សម្រាប់ការប្រកួត World Cup គ្រូបង្វឹកជម្រើសជាតិអង់គ្លេសលោក Roy Hodgson បានលើកឡើងថា គាត់នឹង ជ្រើសរើសកីឡាករយុវជនច្រើនដើម្បីធ្វើព្យុះភ្លៀងនៅក្នុងការប្រកួត World Cup នៅរដូវក្តៅនេះ ។
លោក Hodgson បានបញ្ជាក់ថា មានបេក្ខភាពកីឡាករប្រមាណពី ៣០ ទៅ ៣៥ នាក់នៅចំពោះមុខប៉ុន្តែលោកបានអះអាងថា លោកនឹងជ្រើសរើសកីឡាករដែលខុសពីការប្រកួត Euro 2012 ជាច្រើននាក់ ។
លោក Hodgson បាននិយាយផងដែរថា “ខ្ញុំនឹងកោះហៅកីឡាករដែលធ្លាប់លេង Euro 2012 តែប៉ុន្មាននាក់ប៉ុណ្ណោះដូចជា Jordan Henderson ឬ Danny Welbeck, Andy Carroll និង Alex Oxlade-Chamberlain” ។ គ្រូបង្វឹកវ័យ ៦៦ ឆ្នាំរូបនេះបន្ថែមថា “ពេលដែលខ្ញុំប្រកាស ពីកីឡាករដែលត្រូវរើសសម្រាប់លេង World Cup ខ្ញុំនឹងជ្រើសរើសកីឡាករវ័យក្មេងច្រើនហើយមិនសូវមានបទពិសោធន៍” ។
គួរបញ្ជាក់ថា តោកំណាចអង់គ្លេសនឹងត្រូវប្រកួតដំបូងជាមួយអាហ្ស៊ូរីអ៊ីតាលីនៅថ្ងៃទី ១៤ ខែមិថុនាសម្រាប់យុទ្ធនាការការប្រកួត World Cup នៅប្រទេសប្រេស៊ីល ៕
