ខេត្តកំពង់ឆ្នាំ : ប្រជាពលរដ្ឋប្រមាណ៥០នាក់ មកពីភូមិឆកកណ្តោល ឃុំជៀប ស្រុកទឹកផុស ខេត្តកំពង់ឆ្នាំង បាននាំគ្នាមករុំព័ទ្ធនៅខាងមុខសាលាដំបូងខេត្តកំពង់ឆ្នាំងដើម្បីឃ្លាំមើលទៅលើ ជនល្មើសចំនួន៣នាក់ដែលត្រូវតុលាការសម្រេចដាក់អោយនៅក្រោមការត្រួតពិនិត្យ។
ប្រជាពលរដ្ឋជាច្រើននាក់ដែលនាំគ្នាមកកាន់សាលាដំបូងខេត្តនេះ មានរយៈពេល២ថ្ងៃមកហើយ គឺគិតពីថ្ងៃទី២១ រហូតដល់ថ្ងៃទី២២ខែមេសានេះ មិនទាន់ត្រឡប់ទៅលំនៅដ្ឋានវិញនៅឡើយ ដោយពួកគាត់បានអះអាងថាខ្លាចតុលាការដោះលែងជនល្មើសទាំង៣នាក់ ១ មានឈ្មោះ សុង ដារ៉ូ ភេទប្រុស ២ ឈ្មោះ ជន ឆៃយ៉ា និងទី៣ ឈ្មោះ ម៉ៅ ត្រឹង ដែលបានបង្ករបួសស្នាម ទៅលើជនរងគ្រោះ ពីរនាក់ ម្នាក់ឈ្មោះមុំ សារីម ភេទប្រុស អាយុ២១ឆ្នាំ និងម្នាក់ទៀតឈ្មោះ ភឿន ស៊ីណេត ភេទប្រុស អាយុ១៨ឆ្នាំ បណ្តាលអោយទាំងពីរនាក់នោះរងរបួសធ្ងន់ ត្រូវបានក្រុមគ្រួសារយកមសង្គ្រោះនៅមន្ទីរពេទ្យ កាលពីយប់ថ្ងៃទី១៨ ខែមេសា នៅក្នុងភូមិគោកពេញ ឃុំជៀប ដែលបង្កឡើងក្នុងពិធីរាំធុងបាស់មួយនៅទីនោះ ។
នៅព្រឹកថ្ងៃទី២២ ខែមេសា ឆ្នាំ២០១៤នេះ គេសង្កេតឃើញ មានរថយន្តពន្លត់អគ្គីភ័យផ្ទុកទឹកពេញ ឈប់នៅខាងមុខសាលាដំបូងខេត្តកំពង់ឆ្នាំង ដើម្បីចែកចាយទឹក អោយប្រជាពលរដ្ឋប្រើប្រាស់ និងទុកសម្រាប់ការពារ ក្រែងមានអំពើហឹង្សាកើតឡើងក្រោមបញ្ជារបស់លោកអភិបាលខេត្តកំពង់ឆ្នាំង និង លោក ស្នងការនគរបាលខេត្តកំពង់ឆ្នាំងផងដែរ ។
បើតាមការអះអាងរបស់ប្រជាពលរដ្ឋបានអោយដឹងថា កាលពីយប់ថ្ងៃទី១៨ ខែមេសា នៅក្នុងភូមិគោកពេញ ឃុំជៀប មានពិធីរាំធុងបាស់មួយ ហើយនៅក្នុងពេលនោះឈ្មោះសុង ដារ៉ូ, ឈ្មោះ ជន ឆៃយ៉ា និងឈ្មោះ ម៉ៅ ត្រឹង រួមជាមួយគូកនមួយចំនួនទៀត បានអុកឡុកពិធី ព្រមទាំងព្រួតគ្នាវាយ ទៅលើជនរងគ្រោះពីរនាក់ ម្នាក់ឈ្មោះមុំ សារីម ភេទប្រុស អាយុ២១ឆ្នា និងម្នាក់ទៀតឈ្មោះ ភឿន ស៊ីណេត ភេទប្រុស អាយុ១៨ឆ្នាំ បណ្តាលអោយទាំងពីរនាក់នោះរងរបួសធ្ងន់ ត្រូវបានក្រុមគ្រួសារយកមសង្គ្រោះនៅមន្ទីរពេទ្យ។
