កំពង់ធំ. ដើម្បីជួយសង្គ្រោះដល់ក្មេងចំនួន៨នាក់ ដែលកំពុងតែធ្លាក់ក្នុងឥទ្ធិពលនៃសារធាតុញៀន ដែលតែងតែធ្វើសកម្មភាព ដើរសុំលុយ ទិញកាវហិតនៅ ក្នុងក្រុងស្ទឹងសែន បង្ករភាពអនាធិបតេយ្យ និងធ្វើឲ្យមានផលប៉ះពាល់ ដល់សណ្តាប់ធ្នាប់សាធារណ: ទើបមន្ទីរសង្គមកិច្ចខេត្តកំពង់ធំ សហការជាមួយប៉ុស្តិ៍រដ្ឋបាលកំពង់ធំ ប្រមូលក្មេងហិតកាវ ចំនួន៨នាក់ បញ្ជូនទៅមណ្ឌលស្តារសម្បទារខេត្តសៀមរាប ចំនួន៤នាក់ និងបញ្ជូនទៅកាន់មណ្ឌលស្តារសម្បទារខេត្តបន្ទាយមានជ័យ៤នាក់ នៅព្រឹកថ្ងៃទី ១០ខែ កញ្ញា ឆ្នាំ២០១៥ ។
លោក អនុសេនីយ៍ឯក វ៉ាន វិបុល នាយប៉ុស្តិ៍រដ្ឋបាលកំពង់ធំ បានឲ្យដឹងថា លោកមានចិត្តត្រេតអរ យ៉ាងខ្លាំងខណ:ពេល ក្មេងៗដែលទទួលរងគ្រោះ ដោយសារធាតុញៀន បានទទួលការស្តារសម្បទាឡើងវិញ ដោយកន្លងមកក្រុមក្មេងៗទាំងអស់តែងតែ សេពគប់ក្មេងគ្នាឯង រត់ចេញពីផ្ទះ ហើយមកនៅកកកុញក្នុងក្រុងស្ទឹងសែន បង្ករឲ្យមានផលប៉ះពាល់យ៉ាងខ្លាំង ដល់សោភ័ណ ភាពក្រុង និងសណ្តាប់ធ្នាប់សារធារណ: ដោយមានការណែនាំពីសំណាក់ ឯកឧត្តម អ៊ុតសំអន អភិបាលខេត្តកំពង់ធំ. និងជាប្រធានគណ:បញ្ជាការឯកភាពខេត្តកំពង់ធំ បានឲ្យមន្ទីរសង្គមកិច្ចខេត្ត សហការជាមួយ ប៉ុស្តិ៍រដ្ឋបាលកំពង់ធំ ឲ្យប្រមូលក្មេងហិតកាវ. បញ្ជូនទៅកាន់មណ្ឌលស្តារ សម្បទារ ដើម្បីឲ្យក្មេងទាំងនេះទទួលបានការកែប្រែនិងបន្សាបសារធាតុញៀន។
លោកវរះសេនីយ៍ទោ. ញ៉ែម. ឈុនលី អធិការក្រុងស្ទឹងសែន បានឲ្យដឹងថា ចំពោះក្មេងដែលរង គ្រោះដោយសារសារធាតុញៀន កន្លងមកធ្លាប់បានប្រមូលជាច្រើនលើក ច្រើនសារ យកមកធ្វើការអប់រំ តែក្មេងៗទាំងនេះរិតតែធ្វើសកម្មភាពដូចដើម ដោយសារតែខេត្តកំពង់ធំពុំមានមណ្ឌល សម្រាប់ទទួលក្មេងៗ តែបើចាប់ក៏មិនដឹងយកទៅទុកនៅទីណា ទើបបានត្រឹមតែធ្វើការអប់រំ តែដោយឡែកក្នុងពេលនេះ ដោយការខិតខំរបស់ឯកឧត្តម អភិបាលខេត្តកំពង់ធំ បានសហការជាមួយនិងបណ្តារខេត្តក្រុង ដែលមានមណ្ឌលស្តារសម្បទារ ដើម្បីប្រមូលក្មេងៗទាំងនេះ យកទៅផ្ញើរ ដើម្បីកែប្រែ និងបន្សាប ក៏ដូចជាការជួយសង្គ្រោះក្មេងៗឲ្យចៀសផុតពីរណ្តៅអវិជ្ជាដោយសារ តែគ្រឿងញៀន។
ឯកឧត្តម អ៊ុត សំអន អភិបាលខេត្តកំពង់ធំ បានមានប្រសាសន៍ថា ចំពោះបញ្ហារក្មេងទាំង៨នាក់ ដែលរងគ្រោះដោយសារសារធាតុញៀន អាជ្ញាធរក៏មានការលំបាក ដោយសារតែបានបង្ករឲ្យប៉ះ ពាល់ដល់សណ្តាប់ធ្នាប់សង្គម និងសោភ័ណភាពក្រុងស្ទឹងសែន ទើបបានជម្រុញឲ្យមន្ទីរសង្គម កិច្ចខេត្តកំពង់ធំ សហការជាមួយស្ថាប័នពាក់ព័ន្ឋ រកទីតាំងដើម្បីបញ្ជូនឲ្យក្មេងៗទាំងនេះបានទទួល បានការស្តារសម្បទា និងបន្សាបសារធាតុញៀន នៅតាមមណ្ឌលដើម្បីជាការបើកឱកាស ឲ្យក្មេងៗកសាងខ្លួនថ្មី បានរៀនសូត្រ ក្លាយទៅជាក្មេងល្អ និងមនុស្សល្អក្នុងសង្គម ជាពិសេសគឺពេលនេះគឺចាំបាច់ត្រូវតែរួមគ្នាគ្រប់ស្ថាប័ន ជួយក្មេងដែលកំពុងរងគ្រោះដោយសារឥទ្ធិសារធាតុ ញៀនក៏ដូចជាការ ជួយគ្នាថែរក្សាសណ្តាប់ធ្នាប់.សោភ័ណភាពក្រុងស្ទឹងសែន ។
ដោយ ប៊ុន. រដ្ឋា
