ព្រះវិហារៈ លោក ប៉ាង យៀត អភិបាលស្រុកគូលែន រួមទាំងមន្ត្រីរាជការជុំវិញស្រុក និងប្រជាពលរដ្ឋ បានប្រារព្វពិធីបុណ្យកាន់បិណ្ឌទី៩ ស្ថិតនៅវត្ត គូលែនសុវណ្ណបុរីបញ្ញោ ស្ថិតនៅក្នុងភូមិគូលែនខាងត្បូង ឃុំគូលែនត្បូង ស្រុកគូលែន ខេត្តព្រះវិហារ កាលពីថ្ងៃទី ៦ ខែ តុលា ឆ្នាំ ២០១៥ ក្នុងគោលបំណងឧទ្ធិសកុសល់ ដល់បុព្វការីជនដែលបានចែកឋាន និងសុំបួងសួងដល់វត្ថុស័ក្កសិទ្ធ តាមជួយថែរក្សាមន្ត្រីរាជការ កងកម្លាំង ប្រជាពលរដ្ឋនៅក្នុងស្រុកគូលែន ទទួលបានសេចក្តីសុខនិបវាសចៀសឆ្ងាយនូវឧបទ្រុបចង្រៃ។
បុណ្យកាន់បិណ្ឌឬបុណ្យដាក់បិណ្ឌ ជាបុណ្យប្រពៃណីរបស់ពុទ្ធសាសនា បុណ្យនេះត្រូវបានពុទ្ធសាសនិកខ្មែរធ្វើឡើងរៀងរាល់ឆ្នាំចាប់ពីថ្ងៃ ១រោច ដល់ ថ្ងៃ១៥រោច ខែភទ្របទ ពុទ្ធសាសនិកខ្មែរធ្វើបុណ្យនេះដោយការយកទេយ្យទានផ្សេងៗមានអាហារជាដើមទៅផ្គត់ផ្គង់ព្រះសង្ឃនៅក្នុងវត្តដែលកំពុងគង់ចាំវស្សារយៈពេល១៥ថ្ងៃគត់ ទើបគេចែកជាក្រុមៗ ដាក់វេនគ្នាយកទេយ្យទានទៅប្រគេនព្រះសង្ឃរយៈពេល១៤ថ្ងៃ ចំណែកថ្ងៃ១៥រោច ដែលជាថ្ងៃចុងក្រោយនោះ ពុទ្ធសាសនិកពីគ្រប់វេនទាំងអស់បានមកជួបជុំគ្នាធ្វើទានចំពោះសង្ឃជាមួយគ្នាដើម្បីបញ្ចប់បុណ្យកាន់បិណ្ឌ ដើម្បីឧទ្ទិសកុសលដល់បុគ្គល ដែលបានលាចាកលោកនេះទៅហើយ បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្ដាយ ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃដែលគង់នៅវត្តអារាម។
បន្ទាប់ពីលោក ប៉ាង យៀត អភិបាលស្រុកគូលែន រួមទាំងមន្ត្រីរាជការជុំវិញស្រុក និងប្រជាពលរដ្ឋ ដាក់បាតរួច ក៏បានប្រគេន បច្ច័យសរុបក្នុងពិធីបុណ្យមាន ចំនួន ៣៦៦០០០០រៀល ជូនដល់ព្រះតេជគុណ អនុគណ លៀន គុលាលាភ ព្រះវិន័យធរគណខេត្តព្រះវិហារ ដើម្បីទទួលយកទៅកសាងសមិទ្ធិផលក្នុងវត្តគូលែនសុវណ្ណបុរីបញ្ញោ ដែលជាស្រែបុណ្យសម្រាប់ប្រជាពលរដ្ឋខ្មែរ គោរពប្រនិបត្តិតាមគន្លងព្រះពុទ្ធសាសនាខ្មែរ។
ព្រះតេជគុណ អនុគណ លៀន គុលាលាភ បានមានសង្ឃដិការថា វត្តនេះបានកសាងនៅឆ្នាំ ២០០៨គិតរហូតមកដល់ពេលនេះ ៧ឆ្នាំហើយ សមិទ្ធិផលនានា ត្រូវបានបងប្អូនជិតឆ្ងាយ រួមទាំងអាជ្ញាធរ ប្រជាពលរដ្ឋ ក្នុងស្រុក និងក្រៅស្រុក បានកសាងសាលាឆាន់ និងព្រះអង្គធំអាគារសម្រាប់ប្រារព្វពិធី រួមទាំងសមិទ្ធផលជា ច្រើនទៀត បានធ្វើឲ្យវត្តនេះមានភាពរីកចម្រើនយ៉ាងខ្លាំង ក្នុងនោះដែរវត្តអារាមនេះ ក៏នៅមានការខ្វះខាត និងត្រូវការចាំបាច់ក្នុងការកសាងព្រះវិហារ ដោយខាងវត្តនៅពុំទាន់មានព្រះវិហារសមរម្យនៅឡើយទេ ទើប ឆ្លៀតឪកាសអំពាវនាវ ដលសម្បុរសជនជិតឆ្ងាយ ឯកឧត្តម លោកជំទាវ ចូលរួមចាប់កុសល់ផលបុណ្យ កសាងព្រះវិហារ។
ដោយ ប៊ុន រដ្ឋា