តំណាងប្រជាពលរដ្ឋបានអោយដឹងទៀតថា ក្រោយពេលកើតហេតុ ប្រជាការពារភូមិបានចាប់ខ្លួនជនសង្ស័យទាំង៣នាក់ខាងលើ ប្រគល់អោយសមត្ថកិច្ចចាត់ការទៅតាមផ្លូវច្បាប់ ។ ប៉ុន្តែនៅពេលបញ្ជូនជនសង្ស័យមកដល់សាលាដំបូង ស្រាប់តែលេចឮព័ត៌មានថា មន្ត្រីតុលាការមានគម្រោងប្រុងដោះលែងជនល្មើសទាំង៣នាក់អោយមានសេរីភាពវិញទើបពួកគាត់លើកគ្នាមកកាន់សាលាដំបូងខេត្តកំពង់ឆ្នាំងតែម្តង ។
ក្រុមប្រជាពលរដ្ឋទាំងនោះបានបញ្ជាក់ថា ពួកគាត់លើកគ្នាមកនេះ ដើម្បីទាមទារអោយតុលាកាផ្តល់យុត្តិធម៌ដល់ជនរងគ្រោះ ពីព្រោះកន្លងទៅពួកក្រុមក្មេងទំនើងទាំងនោះដែលមានគ្នាប្រមាណជាង១០នាក់ តែងតែបង្ករការអុកឡុក ក្នុងពិធីផ្សេងៗនៅក្នុងភូមិជាញឹកញាប់ ដោយពួកគេតែងតែដេញវាយកាប់ចាក់គ្នា ដោយប្រើដាវសាំម៉ូរ៉ៃ កាំបិត ពូថៅ និងដំបង បង្ករអោយមានរបួសស្នាមកូនចៅអ្នកភូមិ ជាបន្តបន្ទាប់ និង មួយវិញទៀត ពួកគាត់លើកគ្នាមកនេះ គឺដើម្បីរង់ចាំមើល
ចំណាត់ការរបស់តុលាការ ពីព្រោះពួកគាត់បានទទួលព័ត៌មានថា មន្ត្រីតុលាការខេត្តកំពង់ឆ្នាំង កំពុងតែស៊ិសស៊ុះគ្នា ជាមួយក្រុមគ្រួសារជនល្មើសប្រុងដោះលែងពួកគេអោយមានសេរីភាពវិញ បើតុលាការដោះលែងជនល្មើសមែនពិតជាមានរឿងធំ ជាមួយពួកគាត់ជាមិនខាន ។ មន្ត្រីនៅអយ្យការអមសាលាដំបូងមួយរូប បានអោយដឹងថា មន្ត្រីអយ្យការគ្មានគម្រោងដោះលែងជនសង្ស័យទាំង៣នាក់នោះទេ ។
ជនសង្ស័យទាំង៣នាក់នោះ ត្រូវបានចោទប្រកាន់ពីបទហិង្សាដោយចេតនា មានស្ថានទម្ងន់ទោស តាមមាត្រា២១៨នៃក្រមព្រហ្មទណ្ឌ ដែលតាមបញ្ញតិ្តច្បាប់ ពួកគេអាចជាប់ពន្ធធានាគារពី ២ឆ្នាំ ទៅ៥ឆ្នាំ ប្រសិនបើតុលាការកឃើញកំហុស តាមការចោទប្រកាន់នេះ ។
មន្ត្រីខាងលើបានអោយដឹងទៀតថា សុំណុំរឿងនេះនឹងត្រូវបញ្ជូនទៅលោកស្រី គឹម លុយ ចៅក្រមស៊ើបសួរ នៃសាលាដំបូងខេត្តកំពង់ឆ្នាំង ដើម្បីចាត់ការបន្តទៅតាមនីតិវិធី។ មន្ត្រីសាលាដំបូងខេត្តកំពង់ឆ្នាំង នៅព្រឹកថ្ងៃទី២២ ខែមេសា ឆ្នាំ២០១៤ នេះ បានអោយដឹងថាជនសង្ស័យទាំងបីនាក់នឹងអាចបញ្ជូនទៅកាន់ពន្ធធានាគារវិញនៅរសៀលថ្ងៃដដែលនេះ ។
ដោយ លោក សុខ គឹមសៀន
