កំពង់ធំៈ នៅរសៀលថ្ងៃទី ១៦ ខែតុលា ឆ្នាំ ២០១៥ ឯកឧត្តម នាយឧត្តមសេនីយ៍ គន់ គីម អនុប្រធានសមាគមន៍អតីត យុទ្ធជនកម្ពុជា និងជាអគ្គលេខាធិការ ស.អ.ក អមដំណើរដោយឯកឧត្តម អ៊ុត សំអន អភិបាលខេត្តកំពង់ធំ ព្រមទាំងប្រតិភូមិ បានអញ្ជើញជាអធិបតីភាព ក្នុងពិធីផ្តល់ប្រាក់បេឡាមរណៈសង្គ្រោះដល់ ក្រុមគ្រួសារដែលបានមរណៈភាពកន្លងមកនិង គ្រួសារជនពិការ គ្រួសារចូលនិវត្តជន ចំនួន៤០គ្រួសារ និងគ្រួសារយោធិនចូលរួមចំនួន១០០នាក់ ពិធីបានចាត់ធ្វើឡើង នៅក្នុងទីបញ្ជាការតំបន់ប្រតិបត្តិការសឹករងកំពង់ធំ ។
នៅក្នុងពិធីសំណេះសំណាលជាមួយលោកតា លោកយាយ ដែលជាតំណាងឲ្យគ្រួសារអតីតយុទ្ធជន ឯកឧត្តម អ៊ុត សំអន អភិបាលខេត្តកំពង់ធំ ត្រូវបានប្រកាសតែងតាំងជាប្រធានកិត្តិយសសមាគមន៍អតីតយុទ្ធកម្ពុជាខេត្តកំពង់ធំ ។
ឯកឧត្តម សោម ស៊ុន ប្រធានសមាគមន៍អតីតយុទ្ធជនកម្ពុជា ខេត្តកំពង់ធំ បានបញ្ជាក់នៅក្នុងពិធីថា ចំនួនអតីតយុទ្ធជនកំពុងតែគ្រប់គ្រងបច្ចុប្បន្នមាន ៣៤១៨នាក់ ក្នុងនោះមានជនពិការ ១៤២១នាក់ និវត្តន៍ជន ៦១០នាក់ ពលី ១០៩៣នាក់ មរណៈ១៣៤ បាត់បង់សមត្ថភាពការងារ ១៧០នាក់ ចំនួនអតីតយុទ្ធជនដែលបានចុះឈ្មោះ ចូលជាសមាជិកសមាគមន៍អតីតយុទ្ធជន ២៩៨៦នាក់ ចំនួនអតីតយុទ្ធជនដែលបានទទួលប្រាក់បេឡាសង្គ្រោះ ទាំងអស់ ១០៥នាក់ នេះគឺជាការយកចិត្តទុកដាក់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានសមាគម អតីតយុទ្ធជនកម្ពុជា សម្តេចបានជម្រុញឲ្យមានការដោះស្រាយប្រាក់វិភាគទានរបស់ រាជរដ្ឋាភិបាល ជំនួសឲ្យប្រាក់បេឡាមរណៈសង្គ្រោះជូនបងប្អូន គ្រួសារ អតីតយុទ្ធជនកម្ពុជា ឲ្យបានមុនបុណ្យភ្ជុំបិណ្ឌ ក្នុងនោះក៏បានដោះស្រាយបាន៦៥គ្រួសារមុនភ្ជុំបិណ្ឌផងដែរ ។
ឯកឧត្តម នាយឧត្តមសេនីយ៍ គន់ គីម អនុប្រធានសមាគមអតីតយុទ្ធជនកម្ពុជា បានមានប្រសាសន៍ផ្តាំផ្ញើរដល់ថ្នាក់ ដឹកនាំខេត្តកំពង់ធំ ព្រមទាំងស្ថាប័នពាក់ព័ន្ឋឲ្យមានការយកចិត្តទុកដាក់ទៅលើអតីតយុទ្ធជន និងក្រុមគ្រួសារ ដោយសារតែកងទ័ពជាឆ្អឹងខ្នងរបស់ជាតិ ត្រូវទទួលបានការយកចិត្តទុកដាក់បំផុត ហើយនិងត្រូវបានដោះស្រាយ ថវិការបេឡាសង្គ្រោះជូនគ្រួសារឲ្យបានទាន់ពេលវេលា ដោយសង្កេតឃើញថា ក្រុមគ្រួសារអតីតយុទ្ធជន មួយចំនួន ធំគឺជាអតីតកងទ័ព ធ្លាប់មានស្នាដៃ បំរើជាតិមាតុភូមិ បំរើប្រទេសជាតិ តស៊ូស្វិតស្វាញពុំពារគ្រប់ឧបស័គ្គ ក្នុងសមរភូមិ ដូច្នេះដើម្បីឲ្យស័ក្កសមនូវគុណបំណាច់ ដែលបានពលី ឬពិការ ដោយសារបំរើជាតិ ទើបសម្តេចតេជោ ហ៊ុន សែន នាយករដ្ឋមន្ត្រីបាន បង្កើតសមាគមអតីតយុទ្ធជន ដើម្បីទ្រទ្រង់នូវជីវភាពរបស់ក្រុមគ្រួសារអតីតយុទ្ធជន។
ដោយ ប៊ុន រដ្ឋា
