ខេត្តសៀមរាប នៅចុងសប្តាហ៏ក្នុងថ្ងៃទី៦ខែធ្នូឆ្នាំ២០១៥ក្រុមមនុស្សចម្រុះជាតិសាសន៍ មកពី៧៥ប្រទេស ប្រមាណ១ម៉ឺននាក់ បាននាំគ្នាមកចូលរួមនិងអបអរសាទរ ការរត់ប្រណាំងកីឡាពាក់កណ្ដាលម៉ារ៉ាតុងអន្តរជាតិលើកទី២០នៅមុខប្រាសាទអង្គរវត្តនៃខេត្តសៀមរាប។
កីឡាពាក់កណ្ដាលម៉ារ៉ាតុងអន្តរជាតិនេះ មានកីឡាករ កីឡាការិនីជាតិនិងអន្តរជាតិប្រមាណ៨ពាន់នាក់បានស្ម័គ្រចិត្ត រត់ប្រណាំង ចម្ងាយ៣គីឡូម៉ែត្រ១០គីឡូម៉ែត្រ និងចម្ងាយ២០គីឡូម៉ែត្រព័ទ្ធជុំវិញតំបន់អង្គរ។
ក្រុមអ្នករត់ប្រណាំងទាំងជនជាតិខ្មែរ និងបរទេសចម្រុះជាតិសាសន៍ ក្រៅតែពីនាំគ្នារត់ជាក្រុមៗ ពួកគេក៏សំដែងអារម្មណ៍រីករាយ បើទោះបីជាការរត់ ធ្វើឱ្យបែកញើសពេញខ្លួន និងនឿយហត់ខ្លះក៏ដោយ។
លោកថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ថាព្រឹត្តិការណ៍កីឡារត់ប្រណាំងពាក់កណ្ដាលម៉ារ៉ាតុងនេះ ក្រៅតែពីមានគោលដៅ រកមូលនិធិទៅជួយដល់ជនពិការ ជួយដល់កាកបាទក្រហម ជួយដល់មន្ទីរពេទ្យកុមារ និងជនរងគ្រោះដោយសារគ្រាប់មីន វាក៏ជាព្រឹត្តិការណ៍ដែលអាចជួយផ្សព្វផ្សាយសក្ដានុពលទេសចរណ៍របស់កម្ពុជាផងដែរ។
((យើងគិតថាយើងបានផ្សព្វផ្សាយទូលំទូលាយ ទៅខាងក្រៅតាមរយៈព្រឹត្តិការណ៍នេះ ពី១ឆ្នាំទៅ១ឆ្នាំ។អីចឹងយើងឃើញថា៤ពាន់នាក់ដែលមកចូលរួមទាំងកូនទាំងចៅ អាច១ម៉ឺននាក់ជាងហើយ)។
លោកឃឹម ប៊ុនសុង អភិបាលខេត្តសៀមរាប មានប្រសាសន៍ថាខេត្តសៀមរាប គឺជាខេត្តមួយដែលពឹងផ្អែកលើវិស័យទេសចរណ៍ច្រើនជាងគេ បន្ទាប់ពីវិស័យកសិកម្មជាចម្បង។ លោកឃឹម ប៊ុនសុង បញ្ជាក់ទៀតថា នៅពេលដែលរដ្ឋាភិបាល និងក្រសួងទេសចរណ៍ កំពុងប្រឹងប្រែងទាក់ទាញភ្ញៀវទេសចរណ៍បរទេស ឱ្យចូលមកទស្សនាកម្ពុជានេះ គឺលោកជាអាជ្ញាធរខេត្តក៏កំពុងប្រឹងប្រែងរៀបចំ តំបន់ទេសចរណ៍ធម្មជាតិ ឱ្យបានច្រើនកន្លែងថែមទៀត ដើម្បីឱ្យភ្ញៀវទេសចរណ៍បរទេស បានមកស្នាក់នៅខេត្តសៀមរាបបានច្រើនថ្ងៃ។
រដ្ឋមន្ត្រីក្រសួងទេសចរណ៍លោកថោង ខុន ឱ្យដឹងថាតាមការវាយតម្លៃ របស់ពិភពលោក គឺកម្ពុជា ជាប្រទេសមួយនៅក្នុងតំបន់អាស៊ីអគ្នេយ៍ ដែលមានឧត្តមភាព អាចប្រកួតប្រជែងផ្នែកទេសចរណ៍វប្បធម៌ និងទេសចរណ៍ធម្មជាតិ ជាមួយបណ្ដាប្រទេសជាច្រើនទៀត នៅក្នុងពិភពលោកបាន ដោយសារកម្ពុជាមានប្រាសាទបុរាណនិងតំបន់ទេសចរណ៍ធម្មជាតិ រួមទាំងឆ្នេរសមុទ្រផង។
លោកថោង ខុន រដ្ឋមន្ត្រីក្រសួងទេសចរណ៍ រំពឹងថាសម្រាប់ឆ្នាំ២០២០ខាងមុខ កម្ពុជាអាចនឹងមានភ្ញៀវទេសចរណ៍បរទេសចូលមកកំសាន្ត ប្រមាណពី៧លាន៥សែន ទៅ៨លាននាក់។
ក៏ប៉ុន្តែសម្រាប់ឆ្នាំ២០១៥នេះ កម្ពុជាធ្លាប់រំពឹងទុកថានឹងអាចទទួលបានភ្ញៀវទេសចរណ៍បរទេសចំនួន៥លាននាក់នោះ គឺមិនទាន់បានសំរេចជោគជ័យ តាមការរំពឹងទុកនៅឡើយទេ។រដ្ឋមន្ត្រីក្រទេសចរណ៍ប៉ាន់ប្រមាណយ៉ាងហោចណាស់ រហូតដល់ដំណាច់ឆ្នាំ២០១៥ កម្ពុជាក៏អាចទទួលបានភ្ញៀវទេសចរណ៍បរទេសប្រមាណ៤លាន៨សែននាក់ដែរ៕
