ស្ទឹងត្រែង៖បទល្មើសនេសាទដែលតែងតែកើតមានស្អេកស្កាស់នៅរដូវទឹកសម្រកក្នុងអូរតាឡាសត្រូវបាន កម្លាំងចម្រុះដឹកនាំដោយលោកដៀប បូរ៉ានារងខណ្ឌរដ្ឋបាលជលផល បានសហការជាមួយកម្លាំងឆ្មាំទន្លេនៃប៉ុស្តិ៍អភិរក្សសត្វផ្សោតអន្លង់ឈើទាល សហគមន៍នេសាទ
ក្រឡាពាស ប៉ុស្តិ៍នគរបាលឃុំព្រះរំកិល វរសេនាតូចព្រំដែនគោក៧០១ និងកងអនុសេនាតូចទី៧ បានចុះបង្ក្រាបបទល្មើសនេសាទក្នុងតំបន់អូរតាឡាសទ្រង់ទ្រាយធំ ដោយដុតកម្ទេចចោលនូវឧបករណ៍ខុសច្បាប់នៅនិងកន្លែង។
ប្រតិបត្តិការចុះបង្ក្រាបបទល្មើសនេសាទនេះបានធ្វើឡើងរយៈពេលបី ថ្ងៃចាប់ពីថ្ងៃទី២៥ ដល់ថ្ងៃទី២៧ ខែតុលា ឆ្នាំ២០១៥ នៅចំណុចអូរតាឡាស ស្ថិតក្នុងភូមិព្រះរំកិល ឃុំព្រះរំកិល ស្រុកថាឡាបរិវ៉ាត់ ខេត្តស្ទឹងត្រែង។
លោកដៀប បូរ៉ា នាយរងខណ្ឌរដ្ឋបាលជលផលខេត្តបានឲ្យដឹងថា នៅក្នុងរដូវបើកនេសាទគឺជាពេលដែលត្រីចេញពីអូរចូលមកក្នុងទន្លេមេគង្គវិញ ហើយក៏ជាឪកាសដែលក្រុមបទល្មើសបាននិងកំពុងធ្វើសកម្មភាពបទល្មើស យ៉ាងសកម្មផងដែរ។
លោកនាយរងខណ្ឌបានអោយដឹងទៀតថាទីតាំងអូរតាឡាសគឺជាទីតាំងក្តៅគគុកនិងជាអូរមួយសំបូរទៅដោយជីវចំរុះគ្រប់ប្រភេទ ជាពិសេសនៅរដូវទឹកដំឡើង ត្រីឡើងចូលទៅក្នុងអូរ សុទ្ធសឹងជាត្រីមេពូជធំៗមានទម្ងន់មួយក្បាលជិតដប់គីឡូ រហូតទៅជាងដប់គីឡូក៏មាន បានចូលទៅក្នុងអូរមួយនេះ រកទីជរកពងកូននិងនៅរដូវទឹកស្រកនេះ ពួកវាបានចេញពីអូរចូលមកទន្លេវិញ ហើយត្រូវបានក្រុមឈ្មួញទុច្ចរិត បានច្រុះសរសរធំឃាំងបាំងព្រួល ដាក់ដាយ(ជីប)កាត់អូរ ជាកង់ៗរាប់សិបកន្លែង និងបានធ្វើការរឹបអូសទាំងស្រុង។
លោកបន្តថានៅក្នុងកិច្ចប្រតិបត្តិការរយះពេល៣ថ្ងៃកម្លាំងជំនាញប្រមូលបានឧបករណ៍នេសាទខុសច្បាប់ ដកហូតបានទូកឌុបចំនួន១ ថ្មបាំងទប់ទឹកចំនួន២៥តោន បង្គោលបាំងព្រួល១២៦០ដើម ព្រួល៤៥០ម៉ែត្រឧបករណ៍នេសាទល្មើសដាយ២មាត់ប្រវែង៤០ម៉ែត្រ។
លោកដៀបបូរ៉ានាយរងខណ្ឌរដ្ឋបាលជលផលស្ទឹងត្រែងបានបញ្ជាក់ថាការបង្ក្រាបបទល្មើសនេសាទទ្រង់ទ្រាយធំ មិនថាក្នុងរដូវបិទឬបើកទេអោយតែឧបករនេសាទខុខច្បាប់ ត្រូវតែធ្វើការបង្ក្រាប។គឺដើម្បីការពារធនធានជលផល ជាពិសេសត្រីមេពូជ និងសត្វ ផ្សោត ដែលជាសត្វកំពុងរងគ្រោះថ្នាក់ ធ្វើអោយវាសំបូរឡើងវិញ។ដើម្បីអោយវាបានពងកូនធំធាត់ នឹងធ្វើអោយសហគមន៍នេសាទ ក៏ដូចប្រជានេសាទ ទទួលបានទិន្នផលខ្ពស់ សំរាប់ទ្រទ្រង់ជីវភាពរបស់ពួកគាត់ផងដែរ។
លោកនាយរងខណ្ឌបានបន្តថា ក្រោយពីមានសកម្មភាពនេះកើតឡើង លោកបានដឹកនាំកម្លាំងចុះបង្ក្រាបតែម្តង។ហើយនៅក្នុងសកម្មភាពចុះបង្ក្រាបនេះផងដែរ លោកបានធ្វើការអប់រំដល់ប្រជានេសាទដែលបានប្រកបមុខរបរខុសច្បាប់នេះ កុំឲ្យប្រព្រឹត្តបន្តទៀត បើពុំនោះទេអាចប្រឈមនឹងផ្លូវច្បាប់។បច្ចុប្បន្ន ឧបករណ៍នេសាទ ដែលជំនាញបង្ក្រាបបាន ត្រូវបានធ្វើការដុតបំផ្លាញចោលនៅនឹងកន្លែងតែម្ដង៕
