ខេត្តប៉ៃលិន៖ នៅពេលថ្មីៗនេះ មានសារព័ត៌មានមួយចំនួន បានចេញផ្សាយថា ប្រជាពលរដ្ឋរស់នៅភូមិផ្សារព្រំ ត្រង់ចំណុចសំបុកចាប ឃុំស្ទឹងកាច់ យល់ព្រមដោះដូរដី ដែលពួកគាត់រស់នៅសព្វថ្ងៃ ទៅរស់នៅកន្លែងថ្មី ដែលពួកគាត់ទាំងនោះមិនបានដឹងតល់តែសោះ ព្រមទាំង
ធ្វើការបដិសេធចំពោះការផ្សាយព័ត៌មានមិនពិតទាំងនេះ ។ ជាក់ស្តែងនៅព្រឹកថ្ងៃទី២៤ ខែ សីហា ឆ្នាំ២០១៥ នេះ ក្រុមប្រជាពលរដ្ឋទាំងនោះបានរៀបរាប់ប្រាប់អ្នកយកព័ត៌មានកម្ពុជាថ្មីដឹងថា៖ ពួកគាត់ជាប្រជាពលរដ្ឋជាង២៤៧គ្រួសារដែលរស់នៅក្នុងតំបន់ឣាណាធិបតេយ្យ ចំណុចសំបុកចាប ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន សូមបដិសេធដាច់ឣហាំងការចំពោះសារព័ត៌មានមួយចំនួន ដែលផ្សព្វផ្សាយនូវព័ត៌មានមិនពិត ហើយសារព័ត៍មានទាំងនោះ ចេញផ្សាយនៅថ្ងៃទី២១ និងទី២២ ខែសីហា ឆ្នាំ២០១៥ នេះ ។ ក្រុមប្រជាពលរដ្ឋទាំងនោះបន្តថា៖ ហើយការផ្សព្វផ្សាយព័ត៌មានថា រស់នៅលើដីឯកជន និងខ្វះអនាម័យ វាមិនពិតឡើយ នេះដោយសារមានជនខិលខូចមួយចំនួនដែលជាអជ្ញាធរជំនាញស្រុក ខេត្ត បានឃុបឃឹតជាមួយនិងឧកញ្ញ៉ាម្នាក់ ឈ្មោះ សេង ឈុនឡេង បានបំភ្លៃការពិត ។ 
ពួកគាត់បន្តថា៖ តាមពិតគឺអាជ្ញាធរឃុំ ស្រុកនៅទីនោះ ពុំអនុញ្ញាតអោយរថយន្តដឹកសំរាមចូលយកសំរាមនៅទីតាំង ដែលពួកគាត់បានរស់នៅនោះទេ ហើយមិនអោយខាងរដ្ឋករទឹក តទឹកស្អាតចូលទីតាំងដែលពួកគាត់ប្រើនោះដែរ ។ ពួកគាត់បានបញ្ជាក់ប្រាប់អ្នកយកព័ត៌មានកម្ពុជាថ្មីយើងថា៖ ការដែលអជ្ញាធរស្រុក ខេត្ត បានអះអាងថាដីខាងលើជារបស់ឧកញ៉ាឈ្មោះ សេង ឈុនឡេង គឺពុំមានចុះបញ្ជីរបណ្ណកម្មសិទ្ធនៅឡើយទេតាំងពីឆ្នាំ២០០១មកម្លេះ ហើយចង់រំលោភបំពានយកដីរបស់ពួកគាត់ដែលរស់នៅជាង១០ឆ្នាំនេះ ធ្វើជាប្លង់កម្មសិទ្ធដោយដឹងថាដីខាងលើនេះ មានតម្លៃថ្លៃ ដើម្បីយកទៅបំរើផលប្រយោជន៏ផ្ទាល់ខ្លួនរបស់ពួកគេ ។, 
ពួកគាត់បន្តទៀតថា ដីដែលពួកគាត់រស់នៅគឺតាំងពីឆ្នាំ២០០១មកម្លេះ ហើយពួកគាត់សុំបដិសេធថាពួកគាត់មិនបានយល់ព្រម តាមការដោះដូរអោយទៅនៅកន្លែងផ្សេងនោះឡើយ ហើយទីតាំងកន្លែងថ្មី ពួកគាត់ពុំអាចប្រកបរបរចិញ្ចឹមជីវិតរាល់ថ្ងៃបាន ដូចទីតាំងដែលរស់នៅសព្វថ្ងៃ ។ ជាងនេះទៅទៀត ពួកគាត់ក៏បានធ្វើការផ្តិតមេដៃ ដើម្បីបដិសេធផងដែរ ហើយក្រុមប្រជាពលរដ្ឋទាំងនោះ បានសំណូមពរអោយមន្ត្រីជាតិគ្រប់លំដាប់ថ្នាក់ ដែលពាក់ព័ន្ធ ពិសេសសម្តេចតេជោ ហ៊ុនសែន និង លោកជំទាវ មេត្តាជួយរកយុត្តិធម៌អោយពួកគាត់ ដែលជាប្រជារាស្ត្រស្លូតត្រង់ទាំងអស់គ្នាផង និងសូមសម្តេច ហ៊ុន សែន មេត្តាជួយសំរួលនិងចេញប័ណ្ណកម្មសិទ្ធដល់ពួកគាត់ដោយក្តីអនុគ្រោះ ដោយយោងតាមច្បាប់កាន់កាប់ដីធ្លីដែលចេញក្នុងឆ្នាំ២០១២ ។
ពាក់ព័ន្ធករណីខាងលើ អ្នកយកព័ត៌មានកម្ពុជាថ្មី មិនអាចសុំការទំនាក់ទំនងតាមទូរស័ព្ទទៅលោក កើត សុធា អភិបាលនៃអភិបាលខេត្តប៉ៃលិន បានទេ ដោយទូរស័ព្ទចូលពុំមានអ្នកទទួល ៕ 
