អ្នកចាត់ការក្លិប Everton លោក Roberto Martinez បាននិយាយថា ខ្សែប្រយុទ្ធ Kevin Mirallas អាចនឹងត្រូវសម្រាករហូតដល់ចប់រដូវកាលនេះដោយសាតែបញ្ហារបួស ។
ក្លិបដែលកំពុងឡើងជើងមួយនេះបច្ចុប្បន្នកំពុងតែប្រជែងជាមួយកាំភ្លើងធំ Arsenal ដើម្បីយកតំណែង Champions League ខណៈដែលពួកគេមានគម្លាតតែ១ពិន្ទុប៉ុណ្ណោះពី Arsenal ហើយការប្រកួតនៅសល់ ៣ ប្រកួតទៀត ។
Mirallas គឺបានរងរបួសសាច់ដុំក្នុងការប្រកួតដែល Everton យកឈ្នះលើបិសាចក្រហម Manchester United ២-០ កាលពីយប់ថ្ងៃអាទិត្យ ។ ទន្ទឹមជាមួយគ្នានោះសារព័ត៌មាន Het Laatste News បានចុះផ្សាយថា Mirallas អាចនឹងត្រូវអវត្តមានពី ៣ ទៅ ៤ សប្តាហ៍ប៉ុន្តែទោះបីជាយ៉ាងក៏ដោយប្រភពដដែលបានបញ្ជាក់ថា Mirallas នឹងមិនអវត្តមានសម្រាប់ការប្រកួត World Cup ជាមួយជម្រើសជាតិប៊ែលហ្សិកនោះទេ ។
គួរបញ្ជាក់ថា ៣ ប្រកួតដែលនៅសល់របស់ Everton នៅរដូវកាលនេះគឺត្រូវជួបជាមួយ Southampton និង Manchester City ហើយចុងក្រោយគឺពួកគេត្រូវប្រកួតជាមួយនឹង Hull City ៕
