ខ្សែបម្រើកណ្តាលរបស់ក្លិបក្ងានខ្មៅ Swansea City កីឡាករ Jonathan de Guzman បានព្រមានដល់ មិត្តរួមក្រុមរបស់ខ្លួនថា ពួកគេត្រូវតែខិតខំប្រឹងប្រែងឲ្យបានខ្លាំងជាងនេះដើម្បីជួយក្រុមឲ្យមានតំណែងសុវត្ថិភាព បន្តលេងនៅក្របខណ្ឌ Premier League នៅរដូវកាលក្រោយ ។
Swansea បច្ចុប្បន្នឈរនៅលំដាប់ទី ១៥ នៃតារាងបន្ទាប់ពីប្រកួតចាញ់ Hull City ១-០ កាលពីយប់ថ្ងៃសៅរ៍ ដោយមានគម្លាតពីក្រុមដែលត្រូវកាត់ចោលតែ ៦ ពិន្ទុប៉ុណ្ណោះខណៈការប្រកួតនៅសល់ ៥ ដងទៀត ។
De Guzman ប្រាប់សារព័ត៌មាន South Wales Evening Post ថា “យើងមិនទាន់មានសុវត្ថិភាព នៅឡើយទេ” ។ “មានក្រុមនៅបាតតារាងជាច្រើនកំពុងត្រូវការពិន្ទុប៉ុន្តែសំខាន់យើងមិនត្រូវទន្ទឹងមើលក្រុមបាតតារាងទាំងនោះទេគឺយើងត្រូវប្រឹងប្រែងដោយខ្លួនឯង” ។
គួរបញ្ជាក់ថា Swansea នឹងត្រូវប្រឈមមុខជាមួយបញ្ហាដ៏ធំមួយទៀតគឺពួកគេត្រូវប្រកួតជាមួយក្រុមខ្លាំង តោខៀវ Chelsea នៅថ្ងៃអាទិត្យនេះ ៕
