខ្លួនឯង ឲ្យមានការយល់ដឹងចំពោះភារកិច្ចព្យាបាលអ្នកជំងឺ និងមានជំនាញវិជ្ជាជីវៈ និងក្រមសីលធម៌ជាគ្រូពេទ្យ ។ ដើម្បីដោះស្រាយបញ្ហាខាងលើ ក្រសួងសុខាភិបាល បានចេញពិធីសារជាតិមួយដែលតម្រូវឱ្យ គ្រូពេទ្យទាំងអស់ បានដឹងអំពីការព្យាបាលជំងឺ និងពង្រឹងចំណេះដឹង សមត្ថភាពគ្រូពេទ្យ ឱ្យកាន់តែរឹងមាំ និងការធ្វើបច្ចុប្បន្នកម្មក្នុងរយៈពេល៣ឆ្នាំម្ដង ដើម្បីឱ្យបានដឹងអំពីការអភិវឌ្ឍថ្មីៗ ទាក់ទងនឹងជំនាញបច្ចេកទេសសុខាភិបាល និង របៀបប្រើប្រាស់ថ្នាំព្យាបាលនិងការពិនិត្យអ្នកជំងឺ ។
លោកធា គ្រុយ បាននិយាយណែនាំដោយសាមញ្ញថា ៖ សូមកុំគិតយកវិជ្ជាជីវៈធ្វើជំនួញ ព្រោះជំនាញរបស់គ្រូពេទ្យ គេមិនឲ្យធ្វើជំនួញទេ ហើយក៏មិនត្រូវនាំគ្នា គៀបស៊ីអ្នកជំងឺ នោះឡើយ ៕
